ލާމަރުކަޒީ ނިޒާމު ކާމިޔާބުވާނީ ކައުންސިލްތަކާއި ސަރުކާރުން އެކުގައި ކުރާ މަސައްކަތުން: މިނިސްޓަރ އިމްރާން
ލާމަރުކަޒީ ނިޒާމުގެ ކާމިޔާބީ ގުޅިފައިވާނީ ކައުންސިލްތަކާއި ސަރުކާރުން ގުޅިގެން ކުރެވޭ މަސައްކަތުން ކަމަށް ހޯމް މިނިސްޓަރ އިމްރާން ޢަބްދުﷲ ވިދާޅުވެއްޖެއެވެ.
އަލަށް ހުވާކުރި ކައުންސިލަރުންނާއި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ މެމްބަރުން މަޤާމަށް އަހުލުވެރިކުރުމަށް ހިންގާ އޮރިއެންޓޭޝަން ޕްރޮގްރާމް ފެށުމުގެގޮތުން ވަރޗުއަލްކޮށް ކުރިއަށް ދިޔަ ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވިދާޅުވީ ރަށުގައި ހިމެނޭ ދައުލަތުގެ އެހެން މުއައްސަސާތަކާ ރަށުގެ އިސްވެރިންނާއި ޖަމިއްޔާ ޖަމާޢަތްތަކާ ކައުންސިލްތަކާ ގުޅިގެން މަސައްކަތް ކުރުމުން މެނުވީ އެ ނިޒާމުން ރައްޔިތުންނަށް ފޯރުކޮށްދޭން ޖެހޭ އެންމެ މަތިވެރި ޚިދުމަތްތަކާއި ފޮނިމީރުކަން ލިބިގެން ނުދާނެކަން އެއީ ޤަބޫލުކުރަން ޖެހޭ ހަޤީޤަތެއް ކަމަށެވެ.
އަދި މިނިސްޓަރު ވަނީ ކުރީ ފަހަރުތަކުގައި ކައުންސިލްތަކަށް މަދު ދުވަސްކޮޅެއްގެ ތެރޭގައި މަސައްކަތްކުރުމަށް ދަތިވެ އުނދަގޫވެގެން ދިޔަ ފަދައިން މިފަހަރު އެކަން ތަކުރާރު ނުކުރުމަށް ކައުންސިލަރުންނަށް އިލްތިމާސްކޮށްފައެވެ.
މީގެ އިތުރުން މިނިސްޓަރ އިމްރާން ވިދާޅުވީ، ކައުންސިލްތަކުން ޤާނޫނުތަކާއި ޤަވާއިދުތަކަށް އަހުލުވެރިވެ، ރައްޔިތުންނާ ގާތުން މަސައްކަތްކޮށް، ސަރުކާރާ ގުޅިގެން ރައްޔިތުންނަށް ޚިދުމަތް ދިނުމަކީ ވަރަށް މުހިއްމުކަމެއް ކަމަށެވެ.
