ރާޖް ކުންދްރާ ބޭނުން ވަނީ ބަރަހަނާ ފިލްމުގެ ވިޔަފާރި އިންޑިއާގައި ފުޅާ ކުރަންކަން ފަޅައިއަރައިފި!
ބޮލީވުޑްގެ މަޝްހޫރު ފިލްމީ ތަރި ޝިލްޕާ ޝެޓީ ކުންދްރާގެ ފިރިމީހާ ރާޖް ކުންދްރާ ބޭނުންވީ، އިންޑިއާގައި ބަރަހަނާ ފިލްމުގެ ވިޔަފާރި ފުޅާ ކުރަން ކަމަށް ވަޓްސްއެޕް ޗެޓް ތަކަކުން ހާމަވެއްޖެއެވެ.
"އިންޑިއާ ޓުޑޭ"އިން ރިޕޯޓު ކޮށްފައިވާ ގޮތުގައި، ބަރަހަނާ ފިލްމުގެ ވިޔަފާރި އިންޑިއާގައި މުޅިން އެހެން ލެވަލަކަށް ގެންދަން ބޭނުންވާ ކަމަށް ބުނެ ރާޖް ކުންދްރާ ވަޓްސްއެޕްގައި ދައްކާފައި ހުރި ވާހަކަތަކުގެ ސްކްރީންޝޮޓް އެ މީޑިއާއަށް ވަނީ ލިބިފައެވެ.
އެ ޗެޓުތަކުން ހާމަވީ ގޮތުގައި މިކަމުގައި ރާޖް ކުންދްރާ އާއެކު ބޮޑު ގޭންގެއް އުޅުނެވެ. އަދި އެ މީހުން މިފަދަ ވީޑިއޯތައް ހަދަން ބޭނުން ކުރަން ރާވައިފައި ވަނީ ވީއާރް 360 ކެމެރާކަމާއި އެއީ ވާޗުއަލްކޮށް އެ ފަދަ ފިލްމު ފުރަތަމަ ފަހަރަށް އިންޑިއާގައި އުފައްދަން ކަމަށް ވެސް ފަޅައިއަރައިފައިވެއެވެ.
އެ ކެމެރާތަކުގެ ބޭނުމަކީ ބަރަހަނާ ފިލްމުތަކުގެ ތަޖުރިބާ ވަރަށް ގަދަޔަށް ކުރާނެ ގޮތް ހެދުން ކަމުގައި ވެސް އެ ޗެޓުތަކުގައި ބުނި ކަމަށްވެއެވެ.
އެ ޗެޓުތަކުން ވަނީ ރާޖް ކުންދްރާއާއި ބަރަހަނާ ކޮންޓެންޓު އުފައްދާ ދެ މީހަކާ ދައްކާފައި ހުރި ވާހަކަތަކެއް ވެސް ފަޅައި އަރައިފައެވެ. އެމީހުން ވަނީ ވީއާރްކޮށް ބަރަހަނާ ފިލްމު އިންޑިއާގައި އުފައްދަން ބޭނުން ވާނެ ތަކެއްޗާ ބެހޭ ގޮތުން ވާހަކަ މަޝްވަރާ ކޮށްފައެވެ.
ބަރަހަނާ ފިލްމު އުފެއްދި ކަމުގެ ތުހުމަތުގައި ރާޖް ކުންދްރާ ހައްޔަރު ކޮށްފައި ވަނީ މިދިޔަ ޖުލައި މަހުގެ 19ވަނަ ދުވަހުގައެެވެ. އޭނާގެ ސަބަބުން ޝިލްޕާއަށް ވެސް ވަރަށް ގިނަ ކަންކަމާ ކުރިމަތިލާން ޖެހި، މީޑިއާގައި އެކި ވާހަކަތައް ދައުރުވުމުން، ޝިލްޕާ ވަނީ އެކަމުގައި އޭނާ އެއްވެސް އެއްޗެއް ބުނަން ބޭނުން ނުވާ ކަމަށް ބުނެ ބަޔާނެއް ނެރެފައެވެ.
