ހޯމްސްޓޭ ޓުއަރިޒަމުން ރާއްޖޭގެ ޓުއަރިޒަމް ދާއިރާ ފުޅާވާނެ: ޖީއޭއެމް
ހޯމްސްޓޭ ޓުއަރިޒަމް ރާއްޖެއަށް ތައާރަފްވުމަކީ ރާއްޖޭގެ ޓުއަރިޒަމް ދާއިރާ ފުޅާވުމަށް އެޅޭނެ މުހިންމު ފިޔަވަޅެއް ކަމުގައި ދެކޭ ކަމަށް ގެސްޓްހައުސް އެސޯސިއޭޝަން އޮފް މޯލްޑިވްސް (ޖީއޭއެމް) އިން ބުނެފިއެވެ.
ޖީއޭއެމުން މިއަދު ނެރުނު ބަޔާނެއްގައި ބުނެފައި ވަނީ ހޯމްސްޓޭ ޓުއަރިޒަމް ރާއްޖެއަށް ތައާރަފްވުމަކީ ރާއްޖޭގެ ޓުއަރިޒަމް ދާއިރާ ފުޅާވުމަށް އެޅޭނެ މުހިންމު ފިޔަވަޅެއް ކަމުގައި އެ އެސޯސިއޭޝަނުން ދެކުން ކަމުގައި ވިޔަސް، ހޯމްސްޓޭ ތައާރަފުކުރަން މި ހާލަތުގައި މިއީ އެންމެ ރަނގަޅު ވަގުތުތޯ ވިސްނައިލުން ނުހަނު މުހިންމު ކަމަށެވެ.
އެގޮތުން ދުނިޔެއަށް ކުރިމަތިވެފައިވާ ކޮވިޑް-19 ގެ ސަބަބުން ޓުއަރިސްޓުން އައުން މަދުވެ މުޅި ޓުއަރިޒަމް ސިނާއަތަށް ހީނަރުކަމެއް އައިސް، މި ސިނާއަތަށް ބޮޑެތި އިންވެސްޓުތައްކޮށް ޚިދުމަތް ދެމުންދާ ރިސޯޓުތަކާއި އަދި ގެސްޓްހައުސްތަކަށް ކުރިމަތިވެފައިވާ މާލީ ގޮންޖެހުންތަކުން އަރައިގަތުމަށް ނުހަނު ގިނަ ދަތިތަކާ ކުރިމަތިވެފައިވާ ކަމަށް ޖީއޭއެމުން ބުނެފައިވެއެވެ.
"އާމްދަނީ ލިބުން ދަތިވެފައިވާ މި ދަނޑިވަޅުގައި، ޓޫރިޒަމް ސިނާއަތުގައި މަސައްކަތް ކުރަމުން އަންނަ މަސައްކަތްތެރިންގެ ވަޒީފާގެ ކަށަވަރުކަން ދަމަހައްޓާ ދިނުމާއި، ގެސްޓްހައުސްތައް ދެމެހެއްޓެނިވި ގޮތަކަށް ހިންގާ ބެލެހެއްޓުން މިވަނީ ނާޒުކު ފައްތަރެއްގައި" ޖީއޭއެމްގެ ބަޔާނުގައިވެއެވެ.
ޖީއޭއެމުން އިތުރަށް ބުނީ ގެސްޓްހައުސްތައް މިހާތަނަށް އެކަށީގެންވާ ގޮތެއްގައި އިޝްތިހާރު ކުރެވިފައި ނުވުމަކީ، މި ސިނާއަތަށް ހަމަ އަގު ހޯދުމަށް ދަތިވެ، ޤަބޫލުކުރެވޭ މިންވަރަށް އޮކިއުޕެންސީ ދެމެހެއްޓުމަށް ނުކުޅެދިފައިވާ ހާލު ބަޔާންކޮށްދޭ ހަގީގަތެއް ކަމަށެވެ.
"މިކަމުގެ ސަބަބުން ގެސްޓްހައުސްތަކުގެ އާމްދަނީ ދަށްވުމީ މި ސިނާއަތާ ސީދާ ގުޅުންހުރި ކުދިވިޔަފާރިތަކަށް މީގެ ނޭދެވޭ އަސަރުކޮށް މާލީ ގޮތުން ގެއްލުންވަމުންދާ ކަމެކެވެ" ޖީއޭއެމްގެ ބަޔާނުގައި އިތުރަށް ބުނެފައިވެއެވެ.
އެ އެސޯސިއޭޝަންގެ ބަޔާނުގައި އިތުރަށް ބުނެފައި ވަނީ މި ހާލަތަކީ ރާއްޖޭގައި އުފެދިފައިވާ ގެސްޓްހައުސްތަކާއި، ސީދާ އަދި ނުސީދާ ގޮތުން ގުޅިފައިވާ ކުދި ވިޔަފާރިތައް ކޮޅަށް ޖެހުމަށް ނުހަނު ގިނަ މަސައްކަތާއި އެހީތެރިކަން ނިހާޔަތަށް ބޭނުންވެފައިވާ ވަގުތެއް ކަމަށެވެ.
