މާލޭ ރައްޔިތުންނަށް ހާއްސަ ކޮށްގެން ހަދާ ފްލެޓަށް ކުރިމަތިލުން ފަސްކޮށްފި
މިސަރުކާރުގެ ފުރަތަމަ ހައުސިން މަޝްރޫއުއަށް ކުރިމަތިލުމަށް ހުޅުވައިލުން ފަސްކޮށްފިއެވެ.
މާލޭގެ ރައްޔިތުންނަށް ހާއްސަ ކޮށްގެން މި ސަރުކާރުން ކުރިއަށް ގެންދަން ނިންމި، ބޯހިޔާވަހިކަމުގެ މަޝްރޫއަށް ކުރިމަތިލުމުގެ ފުރުސަތު މި މަހު ހުޅުވައިލާނެ ކަމަށް ހައުސިން މިނިސްޓަރު މުހައްމަދު އަސްލަމް ކުރިން ވިދާޅުވި ނަމަވެސް މިހާރު ހަލުވިކަމާ އެކު ފެތުރެމުންދާ ކޮވިޑް ބައްޔާ ހެދި އެ މަަސައްކަތް ވަނީ ފަސްވެފައެވެ.
މާލޭގައި ބޯހިޔާވަހިކަމަށް ކޮންމެހެން ވެސް ބޭނުން ޖެހިފައިވާ 5،600 އާއިލާ ތިބި ކަމަށް މިނިސްޓްރީން ހެދި "ހައުސިން ނީޑް އެސެސްމަންޓް" އިން ދައްކާކަމަށް މިދިޔަ އޭޕްރީލް މަހު ބޭއްވި ނޫސްވެރިންގެ ބައްދަލުވުމެއްގައި މިނިސްޓަރ އަސްލަމް ވަނީ ވިދާޅުވެފައެވެ. އަދި އެމީހުންނަށް ހާއްސަކޮށްގެން ބޯހިޔާވަހިކަމުގެ މަޝްރޫއެއް ކުރިއަށް ގެންދަން ނިންމައި، އެ ފްލެޓްތަކަށް ކުރިމަތިލާން މި މޭ މަހު ހުޅުވައިލާނެ ކަމަށް އެ ބައްދަލުވުމުގައި އަސްލަމް ވިިދާޅުވިއެވެ.
އެހެން ނަމަވެސް ޕްލޭނިން އެންޑް ހައުސިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީން އޮންލައިން މީޑިޔާއަަކަށްމައުލޫމާތު ދެއްވަމުންވިދާޅުވި ގޮތުގައި، ކުރިން ރޭވި ގޮތަށް އެ މަޝްރޫއަށް ކުރިމަތިލާން މި މަހު ހުޅުވައި ނުލެވުނީ ކޮވިޑް-19 ގެ ސަބަބުން ދިމާވި ދަތިތަކާ ހެދި އެވެ. އަކްރަމް ވިދާޅުވި ގޮތުގައި ބޯހިޔާވަހި ކަމުގެ މަޝްރޫއަށް ކުރިމަތިލާން ހުޅުވާލަން ނިންމައިފައި ވަނީ ފްލެޓްތަކުގެ ފައުންޑޭޝަން އެޅި ކުރިއަށް ދާން ފެށުމުންނެވެ.
ސަރުކާރުން އަލަށް އިމާރާތްކުރަން ހަމަޖެހިފައިވާ ފުލެޓުތަކަށް ޝަރުތު ހަމަވާނީ 600 އަކަފޫޓު ހަމަވާ ގޯއްޗެއް މާލޭގައި ނެތް މީހުން ކަމަށް ކުރިން އަސްލަމް ވިދާޅުވިއެވެ. އަދި އެއީ މާލޭގައި ރަޖިސްޓަރީ ވެފައިވާތާ 15 އަހަރު ވެފައިވާ މީހުންނަށް ވާން ޖެހޭނެ ކަމަށާއި އާއިލާގެ ކުޑަބޮޑުމިނާއި ދިރިއުޅުމުގެ ހާލަތު ވެސް ބަލާނެ ކަމަށް އަސްލަމް ވިދާޅުވެފައިވެއެވެ.
މިސަރުކާރުން ހައުސިން މަޝްރޫއެއްގެ އަމަލީ މަސައްކަތެއް އަދި ފަށައިފައެއް ނުވެއެވެ. ނަމަވެސް ކުރީ ސަރުކާރުން އަޅައިފައިވާ ހިޔާ މަޝްރޫއުގެ ފްލެޓް ލިބުނު މީހުންގެ ލިސްޓް އަލުން މުރާޖަޢާކޮށް ފްލެޓް ލިބޭނެކަމަށް ކަނޑައެޅި މީހުންގެ އާ ލިސްޓެއް ވަނީ ނެރެފައެވެ.
Ads by STO
