މާފުށިން ކޮވިޑަށް ފައްސިވި މީހުންގެ ޖުމްލަ އަދަދު 300 އިން މައްޗަށް
ކ. މާފުށިން ކޮވިޑް-19 އަށް ފައްސިވި މީހުންގެ ޖުމްލަ އަދަދު 309އަށް އަރައިފިއެވެ.
ނިމިދިޔަ އޭޕްރީލް މަހުގެ 20 ވަނަ ދުވަހު އެރަށު ފްލޫ ކްލިނިކަށް ދެއްކި މީހަކު ކޮވިޑް-19 އަށް ފައްސިވުމާ ގުޅިގެން އެ ދުވަހުން ފެށިގެން އެރަށް ވަނީ މޮނިޓަރިންއަށް ލެވިފައެވެ.
ކޮންޓެކްޓް ޓްރޭސިން ހަދައި އެ ކަމާ ގުޅިގެން އެރަށުގެ ގިނަ އަދަދެއްގެ ގެތަކެއް ވަނީ ކަރަންޓީނަށް ލައިފައެވެ.
އެ ރަށުން މިހާތަނަށް 1،200 އަށް ވުރެ ގިނަ ސާމްޕަލް ވަނީ ނެގިފައެވެ. އަދި އޭގެ ތެރެއިން 309 މީހަކު ފައްސިވެފައިވާ އިރު، 100 ސާމްޕަލްއެއްގެ ނަތީޖާ އަދި ނުލިބެއެވެ.
މިވަގުތު އެރަށުގައި އެނދުމަތި ކޮށްގެން ފަރުވާ ހޯދާ މީހަކު ނެތެވެ. ހާލަތު ގޯސް ވެގެން އަދި މިހާތަނަށް އެއްވެސް މީހަކު ރިޕޯޓު ކޮށްފައި ނުވާ ކަމަށް ވެސް މައުލޫމާތު ލިބެއެވެ. އެހެން ނަމަވެސް ކޮވިޑަށް ފައްސިވި ހައިރިސްކުގެ ހަތް މީހަކު މިހާރު ހުޅުމާލެ ކޮވިޑް ފެސިލިޓީއަށް ބަދަލު ކުރެވިފައިވާ ކަމަށް ވެސް މައުލޫމާތު ލިބެއެވެ.
