ކޮވިޑް އިންޑިއާ: ވެކްސިން ހުސްވެ ސެންޓަރުތައް ބަންދުކޮށްފި
އިންޑިއާގެ މުންބާއީގައި ވެކްސިން ސެންޓަރުތައް ތިން ދުވަހަށް ބަންދުކޮށްފިއެވެ.
މުންބާއީގެ ކަމާބެހޭ އިދާރާތަކުން މީޑިއާއަށް ހާމަކޮށްފައިވާ ގޮތުގައި ވެކްސިން ސެންޓަރުތައް ބަންދުކުރަން ނިންމާފައި ވަނީ އެކަށީގެންވާ ވަރަށް ވެކްސިން ނެތުމުގެ ސަބަބުންނެވެ.
މިހާރު އިންޑިއާގައި ވެކްސިން ދެމުން އަންނަނީ 45 އަހަރުންމަތީގެ މީހުންނަށެވެ. އިންޑިއާއިން ވަނީ 18 އަހަރުން މަތީގެ އެންމެނަށް މެއި 1 ވަނަ ދުވަހުން ފެށިގެން ވެކްސިން ދޭން ނިންމާފައެވެ. ނަމަވެސް ދުނިޔޭގެ އެންމެ ބޮޑު ވެކްސިން ކާރުޚާނާތައް ހުންނަ އިންޑިއާއަށް މެއި މަހުގެ 1 ވަނަ ދުވަހުން ފެށިގެން 18 އަހަރުން މަތީގެ އެންމެނަށް ވެކްސިން ޖެހޭނެ އިންތިޒާމް ހަމަ ނުޖެއްސޭނެ ކަމަށް އެޤައުމުގެ މީޑިއާތަކުން ބުނެއެވެ،
އިންޑިއާގައި ޖެނުއަރީ މަހުން ފެށިގެން މިހާތަނަށް ވެކްސިން ދެވިފައި ވަނީ އާބާދީގެ 9 އިންސައްތަ މީހުންނަށެވެ.
މިދިޔަ އަހަރު އިންޑިއާއިން ކޮވިޑް-19 މެނޭޖް ކުރުމުގައި ބޮޑެތި ކާމިޔާބީ ތަކެއް ހޯދި ނަމަވެސް، މިމަހުން ފެށިގެން އިންޑިއާގެ ހާލަތު މިވަނީ ވަރަށް ބޮޑުތަން ގޯސްވެފައެވެ. ދުވާލެއްގެ މައްޗަށް އެތައް ލައްކަ މީހުން ކޮވިޑް-19 އަށް ފައްސިވަމުން އަންނައިރު، ބަލީގައި ފަރުވާ ނުދެވި އެތައް ބަޔަކު ދަނީ މަރުވަމުންނެވެ.
