ސަރުކާރުން ބޭނުން ވަނީ ތެލަށް ބަރޯސާ ނުވެ، ހަކަތަ އުފައްދާނެ އިތުރު ގޮތްތަކެއް: މިނިސްޓަރ ޝައުނާ
މި ސަރުކާރުން ބޭނުން ވަނީ ތެލަށް ބަރޯސާ ނުވެ، ހަކަތަ އުފައްދާނެ އިތުރު ގޮތްތަކެއް ހޯދުމަށް ކަމަށް މިނިސްޓަރ އޮފް އެންވަޔަރަމެންޓް، ކްލައިމެޓް ޗޭންޖް އެންޑް ޓެކްނޮލޮޖީ އައިޝަތު ޝައުނާ ވިދާޅުވެއްޖެއެވެ.
ހަކަތައިގެ ދާއިރާއަށް ހާއްސަ ކޮށްގެން މިއަދު ބޭއްވި "އެނާޖީ އިންވެސްޓާ ކޮންފަރެންސް 2021" ފެއްޓެވުމުގެ ގޮތުން މިނިސްޓަރު ޝައުނާ ވިދާޅުވީ، ރާއްޖެ މުޅިހެން ބަރޯސާވެފައި ވަނީ އިމްޕޯޓްކުރާ ތެލަށް ކަމަށާއި މި ކަމަށް ދިވެހި ދައުލަތުން ކޮންމެ އަހަރަކު ބޮޑު ހަރަދެއް ވެސް ކުރާ ކަމަށެވެ.
މިއީ ތިމާވެށީގެ ގޮތުން ބެލި ނަމަވެސް އެންމެ ރައްކާތެރި ގޮތް ނޫން ކަމަށް ވެސް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރ ޝައުނާ ވިދާޅުވީ 2019 ވަނަ އަހަރު ރާއްޖެއަށް އެތެރެކުރި ތެލުގެ އަގު ހަތް ބިލިއަން ރުފިޔާއަށް އަރާ ކަމަށާއި މި ތެލުގައި 80 ޕަސެންޓް ބޭނުންކޮށްފައި ވަނީ ކަރަންޓުންގެ ހިދުމަތް ދިނުމަށާއި އޮޑިދޯނިފަހަރަށް ކަމަށެވެ.
"އެހެންވެ މިއީ ދައުލަތުން ބޮޑު ހަރަދެއް ހިނގާ ކަމަކަށް ވެސް ވީމަ ރާއްޖޭގައި ހަކަތަ އުފައްދާނެ އިތުރު ގޮތްތަކެއް ހޯދަންޖެހިފައި މި ވަނީ. މިހާރަށް ވުރެ ފަސޭހަ އަދި ގެއްލުން ކުޑަ ގޮތެއްގައި ހަކަތަ އުފެއްދޭނެ ގޮތެއް ހޯދަންޖެހޭ،" މިނިސްޓަރ ޝައުނާ ވިދާޅުވިއެވެ.
މިނިސްޓަރ ޝައުނާ އިތުރަށް ވިދާޅުވީ ކަރަންޓު އަގުބޮޑުވުމުން ސަރުކާރުން ސަބްސިޑީ ވެސް ދޭންޖެހޭ ކަމަށާއި 2019ގައި ތެލުގެ ސަބްސިޑީ ދިނުމަށް ޓަކައި އެކަނި ވެސް ދައުލަތުން އެއް ބިލިއަން ރުފިޔާ ހަރަދުކޮށްފައިވާ ކަމަށެވެ.
