މަތިވެރިން އިތުރު 24 މީހުން ކޮވިޑަށް ފައްސިވެ، ޖުމްލަ އަދަދު 221އަށް
އއ. މަތިވެރިން އިތުރު 24 މީހުން ކޮވިޑް-19 އަށް ފައްސިވެ، އެ ރަށުން ފައްސިވީ ޖުމްލަ އަދަދު 221 އަށް އަރައިފިއެވެ.
މަތިވެރި ސިއްޙީ މަރުކަޒުން އާންމުކޮށްފައިވާ އެންމެ ފަހުގެ ތަފާސް ހިސާބުތަކުން ދައްކާ ގޮތުގައި އެރަށުގައި މިވަގުތު އެކްޓިވް 210 ކޮވިޑް ކޭސް އެބައުޅެއެވެ. އަދި 53 މީހެއްގެ ނަތީޖާ އަދި ނުލިބޭ ކަަމަށް ވެސް ސިއްޙީ މަރުކަޒުން ހާމަ ކޮށްފައިވެއެވެ.
މަތިވެރިން ކޮވިޑަށް ފައްސިވީ 11 މީހަކު މިހާރު ވަނީ މި ބަލިން ރަނގަޅުވެފައެވެ.
އއ. މަތިވެރީގައި ކޮވިޑް-19 ފެތުރެން ފަށައިފައި ވަނީ އިންޑިއާއިން އެ ރަށަށް ދިޔަ ފަތުރުވެރިއެއްގެ ސަބަބުން ކަމަށް އެރަށު ކައުންސިލްގެ ރައީސް އާތިފް މީގެކުރިން ވަނީ ތުހުމަތު ކުރައްވައިފައެވެ.
"ދެން" އަށް މައުލޫމާތު ދެއްވަމުން އާތިފް މީގެކުރިން ވިދާޅުވީ، އެ ރަށުން އެންމެ ފުރަތަމަ މި ބައްޔަށް ފައްސިވެފައި ވަނީ އިންޑިއާގެ ފަތުރުވެރިއެއް ކަމަށާއި އެ މީހާގެ ނަތީޖާ ލިބުނު އިރު އޭނާ ރަށުން ފުރައިގެން ގޮސްފި ކަމަށެވެ.
އެ ފަތުރުވެރިޔާއާ ކޮންޓެކްޓް ވި އިންޑިއާގެ 4 ރައްޔިތުންނާއި، އޭނާ ހުރި ގެސްޓްހައުސްގައި މަސައްކަތް ކުރާ މީހަކު ވެސް ބައްޔަށް ފައްސިވެފައިވާ ކަމަށް އާތިފު ވިދާޅުވެފައިވެއެވެ.
އިންޑިއާ މީހާގެ ކްލަސްޓަރގެ އިތުރުން، ބޮޑުފުޅުދުއަށް ދިޔަ މީހަކު ޕޮޒިޓިވްވެ އުފެދުނު ކްލަސްޓާއެއް ވެސް އެ ރަށުގައި އެބައުޅޭ ކަމަށް އާތިފް ވިދާޅުވިއެވެ.
Ads by STO
