ކައުންސިލުތަކަށް އަންނަ މަހު އެސްޖީން އައްޔަން ކުރަނީ
ލޯކަލް ކައުންސިލުތަކަށް ސެކްރަޓެރީ ޖެނެރަލް (އެސްޖީ)އިން އައްޔަން ކުރަން ފަށާނީ އަންނަ ސެޕްޓެމްބަރު މަހު ކަމަށް ސިވިލް ސާވިސް ކޮމިޝަން (ސީއެސްސީ)އިން ވިދާޅުވެއްޖެއެވެ.
އެނގިފައިވާ ގޮތުގައި ކައުންސިލުތަކަށް އެސްޖީން އައްޔަން ކުރަން އެ ކޮމިޝަނުން ފުރަތަމަ މަސައްކަތް ކުރީ މި މަހުގައެވެ. ނަމަވެސް އެކި ސަބަބުތަކާ ހެދި އެކަން ލަސްވީ ކަމަށް ސީއެސްސީން ފަހުން ވަނީ ހާމަަ ކުރައްވައިފައެވެ.
ސެކްރްޓަރީ ޖެނެރަލުންނަކީ އެ ކައުންސިލެއް އިދާރީ އެންމެ އިސް މުވައްޒަފެވެ. ކައުންސިލުތަކުގެ ޤަވާއިދުގައި މިހާރު އޮންނަ ގޮތުން ނަމަ، ކައުންސިލުތަކުގެ އެސްޖީކަމުގެ މަގާމަށް މީހަކު އައްޔަން ކުރާނީި ސީއެސްސީ އިންނެވެ.
ކައުންސިލްތަކުގެ ސެކްރެޓަރީ ޖެނެރަލްގެ މަގާމަށް ފުރުސަތު ހުޅުވައިލުމުން 511 މީހަކު ވަނީ ކުރިމަތިލައިފައެވެ. އެއީ ރަށު ކައުންސިލްތަކަށް ކުރިމަތިލި 371 މީހަކާއި އަތޮޅު ކައުންސިލްތަކަށް ކުރިމަތިލި 86 މީހެއްގެ އިތުރުން ސިޓީ ކައުންސިލްތަކަށް ކުރިމަތިލި 54 މީހެކެވެ.
އެސްޖީންގެ މަގާމަށް ޝޯޓް ލިސްޓް ކޮށްފައިވާ މީހުންނަށް ސީއެސްސީން އިއްޔެ ވަނީ އިމްތިހާނެއް ވެސް ބާއްވައިފައެވެ. މި އިމްތިހާނުގައި ރާއްޖޭގެ އެކި ކަންކޮޅުތަކުން 272 މީހަކު ވަނީ ބައިވެރިވެފައެވެ.
ދައުލަތުގެ ޚަރަދު ދެކޮޅު ނުޖެހިގެން އުޅެނިކޮށް ކީއްކުރަން ކުރާ ބޭކާރު ޚަރަދެއް. ތިއިން މީހަކު ހައްދަވައިގެން ކުރާކަމެއް ހަރާމް.