ފުލޫ ކުލިނިކަށް ދެއްކި ބަޔަކު ފައްސިވެ، އދ. އޮމަދޫ ވެސް މޮނިޓަރިންއަށް
މިމަހުގެ 21 ވަނަ ދުވަހު އދ. އޮމަދޫ ސިއްހީ މަރުކަޒުން ނެގި ސާމްޕަލްތަކެއް ފައްސިވެ، ކޮންޓެކްޓް ޓްރޭސިންގެ ކަންކަން ނިމެންދެން އެ ރަށް މޮނިޓަރިންއަށް ލައިފިއެވެ.
އެރަށު ފުލޫ ކުލިނިކުން ނެގި ސާމްޕަލްތަކުގެ ތެރެއިން މިހައިތަނަށް ނަތީޖާ ލިބުނު 3 ސާމްޕަލް ފައްސިވެފައިވާ އިރު އަދި ނަތީޖާ ނުލިބޭ ސާމްޕަލްތަކެއް ވެސް އެބަހުއްޓެވެ.
ރަށުގެ ޙާލަތު ދެނެގަތުމަށް ރެންޑަމް ސާމްޕަލް ނަގަން ޖެހިއްޖެ ޙާލަތެއްގައި ސާމްޕަލް ނެގުމަށާއި ކޮންޓެކްޓް ޓްރޭސިން ހެދުމަށް ރައްޔިތުންގެ އެހީތެރިކަން ދިނުމަކީ ސިއްހީ މަރުކަޒުގެ ވަރަށް ބޮޑު އެދުމެކެވެ.
ކޮވިޑް 19ގެ ބާނިތައް ރާއްޖޭގެ ހުރިހާ ހިސާބަކަށް ފޯރައިފައިވާއިރު މިހާތަނަށް 70އަށް ވުރެ ގިނަ ރަށްރަށް އޮތީ މޮނިޓަރިންގައެވެ. ބަލީގެ ސަބަބުން ރާއްޖެއިން މީހުން މަރުވާ އަދަދު ވެސް ދުވަހެއް ދުވަހަކަށް ދަނީ އިތުރުވަމުންނެވެ. ވެރިރަށް މާލޭގައި ވެސް ހަލުވި ކަމާއެކު ބަލި ދަނީ ފެތުރެމުންނެވެ. އިއްޔެ ވެސް ރާއްޖެއިން 1،559 މީހުން ކޮވިޑަށް ފައްސި ވެފައިވެއެވެ.
އެޗްޕީއޭގެ ހިސާބުތަކުން ދައްކާ ގޮތުގައި މިހާރު ރާއްޖެއިން ކޮވިޑް-19އަށް މުޅިއަކު ފައްސިވެފައި ވަނީ 55،924 މީހުންނެވެ. ބަލިން ފަސޭހަވެފައި ވަނީ 32،322 މީހުންނެވެ. އަދި މި ބަލީގައި ރާއްޖެއިން މިހާތަނަށް 129 މީހުން ނިޔާވެފައި ވެއެވެ.
