ހުޅުމާލެ ފޭސް 2ގައި ސީސީޓީވީ ކެމެރާ ހަރުކުރަނީ
ހުޅުމާލެ ފޭސް 2ގައި ސީސީޓީވީ ކެމެރާ ހަރުކުރަން ނިންމައިފައިވާ ކަމަށް ހައުސިން ޑެވެލޮޕްމެންޓް ކޯޕަރޭޝަން (އެޗްޑީސީ)އިން ވިދާޅުވެއްޖެއެވެ.
އެޗްޑީސީން ވިދާޅުވީ ކެމެރާ ހަރުކުރަން ފަށާނީ ހިޔާ ފްލެޓުތައް ހިމެނޭ ސަރަހައްދުން ފަށައިގެން ކަމަށާއި، އެއަށް ފަހު މަގުތަކާއި ޕާކުތަކުގެ އިތުރުން މީހުން ދިރިއުޅޭ ސަރަހައްދުތަކުގައި ކެމެރާ ހަރުކުރަން ހަމަޖެހިފައިވާ ކަމަށެވެ.
ކަމާބެހޭ ފަރާތްތަކަށް ކުށުގެ މައްސަލަތައް ބަލައި ހުއްޓުވުމަށް އޮންނަ މައިގަނޑު ގޮންޖެހުމަކީ އެކަމަށް ބޭނުންވާ ޓެކްނޮލޮޖީއާއި ވަސީލަތްތައް ނުލިބުން ކަމުގައި އެޗްޑީސީން ފާހަގަ ކުރެއްވިއެވެ.
ބޭރުގެ ނުވަ ގައުމަކުން ކޮށްފައިވާ ދިރާސާއަކާ ހަވާލާދީ އެޗްޑީސީން ވިދާޅުވީ، ސީސީޓީވީ ކެމެރާތަކުގެ ސަބަބުން އެތަނެއްގައި 30 އިންސައްތައާއި 40 އިންސައްތައާ ދެމެދުގެ އަދަދަކަށް ކުށްތައް މަދުކުރެވޭ ކަމަށާއި، ކަމާ ބެހޭ ފަރާތްތަކުގެ މަސައްކަތްތައް 20 އިންސައްތައާއި 35 އިންސައްތައާ ދެމެދުގެ މިންވަރަކަށް ހަލުވިވެގެންދާނެ ކަމަށެވެ. އަދި މީގެ ސަބަބުން މީހުން ދިރިއުޅޭ ހިސާބުތަކުގައި 20 އިންސައްތަ ކުށް މަދު ކުރެވޭނެ ކަމުގައި ވެސް އެޗްޑީސީން ވިދާޅުވިއެވެ.
އެޗްޑީސީން ނިންމައިފައި ވަނީ މުޅި ހުޅުމާލޭގައި ސީސީޓީވީ ކެމަރާ ހަރު ކުރުމަށް ފަހު، އެޗްޑީސީގެ ޖީޕީއޯއެން ނެޓްވޯކްގެ ތެރެއިން ހުރިހާ ކެމަރާއެއް ގުޅައިލުމަށެވެ. އަދި އެކަމުގެ ސަބަބުން ދިމާވާ އެކި ކަންކަމާ ގުޅިގެން އަޅަން ޖެހޭ ފިޔަވަޅުތައް އެޅުން އަވަސްވާނެ ކަމުގެ އުއްމީދު ކުރައްވާ ކަމުގައި ވެސް އެޗްޑީސީން ވިދާޅުވިއެވެ.
