މަދަނީ އިޖުރާއަތުގެ ބިލް ފުރިހަމަކުރުމަށް މަޖިލީހަށް އެއްބާރުލުން ދޭނަން: އޭޖީ
މަދަނީ އިޖުރާއަތުގެ ބިލް ޤާނޫނަކަށް ހެދުމަށް ދޭން ޖެހޭ އެއްބާރުލުން ސަރުކާރުން ދެމުން ގެންދާނެ ކަމަށް ބަންޑާރަ ނާއިބުގެ އޮފީހުން ވިދާޅުވެއްޖެއެވެ.
ބަންޑާރަ ނާއިބުގެ އޮފީހުން ރޭގެ ވަގުތެއްގައި ނެރުނު ބަޔާނެއްގައި ވަނީ މަދަނީ އިޖުރާއަތުގެ ބިލު ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހެޅީ 2019 ވަނަ އަހަރުގެ ޑސެމްބަރު މަހުގެ ތެރޭގައި ކަމަށެވެ. އަދި އެ ބިލުގެ އިބްތިދާއީ ބަހުސްގެ މަރުޙަލާ ނިމި، ރައްޔިތުންގެ މަޖިލީހަށް ބިލު ބަލައިގަނެ މަޖިލީހުގެ ޖުޑީޝިއަރީ ކޮމިޓީއަށް ފޮނުވުނީ 12 ފެބުރުވަރީ 2020 ގައި ކަމަށެވެ.
އަދި މަދަނީ އިޖުރާއަތުގެ ބިލަކީ 25 ޖޫން 2019 ގައި ސަރުކާރުން އިޢުލާނުކުރި ލެޖިސްލޭޓިވް އެޖެންޑާގައި ހިމެނުނު މުހިންމު ބިލުތަކުގެ ތެރެއިން އެއް ބިލު ކަމަށާއި އެ ބިލު އެކުލަވާލުމުގެ މަސައްކަތް އޮފީހުން ފަށައިފައި ވަނީ، 2019 ވަނަ އަހަރުގެ ޖުލައި މަހުގެ ތެރޭގައި، ޔޫ.އެން.ޑީ.ޕީ.ގެ އެހީތެރިކަމާއެކު ޢައްޔަންކުރި އިންޓަރނޭޝަނަލް ކޮންސަލްޓަންޓެއް މެދުވެރިކޮށް ކަމަށެވެ
އެގޮތުން ކޮންސަލްޓަންޓް އެކުލަވާލި ބިލުގެ އިނގިރޭސި ދެލިކޮޕީގެ އެންމެ ފަހުގެ ކޮޕީ އެ އޮފީހަށް ހުށަހެޅުނީ، 2019 ނޮވެމްބަރު މަހުގެ ފަހުކޮޅުގައި ކަމަށްވީ ނަމަވެސް، އެ ބިލުގެ މަސައްކަތް ނިންމައި ރައްޔިތުންގެ މަޖިލީހަށް އެ އަހަރު ހުށަހަޅަން ޤަޞްދުކޮށްފައިވާތީ، ރައްޔިތުންގެ މަޖިލީހުގެ ތިންވަނަ ދައުރަށް އެ ބިލު ހުށަހެޅުމަށްޓަކައި، އެ ބިލުގެ އިނގިރޭސި ޑްރާފްޓަށް ތައްޔާރުކޮށް، ބިލުގެ ދިވެހި ދެލިކޮޕީއެއް އެކުލަވާލުމުގެ މަސައްކަތް އެ އޮފީހުން ކުރިއަށް ގެންގޮސްފައިވާނެ ކަމަށް ވެސް އޭޖީ އޮފީހުގެ ބަޔާނުގައި ވެއެވެ. އަދި އެހައި ތަނަށް މަޖިލީހުގެ އެ ދައުރުގައި ދެން ބާކީ އޮތީ ދެ ހަފްތާއެއްހާ ދުވަސްކަމުން، އެ މަސައްކަތް ފުރިހަމަކުރަން ޖެހުނީ ވަރަށް ކުރު މުއްދަތެއްގެ ތެރޭގައި ކަމަށް ވެސް ފާހަގަ ކޮށްފައި ވެއެވެ.
އެހެންނަމަވެސް، ކަނޑައެޅިފައިވާ ގޮތަށް ރައްޔިތުންގެ މަޖިލީހުގެ ތިންވަނަ ދައުރު ނިމުމުގެ ކުރިން އެ ބިލު އެމަޖިލީހަށް ލުމަށް ޓަކައި ކުރަންޖެހޭ މަސައްކަތްތައް ކުރިއަށް ގެންދިޔުމަށް ނިންމައި، އެ ބިލު އެ އަހަރުގެ ޑިސެމްބަރު މަހު ރައްޔިތުންގެ މަޖިލީހަށް ހުށަހެޅި ކަމަށް ވެސް އެ ބަޔާނުގައި ވެއެެވެ.
އޭގެ ފަހުން، ކޮމިޓީން ބިލުގެ މަސައްކަތް ކުރިއަށް ގެންދެވުމުގައި އެހީއެއްގެ ގޮތުގައި ބޭނުން ކުރެއްވޭނެ ބިލުގެ ޚުލާޞާއެއް ވެސް އެ އޮފީހުން ވަނީ އެކުލަވާލައި، މި އަހަރުގެ މާރިޗު މަހުގެ ތެރޭގައި ރައްޔިތުންގެ މަޖިލީހުގެ ޖުޑީޝިއަރީ ކޮމިޓީއަށް ފޮނުވާފައެވެ.
މަދަނީ އިޖުރާއަތުގެ ބިލަކީ، ދިވެހިރާއްޖޭގެ މަދަނީ ޢަދުލުގެ ނިޒާމު ތަރުތީބުވެގެންދާނެ ގޮތް ކަނޑައަޅައިދޭ މައިގަނޑު ބިލު ކަމުގައިވާތީ، އެ ބިލުގެ މަސައްކަތް ޖުޑީޝިއަރީ ކޮމިޓީން ކުރިއަށްގެންދަވާއިރު، އެ ކޮމިޓީގެ މަސައްކަތުގައި ދޭންޖެހޭ އެހީތެރިކަމާއި އެއްބާރުލުން މިހާތަނަށް ސަރުކާރުން ވަނީ ދެމުންގޮސްފައި ކަމަށާއި ކުރިއަށް އޮތްތާނގައި ވެސް، އެ ކޮމިޓީއަށާއި ރައްޔިތުންގެ މަޖިލީހުގެ އެހެން ކޮމިޓީތަކަށް ދޭންޖެހޭ އެއްބާރުލުން ސަރުކާރުން ދެއްވާނެ ކަމަށް ވެސް އެ ބަޔާނުގައިވެއެވެ.
