ދެ މަސްފަހުން ނައިފަރަށް ހަމަނޭވާ ލެވިދާނެ ކަމުގެ އުއްމީދުގައި
މޮނިޓަރިންގައި އޮންނަތާ ދެ މަސް ދުވަސްވާން ކައިރިވެފައިވާއިރު، ރަށުގެ ހާލަތު ރަނގަޅުވެ ނައިފަރު އާއްމު ހާލަތަކަށް ދިޔުމުގެ އުއްމީދު އާވެފައިވާކަމަށް އެރަށު ކައުންސިލުން ވިދާޅުވެއްޖެއެވެ.
ނަައިފަރު ކައުންސިލްގެ ރައީސް މުހައްމަދު ރަޝީދު "ދެން"އަށް މައުލޫމާތު ދެއްވަމުން ވިދާޅުވީ ރަށަށް އަރައިފޭބުން މަނާ ނަމަވެސް އެހެން ފިޔަވަޅުތައް އުވައިލައިފައިވާ ކަމަށެވެ. އަދި ރަށުން މި ޖޫން މަހުގެ 8 ވަނަ ދުވަހު ވަކި ތަރުތީބެއް ނެތި ނެގި ސުންކުތަކުން ފައްސިވެފައި ވަނީ އެންމެ ސުންކެއް ކަމަށް ވެސް ރަޝީދު ވިދާޅުވިއެވެ.
"8 ވަނަ ދުވަހު ނެގީ އެންމެ ސާމްޕަލެއް. އެޗްޕީއޭއިން ވިދާޅުވީ އެންމެފަހުން ޕޮޒިޓިވްވި ރެންޑަމް ސާމްޕަލް ޕޮޒިޓިވް ވިތާ 14 ދުވަސް ފަހުން މޮނިޓަރިންއިން ނަގާނެކަމަށް. ދެން އެހެންވީމަ އަޅުގަނޑުމެން މި އުއްމީދު ކުރަނީ މި މަހުގެ 23 ވަނަ ދުވަހު މޮނިޓަރިންއިން ނެގޭނެ ކަމަށް" ރަޝީދު ވިދާޅުވިއެވެެ.
ރަށުގެ ހާލަތުގެ އާއްމުގޮތެއްގައި ރަނގަޅު ކަމަށާއި އެހެން ނަމަވެސް މިހާ ދުވަހު ބަންދުގައި ތިބުމުގެ ސަބަބުން ރައްޔިތުންގެ މާލީ ހާލަތު ދަށަށް ގޮސްފައިވާކަމަށް ރަޝީދު ވިދާޅުވިއެވެ.
"އަޅުގަނޑުމެން އެދެނީ ސަރުކާރުން ރައްޔިތުންނަށް މާލީ އެހީތެރިކަން ކުޑަ ނަމަވެސް އެހީއެއް ދިނުމަށް. ދެން އަޅުގަނޑުމެންގެ އެމްޕީވެސް މިހާރު އެމަސައްކަތް ކުރަމުންދަނީ. ކަރަންޓު ބިލާއި ފެން ބިލުން ކުޑަ ނަމަވެސް ލުއި އެއްލިބިގެން ދިޔުމަކީ އުއްމީދުކުރާ ކަމެއް" ރަށުގެ ހާލަތާ ބެހޭ ގޮތުން ރަޝީދު ކިޔައި ދެއްވިއެވެ.
ކައުންސިލުން ދަނީ ރައްޔިތުންނަށް އެހީތެރިކަން ފޯރުކޮށްދެމުން ކަމަށާއި އެ ގޮތުން ޒަރޫރީ ކާބޯތަކެތި ފޯރުކޮށްދެމުންދާކަމަށް ކައުންސިލްގެ ރައީސް މައުލޫމާތު ދެއްވައެވެ. މީގެ އިތުރުން ވެސް ގޭތެރޭގައި ކުރަން ޖެހޭ ކަރަންޓް މަސައްކަތްތައް ފަދަ މަސައްކަތްތައް ކޮށްދެނީ ކައުސިލުންކަމަށް ރަޝީދު ވިދާޅުވިއެވެ.
އިތުރަށް ވާހަކަ ދައްކަވަމުން ރަޝީދު ވިދާޅުވީ ރަށުގެ ރައްޔިތުން ވަރަށް ކިޔަމަންތެރިކަމަށާއި ވަރަށް ކެތްތެރިކަމަށެވެ. އަދި ދެން ވެސް ދިމާވާ މިފަދަ ހާލަތްތަކުގައި ރައްޔިތުންގެ ފަރާތުން މިހާރު ވެސް ލިބެމުންދާ އެއްބާރުލުން ލިބޭނެކަމަށް އުއްމީދު ކުރައްވާކަމަށް ވެސް ނައިފަރު ކައުންސިލްގެ ރައީސް ވިދާޅުވިއެވެ.
ނައިފަރު މޮނިޓަރިންގައި އޮންނަތާ 86 ދުވަސް