އަހަރު ނިމޭއިރު ރާއްޖޭގެ އިގްތިސާދު 18 އިންސައްތަ ކުރިއަރާނެ: ފިނޭންސް މިނިސްޓަރު
މި އަހަރު ނިމޭއިރު ރާއްޖޭގެ އިގްތިސާދު 18 އިންސައްތަ ކުރިއަރާނެ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.
ކުދި އަދި މެދުފަންތީގެ ވިޔަފާރިތަކަށް އަމާޒުކޮށް ސަރުކާރުން އާ ސްޓިމިއުލަސް ޕެކޭޖުތަކެއް އިއުލާން ކުރުމަށް ފަހު ރައީސް އޮފީސް މެދުވެރިކޮށް މީޑިއާތަކަށް ފޮނުވި ވިޑިއޯ ކްލިޕެއްގައި މިނިސްޓަރު އަމީރު މިއަދު ވަނީ ކޮވިޑާ ގުޅިގެން ކުރި ހަރަދުތަކާއި، އިގްތިސޯދަށް އައި ލޮޅުމުން އަރައިގަތުމަށް ކުރާ ކަންތައްތައް ފާހަގަކުރައްވައިފައެވެ.
މިނިސްޓަރ ވިދާޅުވީ ކޮވިޑް-19ގެ ސަބަބުން 2020 ވަނަ އަހަރު އިގްތިސޯދު ވަނީ 34 އިންސައްތަ ދަށަށް ގޮސްފައި ކަމަށާއި އެއާއެކު ސަރުކާރުން އަންދާޒާ ކުރި އާމްދަނީ ގާތްގަނޑަކަށް 15 ބިލިއަން ރުފިޔާއިން ދަށަށް ގޮސްފައިވާ ކަމަށެވެ.
މީގެ އިތުރުން މިނިސްޓަރު ވިދާޅުވީ 2021 ވަނަ އަހަރު ވެސް އާމްދަނީއަށް ބޮޑުތަނުން ލޮޅުން އައިސްފައިވާ ކަމަށާއި އެހެންކަމުން ސިއްހީ، އިގްތިސޯދީ އަދި އިޖުތިމާއީ ދާއިރާއަށް ވެސް ރިލީފް ޕެކޭޖުތަކެއް ދެމުންދާ ކަމަށެވެ.
"ކޮވިޑާ ގުޅިގެން މިއައި ލޮޅުމަށް އެހީތެރިވެދިނުމުގެ ގޮތުން ރާއްޖޭގެ އުފެއްދުންތެރިކަމުގެ 6 އިންސައްތަ މިވަނީ ހަރަދު ކޮށްފައި." މިނިސްޓަރ އަމީރު ވިދާޅުވިއެވެ.
ސަރުކާރުގެ އަމާޒަކީ 2019ގައި އޮތް އިގްތިސޯދަށް ވީހާ އަވަހަކަށް ވާސިލުވުމަށް ޓަކައި ކުރެވެން ހުރި ހުރިހާ ހަރަދެއް މިހާރު ކުރަމުން ގެންދިއުން ކަމަށާއި އެގޮތުން ހުރިހާ ރިލީފް ލޯނުތަކުގެ ބޭނުމަކީ ވީހާވެސް އަވަހަކަށް އިގްތިސޯދީ ކާރިސާއިން އަރައިގަނެ، 2019ގައި އޮތް އިގްތިސޯދަށް ދާން މަގުފަހި ކުރުން ކަމަށް ފިނޭންސް މިނިސްޓަރު ވިދާޅުވިއެވެ.
މޮޅުވާހަކަ ނުދައްކާ ރަޢިއްޔަތުން ހަނާވެއްޖެ