އަނެއްކާ ވެސް "ބަލައި ފާސް ކުރުމުގެ ތެރެއިން" މީހަކަށް ސީރިއަސް އަނިޔާތަކެއް ކުރި ކަމުގެ ތުހުމަތު!
ހުއްދަ ނޫން އެއްޗެހިތަކެއް އެތެރެ ކުރާކަމަށް ބުނެ، ތިލަފުއްޓަށް ދިޔަ މީހަކަށް ފުލުހަކު ވަރަށް ބޮޑަށް އަނިޔާ ކުރި ކަމަށާއި އަނިޔާތަކުގެ ސަބަބުން އެ މީހާއަށް މިވަގުތު އައިޖީއެމްއެޗްގައި ފަރުވާދެމުން އަންނަ ކަމަށް މައުލޫމާތު ލިބިއްޖެއެވެ.
މި ހާދިސާ ދިމާވި ލ. ގަން މަތިމަރަދޫ/ ބުލްބުލާގެ މުޙައްމަދު ނޫރައްދީން (39އ.) "ދެން" އަށް މައުލޫމާތު ދެމުން ބުނީ އޭނާއަކީ ތިލަފުށީގެ ލޭންޑިންގ ކްރާފްޓްގެ ކައްޕިއެއްގެ ގޮތުގައި މަސައްކަތް ކުރާ މީހެއް ކަމަށާއި މި މަހުގެ 18 ވަނަ ދުވަހު 14:00ގެ ފެރީން އޭނާ ތިލަފުއްޓަށް ދިޔައީ ޑިއުޓީއަށް ދާން ކަމަށެވެ.
"އެހެން ބޯޓެއްގައި އުޅޭ އަޅުގަނޑުގެ ތިމާގެ ލާމު އަތޮޅު ކުއްޖަކު އޭނަގެ އަންހެނުންނަށް ފޮނުވަން ވެގެން ކޮސްމެޓިކްސް ގަނެފައި ފޮނުވީ. އަޅުގަނޑު އަތުގައި އެ ކޮތަޅު އޮތް. އަޅުގަނޑު އޭތި ހިފައިގެން ފެރީ އިން ފައިބައިގެން ގޮސް ތަންކޮޅަކަށް ނުދެވެނީސް ކުލަ ހެދުމުގައި ހުރި ދެ ފުލުހަކު އައިސް އަޅުގަނޑު ހުއްޓުވި. އެ ދެބޭފުޅުން އަޅުގަނޑު ގޮވައިގެން ދިޔައީ ތިލަފުށީ ޕޮލިސް ސްޓޭޝަނަށް. ގެންގޮސްފައި ބުނީ ހުއްދަ ނޫން އެއްޗެހިތަކެއް އެތެރެކުރާ ކަމުގެ މައުލޫމާތު ލިބިގެން ބަލައިފާސް ކުރަންވެގެންނޭ. އަޅުގަނޑު ބުނިން މައްސަލައެއް ނެތޭ ބަލާށޭ" ނޫރައްދީން ކިޔައިދިނެވެ.
ނޫރައްދީން ބުނީ ކޮތަޅުގައި ހުރި އެއްޗެހި މޭޒުމަތީގައި ބަހައްޓަން ބުނުމުން ކޮތަޅުގައި ހުރި ހުރިހާ އެއްޗެއް ވަކިވަކިން ނަގައި މޭޒުމަތީގައި އެތުރި ކަމަށެވެ، އޭގެ ތެރޭގައި ހުރީ ފައުންޑޭޝަނާއި، ލޯޝަނާއި ކޮންޑިޝަނާއާއި އަންހެނުން ބޭނުން ކުރާ ކަހަލަ ރީތިވާ ސާމާނު ކަމަށް ވެސް ނޫރައްދީން ބުންޏެވެ. އޭނާ އިތުރަށް ބުނީ ރީތިވާ ސާމާނުތައް ބެހެއްޓުމުން، އޭނާގެ ޖީބުގައި ހުރި ހުރިހާ އެއްޗެއް ނަގައިފައި ބަައްޓަން ވެސް ބުނި ކަމަށެވެ. އެކަން ވެސް ކުރުމުން އެތަނުގައި ތިބި ތިން ފުލުހުންގެ ތެރެއިން އެކަކު ގޮސް ނޫރައްދީނުގެ ޖީބަށް އަތް ކޮށްޕާފައި ވަރަށް އަނިޔާވެރިކޮށް އޭނާ ޗެކް ކުރަން ފެށި ކަމަށް އޭނާ ބުންޏެވެ.
"އަޅުގަނޑު ބުނިން ތަދުވެޔޭ އެބަ، އަނިޔާ ނުކޮށްބަލާށޭ. އަޅުގަނޑު ނުދަމެއް ނޫންހޭ އެއްވެސް ތަނަކަށް، ޗެކް ކުރަން ދައްކައިގެނެއް ނޫންހޭ މިހުރީ. ބުނީމަ އަޅުގަނޑާ ދިމާލަށް ހަޑިހުތުރު އެއްޗެހި ކިޔާފައި ބުނީ އަޅުގަނޑަކަށް ނޫނޯ އެނގޭނީ ބަލާފާސް ކުރާނެ ގޮތެއް" ނޫރައްދީނަށް ދިމާވި ކަންތަކުގެ ތަފްސީލު 'ދެން' އާ ހިއްސާ ކުރަމުން އޭނާ ކިޔައިދިނެވެ.
ނޫރައްދީން ބުނީ އެ ފުލުސް މީހާ އޭނާގެ ކަންކަށިމަތީގައި ވަރަށް ބާރަށް އެ ވަގުތު ޖެހި ކަމަށާއި ތަދުވި ވަރުން ތަޅުންގަނޑުމަތީގައި އުޑުފައިން އިށީނި ކަމަށެވެ. އަދި ވީ ތަދުން އޭނާއަށް ރޯން ފެށުނު ކަމަށް ވެސް ނޫރައްދީނު ބުންޏެވެ.
"ރޯން ފެށީމަ ފައިން ޖަހާ ވައްޓައިލައިފައި އުނަގަނޑުމަތީގައި ފައިން ގާތްގަނޑަކަށް 12 ވަރަކަށް ފަހަރު ޖެހި ބޫޓުން. އަޅުގަނޑަށް ހަމަ ގިސްލަގިސްލާފައި ރޮވުނު. ރޯން ފެށުނީމަ ހަމަ މިހާރު އަޑު ކަނޑާލާށޭ ކިޔާފައި އެތަނުގައި އިން ކުޑައެއްގެ ލަކުނޑި މުއްގަނޑުން އަޅުގަނޑުގެ ކުރިމަތިފަރާތުގައި ޖެހީ. އޭގެން ޖެހީމަ އަޅުގަނޑުގެ ހެޔަށް ގޮތްވީ. އަޅުގަނޑަށް ހަޅޭ ލަވައިގަނެވުނީމަ އެ ކޮޓަރިން ބޭރުގައި ތިބި ފުލުހުން ވެސް އައިސް ވަން." ނޫރައްދީން ކިޔައިދިނެވެ.
އަނިޔާވެފައިވާ މީހަކު ކަމުގައި ވަންޏާ، އެ މީހަކަށް ތަދު އިހުސާސު ކުރެވެންޏާ ރޮވޭނެއްނު ކިތަންމެ ވަރަކަށް ނުރޯށޭ ބުންޏަސް؟ އެހެން ބުނެފަ ވެސް އަނިޔާކުރީ. ކުރިމަތި ފަރާތުގައި ވަރަށް ތެޅި އަދި ކަރުގައި ވެސް ހިފި
ނޫރައްދީނު ބުނީ އަނިޔާ ކުރުމަށް ފަހު "ކޮތަޅަށް އެއްޗެހިތައް އަޅައިގެން ރައްކާވާށޭ" އެ ފުލުސް މީހާ އޭނާއާ ދިމާލަށް ބުނެ ކޮށްޕާ ވައްޓައިލި ކަމަށާއި ލިބިފައި ހުރި އަނިޔާތަކާއި އަޅަމުން ދިޔަ ވޭނުގެ ސަބަބުން ވަރަށް ހާލުން ކޮތަޅަށް އެއްޗެހިތައް އަޅައިގެން ފިރުކެމުން ފާރުގައި ހިފަހައްޓައިގެން އެ ތަނުގައި ހުރި އެހެން ފިރިހެން ކުއްޖެއްގެ އެހީތެރިކަމުގައި އެތަނުން ނުކުތް ކަމަށެވެ.
އެވަގުތަކީ ތިލަފުށީ ދަތުރުތައް ވެސް ނެތް ވަގުތަކަށްވުމާ އެކު އަމިއްލަ ޚަރަދުގައި ލޯންޗެއް ކުއްޔަށް ހިފައިގެން މާލެ އައިސް މިވަގުތު އައިޖީއެމްއެޗްގައި ފަރުވާ ހޯދަމުންދާ ކަމަށް ވެސް ނޫރައްދީން ބުންޏެވެ.
"ކުރިމަތިފަރާތަށް ލިބުނު އަނިޔާތަކުގެ ސަބަބުން އަދިވެސް ކުޑަކަމު ނުދެވޭ އެ ދުވަހުން ފެށިގެން. ކިތަންމެ ވަރަކަށް ފެން ބުޔަސް ނުދެވޭ. ޑޮކްޓަރު ވެސް ބުނި އެހެންވެގެންނޭ އެ ކުޑަކަމު ނުދެވެނީ. މިހާރު އެހެންވެ އުޅެނީ ހީސްލައްވަން ހޮޅި ގުޅަން" ނުހަނު ވޭނާ އެކު ނޫރައްދީން ބުންޏެވެ.
މި މައްސަައިގައި އަޅުގަނޑަށް އިންސާފު ހޯދަން ދެވުނު ކޮންމެ ތަނަކަށް އަޅުގަނޑު އިންސާފު ހޯދަން ދާނަން. އަޅުގަނޑު ފަހަތަކަށް ނުޖެހޭނަން. ރައީސުލް ޖުމްހޫރިއްޔާގެ އޮފީހަށް ވެސް ހުރިހާ ލިޔުންތައް ލާނަން. ފުލުހުންނަކީ ރައްޔިތުންނަށް ހިމާޔަތާއި ރައްކާތެރިކަން ދޭނެކަމަށް ބުނެ ތިބޭ ބައެއް، މިއީ ތޯ ދެއްވާ ރައްކާތެރިކަމަކީ؟ އަޅުގަނޑު އިންސާފު ބޭނުން!
ނޫރައްދީނަށް ލިބުނު އަނިޔާތަކާ ގުޅޭގޮތުންނާއި ފުލުހުންގެ މައްޗަށް އުފުލިފައި މިވާ ތުހުމަތާ ގުޅޭގޮތުން "ދެން"އަށް މައުލޫމާތު ދެއްވަމުން ފުލުހުންގެ މީޑިއާ އޮފިޝަލަކު ވިދާޅުވީ ތިލަފުށި ޕޮލިސް ސްޓޭޝަނަށް ހާޒިރުކުރި މީހަކަށް އަނިޔާ ކޮށްފައިވާ ކަމަށް ތުހުމަތުކޮށް މީސް މީޑިއާގައި ކޮށްފައިވާ ޕޯސްޓެއް ފުލުހުންގެ ސަމާލުކަމަށް އައުމާ ގުޅިގެން ޕްރޮފެޝަނަލް ސްޓޭންޑާޑްސް ކޮމާންޑުން އެކަމާ ގުޅިގެން ބަލަން ޖެހޭ ކަންކަން ބަލަމުން ދާ ކަމަށެވެ. އަދި އެފަދަ ކަމެއް ހިނގާފައިވާ ނަމަ އެކަމާ ގުޅިގެން އަޅަން ޖެހޭ ފިޔަވަޅު އަޅާނެ ކަމަށް ވެސް ފުލުހުން ވިދާޅުވެފައިވެއެވެ.
ހެޔޮނުވާނ ނިކަމެތިރައްޔިތުންނަށްމިހެނ ހަދަނ. އެމީހާމުޅިއުމުރަށްއުޅެންޖެހޭނ މިވޭނުގ ނިކަމެތިންގެހައްގެއްނޯންނާނެ
ރައްޔިތުންނުކުމެ ތިކަން ނިމްމަންލަސްވެއްޖެ
އަނިޔާލިބުނު މީހާއަށްލިބުނު އަނިޔާ އަމިއްލަ ޔަށް ތަހައްމަލު ކުރޭ ތިގޮތަށް ކިތަށް މީހުނަށް ތިޔަ ޕޮލިހުން އަނިޔާކޮއްފި އިންސާފުލިބުނު މީހަކު ނެށް ޕޮލިސް އިދާރާއިން ބަޔާން ނެރޭނީ ދޮގު ހަބަރު ފަތުރާކަމަށް މީމިހާތަނަށް ވެފަހުރިގޮތް
ފުލުހުންގެ ތެރޭގައި ގިނައީ ޒާތީވާ ފުލުހުން.
މިހާރު ވަރަށް ބޮޑުވެއްޖެ ކަމެއްތީ، ރައްޔިތުން ނިކުމެ ވެއްޖެ ސައިޒް ކުރަން
ތިއީީ އާމުކަމެންނު
އަބަދުވެސް މިހާލެއްގެ.ފިޔަވަޅު ނޭޅޭތީ މިހެންވަނީ.ފުލުހުންނަށް ހީވާކަހަލަ މާމަތިން އައިސްގެން އުޅޭ ބަޔެކޭ ތިމަންނާމެންނަކީ.ހަރުކަށި އަދަބު ތިމީހުންނަށް ދީގެންނޫނީ މައިތިރިއެއް ނުވާނެ
ތިޔަ ޚަބަރަކީ ތެދު ކަމަށް ވަންޏާ ނޫރައްދީން ބަދަލު ހޯދަން ޖެހޭ އަދި އެ ފުލުސް މީހާ ދިވެހި ހުރިހާ ރައްޔަތުންނަށް އެނގޭ ގިތަށް މީޑިއާ އިނަ ދައްކަން ޖެހޭކަމަށް ދެކެން