ދީނާ ދެކޮޅު ފިކުރުތައް ފަތުރާ މީހުން ޙިމާޔަތް ކުރެވޭ ބިލަށް އިންކާރުކުރަން: ޢިލްމުވެރިންގެ ގުޅުން
ދީނާ ދެކޮޅު ފިކުރުތައް ފަތުރާ މީހުން ޙިމާޔަތް ކުރެވޭ ގޮތަށް ހުށައަޅާ ބިލަށް ޢިލްމުވެރިންގެ ގުޅުމުން އިންކާރުކޮށްފިއެވެ.
އެ ޖަމްއިއްޔާއިން މިއަދު ނެރުއްވި ބަޔާނެއްގައި ވިދާޅުވެފައި ވަނީ މީގެ އެއް މަސް ކުރިން (6 މެއި 2021 ވީ ބުރަސްފަތި ދުވަހު) ، އިސްލާމް ދީނާ ދެކޮޅު ފިކުރުތައް ފަތުރާ މީހުން ދައުލަތުގެ ބާރުވެރި މަޤާމުތަކަށް ލުމާއި، އެބައިމީހުން ބާރުވެރި ކުރުވުމާ ދެކޮޅަށް ޢިލްމުވެރިންގެ ގުޅުމުގެ ފަރާތުން ބަޔާން ނެރެ، ނުރައްކާތެރިކަމާއި ގެއްލުން ބަޔާންކޮށް، ނަޞޭޙަތްތެރިވެފައި ވަނިކޮށް، އަނެއްކާ ވެސް ފެނިގެން މިދިޔައީ، 26 މެއި 2021 ވީ ދުވަހު "ނަފްރަތުގެ ޢަމަލުތަަކަކީ ޖިނާއީ ކުށެއްގެ ގޮތުގައި ކަނޑައެޅުން" މި ނަމުގައި ޤާނޫނު ނަންބަރު 2014/9 (ދިވެހިރާއްޖޭގެ ޤާނޫނުލްޢުޤޫބާތު)އަށް ބަދަލުތަކެއް ގެންނަން މަސައްކަތް ކުރެވެމުން ދާ މަންޒަރު ކަމަށެވެ.
މި ބަދަލުތަކުގެ ސަބަބުން އިސްލާމް ދީނާ ދެކޮޅު ފިކުރުތައް ފަތުރަން މަސައްކަތްކުރާ ފަރާތްތައް ޙިމާޔަތްވެ، އޭގެ ބަދަލުގައި އެފަދަ ފަރާތްތަކާ ދެކޮޅަށް ޙައްޤު ބަސް ފާޅުކުރާ އަދި އެފަދަ ފަރާތްތަކުގެ ނުރައްކާތެރިކަމާ މެދު ބަހެއް ބުނާ ކޮންމެ ފަރާތްތަަކަށް ބޮޑެތި ފިޔަވަޅު އެޅި ޤާނޫނީ ގޮތުން ހަރުކަށި އަދަބުތަކެއް ލިބިގެން ދާނެ ކަމަށް ވެސް ޢިލްމުވެރިންގެ ގުޅުމުން ވިދާޅުވެފައިވެއެވެ.
ޢިލްމުވެރިންގެ ގުޅުމުން އިތުރަށް ވިދާޅުވީ، އިސްލާމް ދީނުގެ ޙިމާޔަތުގައި ދިވެހިރާއްޖޭގައި ހެދިފައި ހުރި ހަރުދަނާ އެތައް ޤާނޫނެއް، އެ ހުރި ތަނެއްގައި އަތް ނުލައި ބެހެއްޓުމަށް ފަހު، ދީނާ ޚިލާފަށް ކަންކަން ކުރާ މީހުންނާއި، ދީނުގެ ހަމަތަކާއި އުޞޫލުތަކަށް ފުރައްސާރަކުރާ ފަރާތްތަކާ މެދު އެ ޤާނޫނުތައް އެއްވެސް މިންވަރަކަށް ތަންފީޛު ނުކުރާ ހިނދުގައި، އެ ފަދަ ފަރާތްތަކާ މެދު އެއްވެސް ތަޙްޤީޤެއް ޛިންމާދާރު ގޮތެއްގައި ކުރިއަށް ނުގޮސް ހުއްޓިފައި އޮންނަ އޮތުމަކީ، މިހާރު ހުށައެޅިގެން އުޅޭ ބިލާ މެދު ދިވެހި ރައްޔިތުންގެ ހިތްތަކުގައި އުފެދިފައިވާ ޝައްކުތައް ޔަޤީނަށް ބަދަލުވާން އެޅެމުންދާ ބާރެއް ކަމުގައެވެ.
"ހަމައެއާއެކު، އިސްލާމް ދީނާ ޚިލާފު ޖަރީމާއެއް ހިންގުމުން، އެއީ ކޮންކަހަލަ ނިޔަތެއްގައި ކުރި ކަމެއް ތޯ ބަލަން ޖެހޭ ގޮތަށް ޤާނޫނު ހެދުމަށް ފަހުގައި، ދީނާ ދެކޮޅަށް ހިންގާ ޖަރީމާތަކަށް އިންކާރުކޮށް އެކަމާ ދެކޮޅަށް އަޑު އުފުލާ މީހުން އެ އަޑުއުފުލީ ކޮން ނިިޔަތަކާ ލައިގެންތޯ ނުބަލައި، އެ ޖަރީމާތަކަށް އިންކާރު ކުރި ފަރާތްތަކަށް ސީދާ ވަގުތުން އަދަބު ދޭން ޖެހޭ ގޮތަށް ޤާނޫނު ހަދަން ބަންޑާރަ ނައިބު ކުރައްވަމުން ގެންދަވާ މަސައްކަތް، އެންމެ ހަރުކަށި ޢިބާރާތުން ކުށްވެރި ކުރަމެވެ. އަދި އެކަމަކީ މިހާރުން މިހާރަށް ހުއްޓައިލާން ޖެހޭ ވަރަށް ބޮޑު ފަސާދައެއް ކަމުގައި ދަންނަވަމެވެ." ޢިލްމުވެރިންގެ ގުޅުމުން ވިދާޅުވެފައިވެއެވެ.
މީގެ އިތުރުން، މި މައްސަލައިގައި ރައްޔިތުންގެ ނުރުހުމާއި ޝަކުވާތައް ކުރިމަތިވާން ފެށުމުން، 1 ޖޫން 2021 ވަނަ ދުވަހު ބަންޑާރަ ނައިބު ނެރުއްވާފައިވާ ބަޔާންގައި، އިސްލާމް ދީނާ މެދު ހިނގަމުން ދާ ކަންކަން އެއީ ކުށެއްކަން އިތުރަށް ސާފުވާނޭހެން ބަޔާންކޮށް ޤާނޫނު އިޞްލާޙު ކުރުމުގެ މަސައްކަތް ވެސް ކުރަމުން ދާ ކަމަށް ވިދާޅުވެފައިވާ ކަމަށާއި ނަމަވެސް ބަޔާންކޮށްފައިވާ ވާހަކަތަކަކީ، މިހާރު ވެސް ޤާނޫނުގައި ހުރި ވާހަކަތަކެއް ކަމުގައި ވާތީ، ބަންޑާރަ ނައިބުގެ އެބަޔާނަކީ ޤާނޫނަށް މިހާރު ހުށައެޅިފައިވާ އިފްސާދުގެ މައްސަލައިގެ ހޫނުކަން ފިލުވާލައި ރައްޔިތުންގެ އުދާސްތައް ހިހޫ ކުރުމަށް ޓަކައި ދިވެހި ރައްޔިތުންގެ ލޮލުގައި އެޅުއްވި އަނދުނެއް ކަމުގައި އެ ޖަމްއިއްޔާއިން ވަނީ ސިފަކުރައްވާފައެވެ.
