ރައީސްއާ އެކު ބޭއްވުނީ ބިނާ ކުރުވަނިވި ބައްދަލުވުމެއް: މޭޔަރު މުއިއްޒު
ރައީސުލް ޖުމްހޫރިއްޔާ އިބްރާހިމް މުހައްމަދު ސޯލިހާއެކު މިއަދު ބޭއްވުނީ ބިނާ ކުރުވަނިވި، އުއްމީދީ ބައްދަލުވުމެއް ކަމަށް މާލެސިޓީގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސާއެކު ބޭއްވި ބައްދަލު ވުމަށްފަހު ކުރެއްވި ޓުވީޓެއްގައި މޭޔަރ މުއިއްޒު ވިދާޅުވީ މިއަދު ބައްދަލުވުމުގައި ރައީސް ދެއްވީ އުއްމީދީ ޖަވާބުތަކެއް ކަމަށެވެ. އެ ބައްދަލުވުމަކީ މާލޭގެ ރައްޔިތުންގެ ކަންބޮޑުވުންތައް އެ މަނިކުފާނާ ހިއްސާ ކުރެއްވުމަށާއި ކަންކަން ތަންފީޒު ކުރުމުގައި ބޭނުންވާ އެހީތެރިކަން ހޯއްދެވުމަށް ބޭއްވެވި ބައްދަލުވުމެއް ކަމަށް މޭޔަރ ވިދާޅުވިއެވެ.
މާލެ ސިޓީގެ މޭޔަރއާއި ރައީސުލް ޖުމްހޫރިއްޔާގެ ބައްދަލުވުމާ ބެހޭގޮތުން ރައީސް އޮފީހުން ވިދާޅުވީ، މާލެއަކީ އަމާން ތަނަކަށް ހެދުމަށް އެޅެން ހުރި ފިޔަވަޅުތަކާ ބެހޭގޮތުން އެ ދެ ބޭފުޅުން މަޝްވަރާ ކުރެއްވި ކަމަށާއި ސަރުކާރާ ގުޅިގެން ކަންކަން ކުރިއަށް ގެންދަން ބޭނުންވާ ކަމަށާއި ސަރުކާރަށް އެއްބާރުލުން ދެއްވާނެ ކަމަށް މޭޔަރ މުއިއްޒު ވިދާޅުވި ކަމަށެވެ.
މިމަހުގެ 17 ވަނަ ދުވަހު މާލެ ސިޓީގެ މޭޔަރ ކަމުގެ ހުވާ ކުރެއްވި ޑރ. މުއިއްޒުއަކީ ރަައީސް ޔާމީނުގެ ވެރިކަމުގައި ހައުސިން މިނިސްޓަރެވެ.
