ބިރުވެރިކަން އިންތިހާއަށް : އައިސީޔޫގައި 11، ވެންޓިލޭޓަރުގައި 7 މީހުން
ރާއްޖޭގައި ކޮވިޑް-19 ޖެހޭ މީހުން އިންތިހާއަށް ގިނަވެ، ބަލީގެ ނުރައްކާ ބޮޑުވެއްޖެއެވެ.
ބައްޔަށް ފައްސިވާ މީހުންގެ އަދަދު 1000 އަށް ވުރެ މަތީގައި އުޅޭތާ މިހާރު ތިން ދުވަސް ވެގެން ދިޔަ އިރު، ބަލީގައި މަރުވާ މީހުން ވެސް ދުވަހެއް ދުވަހަކަށް ދަނީ އިތުރުވަމުންނެވެ. ރާއްޖޭގެ ހާލަތު ދުވަހެއް ދުވަހަކަށް ގޯސް ވަމުން ދާކަމަށް ކޮންމެ ދުވަހަކު އެޗްޕީއޭއާއި ސިއްޙީ ހިދުމަތްތެރިން ދަނީ ބުނަމުންނެވެ.
އެޗްޕީއޭގެ އެންމެ ފަހުގެ ތަފާސް ހިސާބުތަކަށް ބަލާއިރު ރާއްޖެއިން މި ބައްޔަށް ޖުމްލަ 42،775 މީހުން ފައްސިވެފައިވެއެވެ. އެކްޓިވް ކޭސްތަކުގެ އަދަދު 15،003 ގައި އުޅޭއިރު 27،672 މީހުން ބަލިން ރަނގަޅުވެފައިވެއެވެ. އަދި ހޮސްޕިޓަލުގައި 290 މީހަކަށް އެބަފަރުވާދެއެވެ.
ހަމައެއާ އެކު، 11 މީހަކަށް އައިސީޔޫގައި ފަރުވާ ދެމުންދާއިރު ހަތް މީހަކު އޮތީ ވެންޓިލޭޓަރުގައެވެ.
މި ދަނޑިވަޅަކީ އެންމެން ވެސް މި ބަލިން ރައްކާތެރިވުމަށް މަސައްކަތްކުރަންވީ ވަގުތެވެ. ސިއްޙީ ހިދުމަތްތެރިން ލަފާއާއި އިރުޝާދުތަކަށް ފުރިހަމަޔަށް އަމަލުކުރަންވީ ވަގުތެވެ.
ބަލީގައި ނިޔާވާ މީހުންގެ އަދަދު ވެސް ދުވަހެއް ދުވަހަކަށް ދަނީ އިތުރުވަމުންނެވެ. އެގޮތުން ރާއްޖެއިން ޖުމްލަ 94 މީހަކު ކޮވިޑް ބަލީގައި ވަނީ ނިޔާވެފައެވެ. ފާއިތުވެދިޔަ 48 ގަޑިއިރުގެ ތެރޭގައި ތެރޭގައި 7 މީހުން ވަނީ ބަލި ޖެހިގެން ނިޔާވެފައެވެ.
އެންމެ ފުރަތަމަ ރާއްޖޭގައި ކޮވިޑް-19 ބަލި ފެތުރެމުންދިޔައީ މާލެ ސިޓީގައި އެކަންޏެވެ. މިއާ އެކު ގިނަ ފިޔަވަޅުތަކެއް އެޅިގެން ދިޔައެވެ. ގިނަ ދުވަސްތަކަކަށް މާލެ ސިޓީ ލޮކްޑައުން ކޮށްފައި އޮތުމަށް ފަހު އިތުރު ފިޔަވަޅުތަކާ އެކު މާލެއިން އަތޮޅުތެރޭގެ ރަށްރަށަށް ކަރަންޓީންވާން ޖެހޭ ގޮތަށް ދަތުރުކުރުމުގެ ހުއްދަ ދެވުނެވެ.
ފިޔަވަޅުތައް ވަރުގަދަ ކުރި ނަމަވެސް ދެން ފެނިގެން ދިޔައީ އެކި ރަށްރަށުން މީހުން ކޮވިޑް-19 އަށް ފައްސިވަމުން ދިޔަ މަންޒަރެވެ. މިއާ އެކު މިހާރު ރާއްޖޭގެ ޖުމްލަ 50 ރަށެއް މޮނިޓަރިން ހާލަތަށް ގެނެވިފައިވެއެވެ.
އެއީ ޅ. ނައިފަރާއި، އދ. މާމިގިއްޔާއި ތ. މޭވަންޑޫ އާއި ތ. މަޑިފުއްޓާއި ބ. އޭދަފުއްޓާއި ކ. ހިންމަފުއްޓާއި ކ. ގުޅި އާއި ކ. މާފުއްޓާއި އއ. މަތިވެރި އާއި ލ. މާންދޫ އާއި ލ. ގަމާއި ލ. ފޮނަދޫ އާއި ގދ. ތިނަދޫ އާއި އއ. އުކުޅަހާއި ކ. ތުލުސްދޫ އާއި ލ. ދަނބިދޫ އާއި އއ. ރަސްދޫ އާއި އައްޑޫ ސިޓީ އާއި ހއ. ދިއްދޫ އާއި ފ. ފީއަލި އެވެ. މީގެ އިތުރުން އއ. ހިމަންދޫ އާއި ކ. ގުރައިދޫ އާއި ފ. ނިލަންދޫ އާއި ލ. އިސްދޫ އާއި އދ. ފެންފުއްޓާއި ލ. މާވަށާއި ފުވައްމުލަކު ސިޓީ އާއި ނ. ވެލިދޫ އާއި ށ. ފުނަދޫ އާއި ށ. ޅައިމަގާއި ރ. ހުޅުދުއްފާރު އަދި ގދ. ގައްދޫއެވެ.
އަދި ބ. ތުޅާދޫ އާއި ވ. ފުލިދޫ އާއި އދ. މަހިބަދޫ އާއި ރ. މަޑުއްވަރީ އާއި އއ. ފެރިދޫ އާއި ހދ. ކުޅުދުއްފުށި ސިޓީ އާއި ށ. ކަނޑިތީމާއި ށ. ގޮއިދޫ އާއި ކ. ކާށިދޫ އާއި ދ. ކުޑަހުވަދޫ އާއި ގއ. ދާންދޫ އާއި ޅ. ހިންނަވަރު އަދި ގއ. ގެމަނަފުއްޓާއި ދ. ބަނޑިދޫގެ އިތުރުން ނ. ކެނދިކުޅުދޫ، ދ. ހުޅުދެލި، ވ. ކެޔޮދޫ އާއި ތ. ގުރައިދޫ ވެސް އޮތީ ބަންދުކޮށްފައެވެ.
ރާއްޖޭގައި ކޮވިޑް-19ގެ ހާލަތު މިވަނީ މީގެ ކުރިން އުންމީދު ނުކުރާ ވަރަށް ގޯސްވެފައެވެ. އެގޮތުން މި ބައްޔަށް ކުޑަކުދިން ފައްސިވާ އަދަދު ވެސް ކަންބޮޑުވާ މިންވަރަކަށް ވަނީ އިތުރުވެފައެވެ. ދުވާލެއްގެ މަތިން 10 އަހަރުން ދަށުގެ 70 ނުވަތަ 80 ކުޑަކުދިން ބައްޔަށް ފައްސިވާ ކަމަށް ޑޮކްޓަރުން ދަނީ ބުނަމުންނެވެ. އަދި 1 އަހަރުން ދަށުގެ 4 ނުވަތަ 5 ކުދިން ކޮންމެ ދުވަހަކު ވެސް ފައްސިވެއެވެ.
ރާއްޖޭގައި ކޮވިޑް-19 އަށް ފައްސިވާ އަދަދުތައް އިތުރުވަމުން ދިޔުމާ ގުޅިގެން އަދަދުތައް ކޮންޓްރޯލް ކުރުމުގެ ގޮތުން ރައީސް އޮފީހާއި އެޗްޕީއޭ ގުޅިގެން ވަނީ ހަރުކަށި ފިޔަވަޅުތަކެއް އަޅާފައެވެ.
ފަހުން އަޅައިފައިވާ ފިޔަވަޅުތަކުގެ ތެރޭގައި މި މަހުގެ 5 އިން 15 ގެ ނިޔަލަށް ސަރުކާރު އޮފީސްތައް ބަންދުކޮށް އޮންލައިންކޮށް މަސައްކަތްތައް ނިންމުމަށް ބަދަލު ކުރުމާއި، ސްކޫލްތަކުގެ ކިޔެވުން ވެސް އޮންލައިންކޮށް ކިޔަވައިދޭ ގޮތަށް ބަދަލު ކުރުމުގެ އިތުރުން، ވެކްސިންގެ ދެ ޑޯޒް ފުރިހަމަ ކުރުމުން ރަށްރަށަށް ދަތުރު ކުރެވޭ ގޮތަށް ދިން ލުއި މި މުއްދަތުގެ ތެރޭގައި މެދުކަނޑައިލުން އަދި މިސްކިތްތަކުގައި ގައިދުރުކަން ބެހެއްޓުމާއި މާސްކު އަޅައިގެން ނަމާދު ކުރުން ހިމެނެއެވެ.
