"ފްރެންޑްސް: ދަ ރީޔޫނިއަން" ކަމު ދިޔަތަ؟
"ފްރެންޑްސް: ދަ ރީޔުނިއަން". މިހަފްތާ އަދި ކުރިޔަށް އޮތް މަހުގެ ވެސް 'ހޮޓް ޓޮޕިކް' އެވެ. މިހާތަނަށް އެންމެ ބޮޑު މަގުބޫލު ކަމެއް ހޯދި ސިޓްކޮމްގެ ޝަރަފު ހޯދި "ފްރެންޑްސް" ގެ އާ އެޕިސޯޑެއް އެތައް އަހަރެއް ފަހުން ކުރީގެ ކާސްޓުންނާ އެކު ގެނެސްދީފައިވާ އިރު، މިހާރު އުފެދޭ އެންމެ ބޮޑު ސުވާލަކީ މި އެޕިސޯޑް ކަމު ދިޔަ ހެއްޔެވެ؟
1994-2004އަށް ގެނެސްދިން ފްރެންޑްސް ސީރީޒަކީ ދިވެހިންގެ ތެރޭގައި ވެސް ވަރަށް ބޮޑު މަޤްބޫލު ކަމެއް ހޯދާފައިވާ ސީރީޒްއެކެވެ. އަދި އެ މުއްދަތުގެ ތެރޭގައި 10 ސީޒަނަކަށް، 236 އެޕިސޯޑް ގެނެސްދިނެވެ.
އެޗްބީއޯ މެކްސްއިން މި ސީރީޒް ޕްރިމިއަރ ކުރި އިރު، ގިނަ ދިވެހިން ތިބީ މި ސީރީޒް ބެލުމަށް ކެތް މަދުވެފައެވެ. އިންޑިއާގެ އެންމެ މަގުބޫލު ސްޓްރީމިން ޕްލެޓްފޯމްތަކުގެ ތެރޭގައި ހިމެނޭ ޒީ5އިން ވެސް މި އެޕިސޯޑް ސްޓްރީމް ކުރެއެވެ.މި ދެ ޕްލެޓްފޯމަކީ ވެސް ރާއްޖެއަށް އެކްސެސް އޮންނަ ޕްލެޓްފޯމެއް ނޫނެވެ. އެހެން ނަމަވެސް ފްރެންޑްސްގެ ގިނަ ފޭނުންތަކެއް ވަނީ ވީޕީއެން މެދުވެރިކޮށް މި އެޕިސޯޑް ބަލައިފައެވެ.
ފްރެންޑްސް ރީޔޫނިއަންގައި، ފްރެންޑްސްގައި އުޅޭ މައިގަނޑު 6 ރަހްމަތްތެރިން ފެނިގެންދެއެވެ. އެއީ ޖެނިފާ އެނިސްޓަން، ލީސާ ކުޑްރޯ، ކޯޓްނީ ކޮޒް، މެޓް ލީ ބްލޭންކް، މެތިއު ޕެރީ އަދި ޑޭވިޑް ޝްވިމާއެވެ. މީގެ އިތުރަށް މި ޝޯގައި ލޭޑީ ގާގާ، ޖަސްޓިން ބީބާ، ޑޭވިޑް ބެކަމް، ކިޓް ހެރިންޓަން އަދި މަލާލާ ޔޫސުފް ޒާއީ ފަދަ މަޝްހޫރު މީސްމީހުން ވެސް ފެނިގެން ދިޔައެވެ. މިއީ 2004 ވަނަ އަހަރު ފަހުން ފްރެންޑްސްގެ ހުރިހާ ކާސްޓުން އެއް ސްކްރީނަކުން ފެނިގެން ދިޔަ ފުރަތަމަ ފަހަރެވެ.
މުނިފޫހިފިލުވާ ޚަބަރުތައް ގެނެސްދޭ މީޑިއާތަކުން ރިޕޯޓްތައް ބުނާ ގޮތުން އައު އެޕިސޯޑްގެ ތަރިންނަށް ވަނީ ވަރަށް ބޮޑު އަގެއް ދީފައެވެ. މިގޮތުން ބައެއް މީޑިއާތަކުން ބުނީ މި އެޕިސޯޑަށް ކޮންމެ ތަރިއަކަށް 2.5 މިލިއަން ޑޮލަރު ދީފައިވާ ކަމަށެވެ. އަދި ތަރިއަކަށް 3 ނުވަތަ 4 މިލިއަން ޑޮލަރު ދީފައިވާކަމަށް ވެސް ބައެއް މީޑިއާތައް ބުނެއެވެ.
Ads by STO
