ޚިތާން ކުރުމުގެ ނަމުގައި އަންހެން ކުދިންގެ ޖިންސީ ގުނަވަނަށް ގެއްލުންދިނުމަކީ ލާއިންސާނީ އަމަލެއް: މައުމޫން
ޚިތާނު ކުރުމުގެ ނަމުގައި އަންހެން ކުދިންގެ ޖިންސީ ގުނަވަނަށް ގެއްލުން ދިނުމަކީ ލާއިންސާނީ ނާތަހުޒީބީ އަމަލެއް ކަމަށް ކުރީގެ ރައީސް މައުމޫން އަބްދުލްގައްޔޫމް ވިދާޅުވެއްޖެއެވެ.
ރައީސް މައުމޫން މިއަދު ކުރެއްވި ޓްވީޓެއްގައި ވިދާޅުވީ އިސްލާމްދީނުގައި ޚިތާނު ކުރުން ޝަރުއު ކުރައްވައިފައި ވަނީ ހަމައެކަނި ފިރިހެން ކުދިންނަށް ކަމަށެވެ. އަދި އަންހެން ކުދިން ޚިތާނު ކުުރުމެއް އިސްލާމް ދީނުގައި ނޯންނަ ކަމަށް އެމަނިކުފާނު ވިދާޅުވިއެވެ.
މައުމޫން އިތުރަށް ވިދާޅުވީ އެއީ އެ މަނިކުފާނުގެ އަމިއްލަ ރައުޔެއް ނޫން ކަމަށާއި އަންހެނުން ޚިތާނު ކުރުމަކީ ދީނުގައި ކަނޑައެޅިގެން ހަރާމް ކުރައްވައިފައިވާ ކަމެއް އިއްޔެ މިސްރުގެ ފަތުވާ މަޖިލީހުން ނެރުނު ބަޔާނުގައިވާ ކަމުގައި ވެސް އެ މަނިކުފާނު ވިދާޅުވިއެވެ.
މައުމޫން މިހެން ވިދާޅުވެފައި މިވަނީ އަންހެން ކުދިން ޚިތާނު ކުރުމުގެ ޘަގާފަތް އަނެއްކާ ވެސް ރާއްޖޭގައި އާލާވަމުން އަންނަ ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް)އިން ހާމަ ކޮށްފައި ވަނިކޮށެވެ.
އަންހެންކުދިން ވެސް ހިތާނު ކުރުމަކީ ރަނގަޅުކަމެއް ކަމަށް ދެކިގެން ރާއްޖޭގައި ވެސް އެކަން ކުރަމުން ދަނިކޮށް އެ ސަގާފަތް ހުއްޓައިލައިފައި ވަނީ 1970ގެ އަހަރުތަކުގެ ތެރޭގައި ކަމަށް ވެއެވެ.
