ފިޠުރު ޒަކާތުގެ ގޮތުގައި 6.7 މިލިއަން ރުފިޔާ
ފިޠުރު ޒަކާތުގެ ގޮތުގައި މި ރަމަޟާން މަހު މާލެ ސަރަޙައްދުން 6 މިލިއަނަށް ވުރެ ގިނަ ރުފިޔާ ލިބިފައިވާކަމަށް އިސްލާމިކް މިނިސްޓްރީން ވިދާޅުވެއްޖެއެވެ.
އިސްލާމިކް މިނިސްޓްރީން ވިދާޅުވީ މާލެ ސިޓީގައި ފަގީރުންނާ މިސްކީނުންގެ ދަފްތަރުގައި 1498މީހުން ހިމެނޭކަމަށެވެ. މީގެތެރެއިން 1494މީހުންނާ ޒަކާތް ހަވާލު ކުރެވިފައިވާ ކަމަށް އެ މިނިސްޓްރީން ބުނެފައި ވެއެވެ.
ޒަކާތުގެ ފައިސާގެ ގޮތުގައި ލިބުނު 6.7 މިލިއަނުން ފަގީރުންގެ ދަފްތަރުގައި ހިމެނުނު މީހުންނަށް ބަހައިފައި ވަނީ 6،274،800 (ހަމިލިއަން ދެލައްކަ ހަތްދިހަ ހަތަރުހާސް އަށްސަތޭކަ ރުފިޔާ) އެވެ.
މިފަހަރު ފައިސާއާއި ގޮވާމުގެ އިތުރުން އޮންލައިންކޮށް ފިތުރު ޒަކާތް ދެއްކޭ ގޮތަށް ވަނީ ހަމަޖައްސާފައެވެ.
އޮންލައިންކޮށް ޒަކާތް ދައްކާ ފަރާތްތަކުން ފަހިޕޭ، ބީއެމްއެލް، ދިރާގުޕޭ، އުރީދޫ އެމްފައިސާ، އަދި އިސްލާމިކް ބޭންކްގެ ފައިސާނެޓް (އެޕްލިކޭޝަން) ބޭނުންކޮށްގެން ޒަކާތް ދެއްކޭނެ ގޮތް ހަމަޖައްސާފައިވެއެވެ.
އިސްލާމިކް މިނިސްޓްރީއިން ވިދާޅުވީ އަތޮޅުތަކުގައި ވެސް މި މުއްދަތުގައި ފިތުރު ޒަކާތް ބަހައިފައިވާ ކަމަށެވެ.
