ރައީސް ނަޝީދު ނެތުމުގެ ފަޅުކަން އިހްސާސްކުރެވޭ: މެމްބަރު ރާއީ
ރައީސް ނަޝީދު މަޖިލީހުގެ ރައީސްގެ ގޮނޑީގައި ނެތުމުގެ ފަޅުކަން އިހުސާސް ކުރެވޭ ކަމަށާއި ރާއްޖޭގެ ދުވެލި މަޑުވެއްޖެކަމަށް ރައްޔިތުންގެ މަޖިލީހުގެ މަކުނުދޫ ދާއިރާގެ މެމްބަރު މުހައްމަދު ރާއީ ވިދާޅުވެއްޖެއެވެ.
މެމްބަރ ރާއީ މިހެން ވިދާޅުވީ ހަފްތާއަކު އެއްފަހު ސިލްސިލާކޮށް ބާއްވަމުން އަންނަ އެމްޑީޕީ ގައުމީ މަޖިލީހުގެ ޖަލްސާތަކުގެ ތެރެއިން ރޭގެ ޖަލްސާގައި ވާހަކަ ދައްކަވަމުންނެވެ.
ރައީސް ނަޝީދު ނެތުމުގެ އިހްސާސް ވަރަށް ބޮޑަށް ކުރެވޭކަމަށް ވިދާޅުވެ ރާއީ ވިދާޅުވީ ރައީސް ނަޝީދު މަޖިލީހުގައި މަސައްކަތްކުރައްވާއިރު އެދުވަހަކު އެ ކުރައްވާ މަސައްކަތާ ރާއްޖޭގެ އެ ދުވަހެއްގެ ހިނގުމާ ވަރަށް ބޮޑަށް ގުޅި ލާމެހިފައިވާ ކަމަށާއި އެމަނިކުފާނު ނެތުމުން ގައުމުގެ ދުވެލި މަޑުވެފައިވާ ކަަމުގެ އިހްސާސް ކުރެވޭ ކަމަށެވެ.
ރާއީ ވިދާޅުވި ގޮތުގައި ރާއީއާއި ރައީސް ނަޝީދާ ވާހަކަ ދައްކާލުމުގެ ފުރުސަތު ލިބުނު ކަމަށާއި އެމަނިކުފާނު ހުންނެވީ ޖުލައި މަސްތެރޭ އެނބުރި ރާއްޖެއަށް އައުމުގެ އުއްމީދުގައި ކަމަށެވެ.
މެމްބަރު ރާއީ ވިދާޅުވީ ހަމަލާގައި ރައީސް ނަޝީދު ފިޔަވާ ދެން އެންމެ ބޮޑަށް ޒަޚަމް ލިބުނީ އެމްޑީޕީއަށް ކަމަށާއި އެހެންކަމުން އެ ޕާޓީއަށް ޒަޚަމް ލިބުމަކީ ވަރަށް ގިނަ ރައްޔިތުންނަށް ލިބުނު ޒަޚަމެއް ކަމަށެވެ. އަދި މުޅި ރާއްޖެއަށް ވެސް އޭގެ ގެއްލުން ލިބުނު ކަމަށް ވެސް އޭނާ ވިދާޅުވިއެވެ.
މެއި މަހުގެ 6 ވަނަ ދުވަހު ރައީސް ނަޝީދަށް އަމާޒުކޮށް ދިން ހަމަލާގެ ސަބަބުން ލިބުނު އަނިޔާތަކަށް އެ މަނިކުފާނު މިހާރު ގެންދަވަނީ ޖަރުމަނުގައި ފަރުވާ ހޯއްދަވަމުންނެވެ. ޖަރުމަނުގައި ރައީސް ނަޝީދުގެ ފުރަތަމަ ސަރޖަރީ ކުރެއްވީ މިމަހުގެ 11 ވަނަ ދުވަހުއެވެ. އެއަށް ފަހު މި މަހުގެ 17 ވަނަ ދުވަހު ދެވަނަ ސަރޖަރީއެއް ކުރެއްވިއެވެ
