ކޮވިޑް-19އަށް ފައްސިވާ މީހުންނަށް ފަރުވާ ދޭނެ ސިއްޙީ ޚިދުމަތްތެރިން ހޯދަނީ
ކޮވިޑް-19އަށް ފައްސިވާ މީހުންނަށް ފަރުވާ ދިނުމަށްޓަކައި ސިއްހީ ހިދުމަތްތެރިން ހޯދަން އިއުލާން ކޮށްފިއެވެ.
ހެލްތު މިނިސްޓްރީން މިއަދު ކުރި އިއުލާނެއްގައި ކޮވިޑްގެ އޮޕަރޭޝަންގައި ބައްޔަށް ފައްސިވާ ފަރާތްތަކަށް ފަރުވާ ދިނުމަށް ފަންނީ އިތުރު މުވައްޒަފުން ހޯދުމަށް ބޭނުންވެފައިވާ ކަމަށެވެ. އެހެންކަމުން މި މަސައްކަތުގައި ވޮލެންޓިއާކުރަން ބޭނުންވާ ސިއްހީ ހިދުމަތްތެރިންގެ ވަނަވަރު، އީމެއިލް މެދުވެރިކޮށް އެ މިނިސްޓްރީއަށް ފޮނުވުމަށެވެ.
މިފަދަ ކޮންމެ ކަމެއްގައި ސިއްޙީ މާހިރުންގެ ފަރާތުން ލިބެމުންދާ އެއްބާރުލުމަށް ހެލްތު މިނިސްޓްރީން ވަނީ ޝުކުރު ދަންނަވާފައެވެ.
ރާއްޖޭގައި މިވަގުތު ކޮވިޑްގެ ހާލަތު ދެރަވުމާ ގުޅިގެން ސިއްޙީ އިތުރު ވަސީލަތްތަކަށް މިވަނީ އިންތިހާއަށް ބޭނުން ވެފައެވެ. މިފަހަކަށް އައިސް ކޮވިޑަށް ފައްސިވާ އަދަދުތައް ރިކޯޑު އަދަދަކަށް އިތުރުވަމުންދާއިރު، ހޮސްޕިޓަލުގެ އެނދުތައް ވެސް ދަނީ ފުރެމުންނެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) ގެ އެންމެ ފަހުގެ ތަފާސް ހިސާބުތަކަށް ބަލާއިރު، އިއްޔެ ރާއްޖެއިން 601 މީހުން ވަނީ ކޮވިޑް-19 އަށް ފައްސި ވެފައެވެ.
