ސަރުކާރުގެ ފަރުވާކުޑަ ކަމުން އެތައް ފުރާނައެއް ގެއްލިއްޖެ: އިދިކޮޅު

ކޮވިޑް ކޮންޓްރޯލު ކުރުމަށް އަދުގެ ސަރުކާރުން ނުކުޅެދި، ފަރުވާ ކުޑަވުމުގެ ސަބަބުން އެތައް ފުރާނައެއް ގެއްލިގެން ގޮސްފައިވާ ކަމަށާއި އެ ކަންކަން ތަހުގީގު ކޮށް ރައްޔިތުންނަށް ޖަވާބުދާރީ ވުމަށާއި، ސަރުކާރުގެ އިސް މަގާމުތަކުގައި ތިއްބެވި ބޭފުޅުން އިސްތިއުފާ ދެއްވުމަށް އިދިކޮޅު ޕްރޮގްރެސިވް ކޯލިޝަނުން ގޮވައިލައިފިއެވެ.

Ads by STELCO

އެ ކޯލިޝަނުން މިއަދު ނެރުނު ނޫސް ބަޔާނެއްގައި ބުނެފައިވަނީ، ކޮވިޑް ބަލީގައި ރާއްޖެއިން މަރުވާ މީހުންގެ އަދަދު މައްޗަށް ދާއިރު ވެސް ސަރުކާރުން އެކަންކަމަށް ސަމާލުވެ ކަންކަން ރަނގަޅު ކުރުމަށް މަސައްކަތް ނުކުރާ ކަމީ އެ ކޯލިޝަނުން ކަންބޮޑުވާ ކަމެއް ކަމަށެވެ. އަދި މިފަދަ މަރުތަކުގައި ސަރުކާރުގެ ފަރުވާކުޑަކަމާއި އިހުމާލު ބޮޑުކަން ފާހަގަކޮށް އެ ބަޔާނުގައި ބުނެފައި ވަނީ، އުމުރުން 10 އަހަރުގެ މިޝްކާ އާއި ގއ. ދާންދޫ ވިނަމަތި، މަރްޔަމް އިބްރާހީމް ވަކިވެދިއުމަކީ ވެސް އެފަދަ އިހުމާލުގެ ނަތީޖާ ކަމަށެވެ.

އެގޮތުން އަލްމަރްހޫމާ މަރްޔަމް އިބްރާހީމްގެ ހާލު ބޮޑުވެގެން އިމަޖެންސީގައި މާލެ ގެނެވުނު އިރު ވެސް އޭނާއަށް ފަރުވާ ދިނުމަށް ފްލައިޓަށް އެރުވުނު ވެންޓިލޭޓަރުގެ ބެޓެރި ޗާޖު ހުސްވެ ވެންޓިލޭޓަރުގެ މަސައްކަތް ހުއްޓުމާ ގުޅިގެން މަރްޔަމްއަށް ފަރުވާ ދެވިފައި ވަނީ އަތުން ޕަންޕުކޮށްގެންކަން އާއިލާއިން ހާމަ ކުރި ކަމަށް އެ ބަޔާނުގައި ބުނެފައި ވެއެވެ.

ކޯވިޑްގެ އެންމެ ނުރައްކާތެރި ހާލަތަށް ވެސް ތައްޔާރުވެފައިވާ ކަމަށް ވިދާޅުވެފައިވާ ސަރުކާރުން އިމަޖެންސީގައި ހާލު ބޮޑު މީހަކު ފްލައިޓަކަށް އަރުވާ އިރު ފަރުވާއަށް ބޭނުންވާ އާލަތްތައް ހަމަކުރެވިފައި ނުވުމަކީ އެ ކޯލިޝަނުން ހިތާމަ ކުރާ ކަމެއް ކަމުގައި އެ ބަޔާނުގައި ވަނީ ފާހަގަ ކޮށްފައެވެ.

މީގެ އިތުރުން ސަރުކާރުގެ ފަރުވާ ކުޑަކަމާއި އިހުމާލުގެ އަގު ދިވެހި ރައްޔިތުން ދައްކަން ޖެހެނީ ކިތައް ފުރާނައިންތޯއާއި މިކަމުގައި ފަރުވާތެރިވެ ރައްޔިތުންގެ ފުރާނައަށް އިސްކަންދީގެން މަސައްކަތްކުރާކަށް ނުވޭތޯ ބަޔާނުގައި ސުވާލު ކޮށްފައި ވެއެވެ.

އަދި ކޮވިޑް ފެތުރުން މަދު ކުރުމުގައި ފިޔަވަޅުތައް ހަރުކަށި ކުރުމުގެ ބަދަލުގައި ހަރުދަނާ ފިޔަވަޅުތަކެއް އެޅުމަށް އެ ބަޔާނުގައި ގޮވައިލައިފައިވެއެވެ.ކޮވިޑް ފެތުރެމުންދާ ރަށްރަށުގައި ފަރުވާއަށް ބޭނުންވާ އެންމެހާ ކަންކަން ފުރިހަމަ ކުރާނީ ހިތާމަވެރި ކިތައް ހާދިސާއަށް ފަހުތޯ ވެސް އެ ކޯލިޝަނުން މިއަދު ނެރުނު ބަޔާނުގައި ސުވާލުކޮށްފައިވެއެވެ.