ފްލައިން ސްކޫލް ހިންގުމަށް 13 ފަރާތަކުން ޝައުގުވެރިވެއްޖެ
ރާއްޖޭގައި ފްލައިން ސުކޫލެއް ހިންގުމަށް މި ޖޫން މަހުގެ 1 ވަނަ ދުވަހު ހުޅުވައިލި ފުރުސަތަށް 13 ފަރާތަކުން ޝަައުގުވެރިކަން ފާޅުކޮށްފައިވާކަމަށް އައިލެންޑް އޭވިއޭޝަނުން ވިދާޅުވެއްޖެއެވެ.
ރާއްޖޭގައި ފްލައިން ސްކޫލު ހިންގުމަށް ކުރިމަތިލައިފައިވާ ފަރާތްތަކުގެ ތެރޭގައި އެމެރިކާއާއި، މެދު އިރުމައްޗާ، ޔޫރަޕްގެ ޤައުމުތަކުގެ އިތުރުން ރާއްޖޭގެ ކުންފުންޏެއް ވެސް ހިމެނޭ ކަމަށާއި އެއީ މިހާރު ވެސް ފްލައިން ސްކޫލުތައް ހިންގައި ފަރާތެއްކަމަށް އައިލެންޑް އޭވިއޭޝަނުން ވިދާޅުވެއެވެ. އަދި މި 13 ކުންފުނި އިވެލުއޭޓް ކުރުމުގެ މަސައްކަތް މިހާރު ކުރަމުންދާ ކަމަށް މައުލޫމާތު ލިބެއެވެ.
ރާއްޖޭގައި ފްލައިން ސްކޫލު ހިންގާނީ އެކަމަށް ހާއްސަ ކޮށްގެން އުފައްދާ ސަބްސިޑަރީ ކުންފުންޏަކުން ކަމަށާއި، އެތަން ހިންގާނީ މިނިވަންކަމާ އެކު ކަމަށް އައިލެންޑް އޭވިއޭޝަނުން ވިދާޅުވިއެވެ.
ރާއްޖޭގައި މިހާރު އޮޕަރޭޓް ކުރާ ފްލައިން ސުކޫލުގައި 170 ދަރިވަރުން ކިޔަވަމުންދެއެވެ. އެސުކޫލާ ގުޅޭ ގޮތުން ގިނަ ޝަކުވާތަކެއް ދަނީ ކުރަމުންނެވެ. މިގޮތުން އެތަނުގައި ކިޔަވައިދެމުން އަންނަ 170 އަށްވުރެ ގިނަ ދަރިވަރުންނަށް ބޭނުންވާ ވަރަށް މުދައްރިސުން ނެތުމާއި ފްލައިންގެ ގަޑި ހަމަ ކުރުމަށާއި ކިޔެވުމުގައި ބޭނުން ކުރާނެ ބޯޓު ނެތުމުގެ މައްސަލަތައް ހިމެނެއެވެ.
މިޝަކުވާތައް މީގެކުރިން ވަނީ ކަމާބެހޭ ފަރާތްތަކަށް ވެސް އެކި ފަހަރުމަތިން ހުށައަޅައިފައެވެ. އަދި އައްޑޫ ފްލައިން ސްކޫލުގައި ކިޔަވަމުންދާ ދަރިވަރުންގެ ހައްގުތަކަށް ތަކުރާރުކޮށް އަރައިގަންނަމުންދާތީ އެ ސްކޫލް 35،000 ރުފިޔާއިން ޖޫރިމަނާކޮށް އަނެއްކާ ވެސް ކަންކަން އިސްލާހު ކުރުމަށް ވަނީ އިތުރު ފުރުސަތެއް ދީފައެވެ.
