އައިޖީއެމްއެޗް ލެބޯޓްރީގެ ހިދުމަތް އަލުން ފަށައިފި
މާލެ ސަހަރައްދުގައި ކޮވިޑްގެ ހާލަތު ގޯސްވުމުގެ ސަބަބުން މެދުކަނޑައިލައިފައިވާ، އިންދިރާ ގާންދީ މެމޯރިއަލް ހޮސްޕިޓަލުގެ ލެބޯޓްރީގެ ހިދުމަތް އަލުން ފަށައިފިއެވެ.
މިއަދުން ފެށިގެން ލެބޯޓްރީގެ ހިދުމަތް އަލުން ފަށައިފައިވާ ކަމަށާއި ކުރިއެކޭ ވެސް އެއްގޮތަށް ހެނދުނު 8އިން މެންދުރު ފަހު 2އާ ހަމައަށް އެމަޖެންސީ ނޫން ހާލަތްތަކުގައި ވެސް ފޯރުކޮށްދޭނެކަމަށް އެހޮސްޕިޓަލުން ވިދާޅުވެއެވެ.
”2021 ޖޫން 21 ވާ ހޯމަ ދުވަހުން ފެށިގެން އައި.ޖީ.އެމް.އެޗްގެ ލެބޯޓްރީއިން އިމަޖެންސީކޮށް ހަދާ ޓެސްޓުތައް ފިޔަވައި އެހެނިހެން ޓެސްޓުތަކަށް ކުރިއެކޭ ވެސް އެއްފަދައިން ހެނދުނު 8 އިން މެންދުރު ފަހު 2އާ ހަމައަށް މެދުނުކެނޑި ނަންބަރު ދޫކޮށް ޚިދުމަތް ދެވޭނެ” އައިޖީއެމްއެޗުން ވިދާޅުވިއެވެ.
މިދިޔަ މަހު ރާއްޖޭގެ ކޮވިޑްގެ ހާލަތު ގޯސްވެ މާލެ ސަރަހައްދުގައި އަޅައިފައިވާ ފިޔަވަޅުތައް ވަނީ ހަރުކަށިކޮށްފައެވެ. އެއާ އެކު މަޑުމަޑުން ހާލަތު ރަނގަޅުވެ ދުވާލެއްގެ މައްޗަށް ރިޕޯޓްކުރާ އައު ވޭދަނަތައް މިިހާރު ވަނީ 200އިން ދަށަށް ގޮސްފައެވެ. އަދި މާލެ ސަރަހައްދުން ރިޕޯޓްކުރާ ވޭދަނަތައް މިހާރު އުޅެނީ 100 އިން ދަށުގައެވެ.
ހާލަތު ރަނގަޅުވާން ފެށުމުން މާލެ ސަރަހައްދުގައި އަޅައިފައިވާ ފިޔަވަޅުތަކަށް މިހާރު ވަނީ ލުއި ދީފައެވެ. އަދި ކޮވިޑް-19އަށް ފައްސި ވޭދަނަތައް މަދުވާން ފެށުމާ އެކު މަގުމަތީގެ އެކި ހިސާބުތަކުން ރެންޑަމް ސާމްޕަލް ނަގަން އަލުން ފަށައިފައިވާ ކަމަށް ހެލްތު އިމަޖެންސީ އޮޕަރޭޝަން ސެންޓަރުން ވަނީ ވިދާޅުވެފައެވެ.
Ads by STO
