ބުރަ މަސައްކަތުން އެއްކުރި ލާރިކޮޅު ދިޔައީ އަނދައިގެން ، ހޯރަފުށި މި ބިދޭސީ މީހާގެ ދެ ލޯ ކަރުނުން ފޯވެއްޖެ
ރާއްޖޭގައި އުޅޭ ގިނަ ބިދޭސީންނަކީ އިންތިހާއަށް ބުރަ މަސައްކަތް ކުރާ ބައެކެވެ. އަމިއްލަ ވަޒަން ދޫކޮށް ރާއްޖެ އަންނަނީ، ޤައުމުގައި ތިބި އާއިލާ މީހުންގެ ކަންކަން ރަނގަޅަށް ބެލެހެއްޓުމަށް ފައިސާ ހޯދުމަށް ޓަކައި އެކިއެކި މަސައްކަތް ކުރާށެވެ.
ހއ.ހޯރަފުށި ރޯޝަނީގޭ އަޙުމަދުފުޅުގެ ކޮއްކޮ ކަލޭފާނު ތުއްތު ބަލަހައްޓަން ގެނެސްފައި ހުރި ބިދޭސީ މީހެއް ކަމުގައިވާ ސުހައިލުއަކީ ވެސް އެފަދައިން ރާއްޖެ އައި މީހެކެވެ. ބުރަ މަސައްކަތުން ލިބުނު ފައިސާކޮޅު އެއްކޮށްފައި ރައްކާ ކޮށްފައި ހުރީ އޭނާގެ އަންނައުނު ލައިގެން ގެންގުޅުނު ފޮށީތެރޭގައެވެ.
ނަމަވެސް މިއަދު އެ ގޭގަައި ހިނގި އަލިފާނުގެ ހާދިސާގައި، އޭނާގެ އަންނައުނުކޮޅުގެ އިތުރުން އެހާ ދުވަސް ވަންދެން އެއްކުރި ފައިސާކޮޅު ވެސް ވަނީ ބޭނުން ނުކުރެވޭ ވަރަށް އަނދައިފައެވެ.
މި ހާދިސާގެ މައުލޫމާތު "ދެން"އާ ހިއްސާ ކުރަމުން ހޯރަފުށީ ކައުންސިލުގެ ނައިބު ރައީސް އަހުމަދު އިމްދާހް ވިދާޅުވީ އެ ބޭފުޅުން ވެސް އޮފީހުގައި ތިބެފައި އެ ގެއާ ދިމާލަށް ދިޔައީ ދުން އަރާތީ ކަމަށެވެ.
" ދިޔައިރު ގޭ އެތެރޭގައި ކޮންމެވެސް ވަރަކަށް އަލިފާން ރޯވެފައި ހުރީ. އަޅުގަނޑުމެންނަށް ބޮޑަށް ލަފާ ކުރެވޭ ގޮތުގައި އަލިފާން ރޯވީ، ކަރަންޓު ޝޯޓެއް ވެގެން" އިމްދާހް ވިދާޅުވިއެވެ.
ކައުންސިލު ނައިބު ރައީސް ވިދާޅުވީ މި ހާދިސާ ހިނގީ މިއަދު މެންދުރު ކުރީގެ ވަގުތެއްގައި ކަމަށާއި ފުލުހުން އެ ހާދިސާ އިތުރަށް ބައްލަވަމުން ގެންދަވާ ކަމަށެވެ.
އިމްދާހް އިތުރަށް ވިދާޅުވި ގޮތުގައި، އެ ގޭގައި މިދުވަސްކޮޅު ދިރިއުޅެނީ އެ ބިދޭސީ މީހާ އެކަންޏެވެ. އަލިފާނުގެ މި ހާދިސާގެ ސަބަބުން އޭނާ ގެންގުޅޭ އެހެން ބައެއް ތަކެތި ވެސް ހަލާކުވެފައިވާ ކަމަށް އިމްދާހް ވިދާޅުވިއެވެ.
"ސުހައިލްގެ މުދަލާއި ފައިސާއަށް ގެއްލުން ވެފައިވުމުން އޭނާއަށް ދޭން ޖެހޭ އެއްބާރުލުން ކައުންސިލުން ދަނީ ދެމުން. އޭނާގެ ފައިސާއާއި މުދާތަކުގެ ކަންތަކުގައި ސުހައިލަށް ބަދަލެއް ދެވެން އޮތްނަމަ އެކަމުގައި އަޅުގަނޑުމެން ފުލުހުންނާ އެކު މި މަސައްކަތް ކުރަނީ" ކައުންސިލު ނައިބު ރައީސް ވިދާޅުވިއެވެ.
ރޯވި އަލިފާންގަނޑު ނިއްވާލީ ކައުންސިލު ހުރިހާ މެމްބަރުންނާ، ކައުންސިލު ރައީސްއާއި، މުއައްސަސާތަކުގެ އިސްވެރިންނާ، ފުލުހުންނާއި އާންމު ރައްޔިތުންގެ އެހީތެރިކަމާ އެކުކަން ވެސް ހޯރަފުށީ ކައުންސިލު ނައިބު ރައީސް ފާހަގަ ކުރެއްވިއެވެ.
އެމް.އެމް.އީ އިން ހަލާކުވާ ފައިސާ ބަދަލުކޮށްދޭ.
ހީޔެއްނުވޭ ހަލާކުވެގެންތިދިޔަ ފައިސާކޮޅު އަނބުރާލިބޭނެހެނެއް.އެހެންމިބުނީ އަހަރެންގެ އަތުން ހަމަތިގޮތައް ހަލާކުވި ފައިސާވެސް ބަދަލު ނުލިބޭނެކަމަށް ބެންކުންއެންގީ،ފައިސާގައި އެއްވެސްކަހަލަ އުނިއިތުރުކަމެއް ހުރެގެން ފައިސާ ބަލައިނުގަނެވޭނެކަމައް،އަލިފާނުގެ ހާދިސާތައް ހާއްސަކޮއް އެމީހުން ބުނީބަލައިނުގަނެވޭނެ ކަންތައްކަމުގައި. އުއްމީދަކީ ބޮންދުއަށް އޭތި ރިކަވާވުން އަދި އެމަގު އޭނައަށް ފަހިކޮއްދިނުން. «ފަންކާ»