ބޮޑު މުސާރަ ލިބޭ ކައުންސިލްތަކުގެ އެސްޖީގެ މަގާމަށް ކުރިމަތިލުމަށް ހުޅުވައިލައިފި
ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ވާގޮތުގެ މަތިން، ސިޓީ ކައުންސިލްތަކާއި އަތޮޅު ކައުންސިލްތަކާއި ރަށު ކައުންސިލްތަކަށް ޖެނެރަލުން އައްޔަން ކުރުމުގެ ގޮތުން އެމަގާމަށް ކުރިމަތި ލުމަށް، ސިވިލް ސާވިސް ކޮމިޝަނުން ހުޅުވައިލައިފިއެވެ.
ސިވިލް ސާވިސް ކޮމިޝަނުން ވިދާޅުވި ގޮތުގައި ސެކްރަޓަރީ ޖެނެރަލްގެ މަގާމަކީ ކައުންސިލް އިދާރާތަކުގެ އިދާރީ އެންމެ މަތީ މަގާމެވެ. އަދި މިމަގާމުގައި ހުންނަވާ ބޭފުޅެއްގެ ޒިންމާގެ ތެރޭގައި ހިމެނެނީ ކައުންސިލްގެ ލަފާގެ މަތިން އެއިދާރާގެ އެންމެހާ އިދާރީކަންކަން ބެލެހެއްޓުމާއި މާލީ ޒިންމާދާރުވެރިޔާގެ މަސްއޫލިއްޔަތު އަދާ ކުރުމެވެ.
މިމަގާމުތަކަށް ކުރިމަތިލާ ފަރާތްތަކުގެ ޝަރުތުތަކުގެ ތެރޭގައި ބެޗެލަސް ޑިގްރީއެއް އޮތުމާއެކު ގުޅޭ ދާއިރާއަކުން 8 އަހަރުގެ ތަޖްރިބާ ހުރުން ނުވަތަ މާސްޓަރސް ޑިގްރީއެއް އޮތުމާ އެކު ގުޅޭ ދާއިރާއަކުން 6 އަހަރުގެ ތަޖުރިބާ ހުރުން ހިމެނެއެވެ. އަތޮޅު ކައުންސިލްތަކުގެ ސެކްރަޓަރީ ޖެނެރަލްގެ މަގާމަށް ކުރިމަތިލާ ބޭފުޅުންގެ ބެޗެލަރސް ޑިގްރީއެއް އޮތުމާ އެކު މަސައްކަތާ ގުޅޭ ދާއިރާއަކުން 6 އަހަރުގެ ތަޖުރިބާ ހުރުން ނުވަތަ މާސްޓަރސް ޑިގްރީއަކާ އެކު ގުޅޭ ދާއިރާއަކުން 4 އަހަރުގެ ތަޖްރިބާ ހުރުން އެއީ ޝަރުތެކެވެ. މީގެ އިތުރުން ރަށު ކައުންސިލްތަކުގެ ސެކްރަޓަރީ ޖެނެރަލްކަމުގެ މަގާމަށް ކުރިމަތި ލައްވާ ބޭފުޅެއް ނަމަ، ބެޗެލަރސް ޑިގްރީއެއް އޮތުމާ އަކާ އެކު ގުޅޭ ދާއިރާއަކުން 4 އަހަރުގެ ތަޖުރިބާ ހުރުން ނުވަތަ މާސްޓަރސް ޑިގްރީއެއް އޮތުމާ އެކު ގުޅޭ ދާއިރާއަކުން 2 އަހަރުގެ ތަޖްރިބާ ހުންނަން ޖެހޭނެކަމަށް ސިވިލް ސާރވިލް ކޮމިޝަނުން ވިދާޅުވެއެވެ.
މިމަގާމުތަކުގެ މުސާރައަށް ބަލާލާއިރު ސިޓީ ކައުންސިލްގެ ސެކްރަޓަރީ ޖެނެރަލްއަކަށް މުސާރައާއި އިނާޔަތްތަކާ އެކު މަހަކު 35500 ރުފިޔާ ލިބޭނެއެވެ. އަދި އަތޮޅު ކައުންސިލް ޖެނެރަލްގެ މުސާރައަށް އިނާޔަތްތަކާ އެކު 21000 ރުފިޔާ ލިބޭނެ ކަމަށާއި ރަށު ކައުންސިލް ޖެނެރަލުންގެ މުސާރާއަށް އިނާޔަތްތަކާ އެކު 16100 ރުފިޔާ މަހަކު ލިބޭނެ ކަމަށް ސިވިލް ސާރވިސް ކޮމިޝަނުން ވިދާޅުވިއެވެ.
މިމަގާމުތަކަށް ކުރިމަތިލުމުގެ ސުންގަޑިއަކީ މި ޖޫންމަހުގެ 28 ވަނަ ދުވަހުގެ ރޭ 23:59 ކަމަށް ސިވިލް ސާވިސް ކޮމިޝަނުން ވިދާޅުވިއެވެ. އަދި މިމަގާމަށް ކުރިމަތިލައްވާ ބޭފުޅުން ސީއެސްސީގެ އޮންލައިން ޕޯޓަލް މެދުވެރިކޮށް ކަމަށާއި މިނޫން ގޮތަކަށް ހުށައަޅާ ފޯމްތައް ބަލައި ނުގަންނާނެ ކަމަށް ސިވިލް ސާވިސް ކޮމިޝަނުން ވިދާޅުވެއެވެ. ސިވިލް ސާވިސް ކޮމިޝަނުންގެ އޮންލައިން ފޯޓަލް އަށް ވަނުމަށް https://myaccount.csc.gov.mv/CouncilSg މިލިންކް ބޭނުން ކުރެއްވުމަށް ސިވިލް ސާރވިސް ކޮމިޝަނުން އެދެއެވެ.
