މާލޭގެ ބިންތަކާއި މާރުކޭޓު ގޮޅިތަކުގެ ކުލި ކުޑަކޮށްފި
މާލެ ސިޓީ ކައުންސިލުން ކުއްޔަށް ދީފައިވާ ބައެއް ބިންތަކުގެ ކުލި ކުޑަ ކުރަން ނިންމައިފިއެވެ.
މާލޭގެ މޭޔަރު ޑރ. މުހައްމަދު މުއިއްޒު ވިދާޅުވީ ކޮވިޑް-19 ގެ މި ހާލަތާ ގުޅިގެން މާލެ ސިޓީ ކައުންސިލުން ކުއްޔަށް ދީފައިވާ ގޮޅިތަކާއި ބިންތަކުން ކުއްޔަށް މިހާރު ނަގަމުންދާ އަދަދުން 30 އިންސައްތަ ކުޑަ ކުރަން ސިޓީ ކައުންސިލުން ނިންމާފައިވާ ކަމަށެވެ
މީގެ އިތުރުން މުއިއްޒު ވިދާޅުވީ ކޮވިޑްގެ ހާލަތުގައި ރައްޔިތުންނަށް ލިބެމުންދާ ގެއްލުންތައް ކުޑަކޮށްދިނުމުގެ ގޮތުން ކުލި ކުޑަކުރަން ނިންމާފައިވާއިރު މި ހާލަތުން އަރައިގަނެވެންދެން ކުއްޔަށް ގެނައި ބަދަލު ދެމި އޮންނާނެ ކަމަށެވެ.
"ކޮވިޑްގެ މިކަންކަން ނޯމަލް ވަންދެން ކުއްޔަށް މިގެނައި ބަދަލުގައި ދެން ކުރިއަށް ދާނީ. އާންމު ހާލަތަކަށް ދިޔައީމާ އަލުން އެ ކުލިތައް ރިވައިސް ކުރާނަން،" މުއިއްޒު ވިދާޅުވިއެވެ.
މާލޭގެ މޭޔަރުކަމުގެ ހުވާ ކުރެއްވުމަށް ފަހު މުއިއްޒު ވަނީ މާލޭގައި ހުންނަ ލޯކަލް މާރުކޭޓާއި މަސް މާރުކޭޓުގެ އިތުރުން، ދަތުރުވެރިންގެ މާރުކޭޓަށް ވެސް ޒިޔާރަތްކޮށްފައެވެ. މުއިއްޒު ވިދާޅުވީ އެ މާރުކޭޓްތަކަށް ޒިޔާރަތް ކުރައްވާ އެތަންތަނުގެ ހާލަތު ބެއްލެވި ކަމަށާއި އެ ތަނުގައި ތިއްބެވި ފަރާތްތަކުގެ ކަންބޮޑުވުންތައް އަޑު އައްސަވާފައިވާނެ ކަމަށެވެ.
މާލޭގެ އައު ސިޓީ ކައުންސިލުން ވަނީ ޕާކިން ސްލޮޓްތަކުގެ ކުލި ވެސް 3000 ރުފިޔާއިން 750 ރުފިޔާއަށް ކުޑަކޮށްދީފައެވެ.
ޝުކުރިއްޔާ.