ޓެކްސް ދައްކަން ޖެހޭ ސުންގަޑި އަނެއްކާ ވެސް ފަސް ކޮށްފި

ކޮވިޑް-19އާ ގުޅިގެން މާލެ ސަރަހައްދުގައި އަޅައިފައިވާ ފިޔަވަޅުތަކުގެ ސަބަބުން ޓެކްސް ފައިސާ ދައްކަން ޖެހޭ ސުންގަޑި އަނެއްކާ ވެސް ފަސް ކޮށްދީފިއެވެ.

Ads by STELCO

މީރާއިން މީގެ ކުރިން ވެސް ވަނީ ޓެކްސް ދައްކަން ޖެހޭ ސުންގަޑި އަންނަ ބުރާސްފަތި ދުވަހަށް ފަސްކޮށްދީފައެވެ. ނަމަވެސް މިހާރު ސުންގަޑީގެ ގޮތުގައި ކަނޑައަޅައިފައި ވަނީ މި އަހަރުގެ އޮގަސްޓް މަހުގެ 31 ވަނަ ދުވަހެވެ. މީގެ އިތުރުން މި އަހަރަށް ހުށަހަޅަން ޖެހޭ ފުރަތަމަ އިންޓެރިމް ބަޔާން ހުށަހެޅުމާއި އިންޓެރިމް ފައިސާ ދެއްކުމުގެ ސުންގަޑި ވެސް މީރާއިން ވަނީ ފަސްކޮށްދީފައެވެ. އެގޮތުން އެ ފައިސާ ދެއްކޭނެ ސުންގަޑިއަކީ މި އަހަރުގެ ސެޕްޓެމްބަރު މަހުގެ 30 ވަނަ ދުވަހުއެވެ.

މީރާގެ ގިނަ ޚިދުމަތްތައް އޮންލައިންކޮށް ފޯރުކޮށްދޭއިރު، ޖީއެސްޓީ ބަޔާނާއި އިންކަމް ޓެކްސް އިންޓަރިމް ބަޔާން ހުށަހެޅުމާއި ފައިސާ ދެއްކުމަކީ އޮންލައިންކޮށް ހޯދޭ ހިދުމަތްތަކެކެވެ. މީގެ އިތުރުން ޖީއެސްޓީ ސުން ބަޔާން ހުށަހަޅަން ޖެހޭ ފަރާތްތަކަށް ވާރު ޕޭ ނުވަތަ މީރާ މޮބައިލް އެޕްލިކޭޝަން މެދުވެރިކޮށް ބަޔާން ހުށަހެޅޭނެއެވެ.

ފަހު ވަގުތަށް މަޑުނުކޮށް ޓެކްސް ބަޔާނާއި ފައިސާ ދެއްކުން އަވަސްކުރަން މީރާއިން އިލްތިމާސްކުރެއެވެ.