މަސްތުވާތަކެތި ނަގާ ޒުވާނުންގެ އަތުގައި ހިފައި އެމީހުންނަށް ތެދުމަގު ހޯދައިދޭން އެންމެން މަސައްކަތް ކުރަންޖެހޭ: ޑރ ޝަހީމް
މަސްތުވާތަކެތި ބޭނުންކުރާ ޒުވާނުންގެ އަތުގައި ހިފައި އެމީހުންނަށް ތެދުމަގާއި ހެޔޮ ގޮތް ހޯދައިދޭން ފަރުދުންނާއި މުޖުތަމަޢާއި މުއައްސަސާތަކުގެ ފެންވަރުގައި މަސައްކަތް ކުރަން ޖެހޭ ކަމަށް ޑރ.މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޑރ. ޝަހީމް ވިދާޅުވީ މަސްތުވާތަކެތި ބޭނުންކުރުން ފަދަ ޢަމަލުތައް ﷲ ގެ ގެކޮޅުތަކުގައި ހިނގިޔަ ނުދިނުމަށް ޓަކައި އިދާރާތަކުން ހަރުދަނާ ފިޔަވަޅު އަޅަންޖެހޭ ކަމަށާއި މަސްތުވާތަކެތި ބޭނުން ކުރާ ޒުވާނުންގެ އަތުގައި ހިފައި އެމީހުންނަށް ތެދުމަގާއި ހެޔޮ ގޮތް ހޯދައިދީ އެއަށް ފަހު، ވަޒީފާގެ ފުރުޞަތާއި ބާއްޖަވެރި ދިރިއުޅުމެެއް ފަހިކޮށް ދިނުމަށް ފަރުދުންނާއި މުޖުތަމަޢާއި މުއައްސަސާތަކުގެ ފެންވަރުގައި މަސައްކަތްކުރަން ޖެހޭ ކަމަށެވެ.
މިސްކިތްތަކުގައި މަސްތުވެ، އެއްޗެހި ދޮވެ އަދި ނިދުން ފަދަ މިސްކިތް ބޭނުން ކުރުން އެކަށޭނަ ނޫން އެހެން ކަންކަމުގައި މިސްކިތް ބޭނުން ކުރާ ކަމުގެ ޝަކުވާ ތަކުރާރުކޮށް ފުލުހުންނަށް ލިބެމުންދާ ކަމަށް ފުލުހުން ވިދާޅުވެފައިވާއިރު މިކަމަށް އިޝާރަތް ކުރައްވާ ޑރ. ޝަހީމް މިރޭ ކުރެއްވި ޓްވީޓެއްގައި ވިދާޅުވީ މިސްކިތްތަކަަކީ ނުހަނު މަތިވެތި ޤަދަރެއް ދެވިގެންވާ ﷲގެ ގެކޮޅުތައް ކަމަށާއި މަސްތުވާތަކެތި ބޭނުންކުރުން ފަދަ ޢަމަލުތައް ﷲ ގެ ގެކޮޅުތަކުގައި ހިނގިޔަ ނުދިނުމަށް ޓަކައި އިދާރާތަކުން ހަރުދަނާ ފިޔަވަޅު އަޅަންޖެހޭ ކަމަށެވެ.
"މަސްތުވާތަކެތީގެ ޝިކާރައަކަށް ޒުވާނުން ވެގެން ދިޔަ ނުދިނުމަށް ޓަކައި ކަމާ ބެހޭ އިދާރާތަކުން އެކަށީގެންވާ މަސައްކަތްތަކެއް ކުރަން ޖެހޭ. އެހެން ނޫން ނަމަ މުސްތަޤުބަލުގައި ޤައުމު ހިތާމަވެރި ފުން ވަޅުގަނޑަކަށް ވެއްޓުމުގެ ބިރު އެބަ އޮތް." ޑރ.ޝަހީމް މިރޭ ކުރެއްވި ޓްވީޓްގައި ވިދާޅުވިއެވެ.
މިސްކިތްތަކުގައި މަސްތުވެ، އެއްޗެހި ދޮވެ އަދި ނިދުން ފަދަ މިސްކިތް ބޭނުން ކުރުން އެކަށޭނަ ނޫން އެހެން ކަންކަމުގައި މިސްކިތް ބޭނުން ކުރާ ކަމުގެ ޝަކުވާ ތަކުރާރުކޮށް ފުލުހުންނަށް ލިބެމުންދާ ކަމަށާއި ކޮންމެ ރެޔަކު ވެސް ފުލުހުން މިސްކިތްތަކަށް ގޮސް، މިސްކިތްތައް ބަލައި އެގޮތަށް މިސްކިތް ބޭނުން ކުރާ މީހުން ފޮނުވައިލުމުގެ އިތުރުން ފުލުހުންގެ ބެލުމުގެ ދަށަށް ގެނެވޭ ހާލަތްތަކުގައި މައްސަލަ ތަހުގީގު ކުރަމުން ގެންދާ ކަމަށް ފުލުހުން މިއަދު ވަނީ ވިދާޅުވެފައެވެ.
