ތިލަމާލެ ބްރިޖު މަޝްރޫއާ ބެހޭގޮތުން މަޝްވަރާ ނުކުރާތީ މޭޔަރުގެ ކަންބޮޑުވުން
ތިލަމާލެ ބްރިޖުގެ މަޝްރޫއާ ގުޅޭގޮތުން ސަރުކާރުން މާލޭ ސިޓީ ކައުންސިލާ މަޝްވަރާ ނުކުރާތީ މޭޔަރު ޑރ. މުހައްމަދު މުޢިއްޒު ކަންބޮޑުވުން ފާޅުކުރައްވައިފިއެވެ.
ވިލިމާލޭ ރައްޔިތުންގެ ޚިޔާލު ހޯދުމަށް މުހްޔިއްދީން ސްކޫލުގައި ރޭ ބޭއްވި ބައްދަލުވުމުގައި ވާހަކަ ދައްކަވަމުން ޑރ.މުޢިއްޒު ވިދާޅުވީ، ބްރިޖުގެ މަސައްކަތް މިހާރު ކުރިއަށްދާއިރު އެކަމުގެ އެއްވެސް މަޝްވަރާއެއް ކުރީގެ ކައުންސިލާ ވެސް މިހާރުގެ ކައުންސިލާ ވެސް ސަރުކާރުން ނުކުރާ ކަމަށެވެ.
މުޢިއްޒު ވަނީ ކައުންސިލެއްގެ އިހުތިސާސުގެ ތެރޭގައި ސަރުކާރުން އެއްވެސް މަޝްރޫއެއް ހިންގާ ނަމަ ކައުންސިލް މެދުވެރިކޮށް ރައްޔިތުންގެ ހިޔާލު ހޯދަން ގާނޫނުގައި ބުނާކަން ފާހަގަ ކުރައްވައިފައެވެ.
"އެ ފަދަ ބޮޑު މަޝްރޫއެއްގައި މަޝްވަރާ ނުކުރުމަކީ ވަރަށް ބޮޑު ކަންބޮޑުވުމެއް، އެ މަޝްރޫއާ ގުޅިގެން އަަޅުގަނޑަށް ލިބެނީ ނުރަސްމީކޮށް ލިބޭ މައުލޫމާތެއް އެކަނި. އަދި ސަރުކާރުން އެކަމާ ގުޅިގެން އާންމުންގެ ހިޔާލު ވެސް ހޯދައިފައެއް ނުވޭ. ގައިމު ވެސް މި ދައުރުގެ ދެ މަހާއި ބައިގެ ތެރޭގައި ސިޓީ ކައުންސިލެއް ވެސް ރައްޔިތުންނެއް ވެސް ސަރުކާރުން އިންވޯލްވެއް (ބައިވެރިއެއް) ނުކުރޭ" ޑރ. މުޢިއްޒު ވިދާޅުވިއެވެ.
މީގެ އިތުރުން ޑރ. މުޢިއްޒު ވިދާޅުވީ ވިލިމާލޭ ބުރިޖާ ގުޅޭ ވިލިމާލޭގެ ސިނާއީ ސަރަހައްދު ބްރިޖުގެ ބޭނުމަށް ނަގާތީ އެ ސަރަހައްދު ތާއަބަދަށް ގެއްލިގެން ހިނގައިދާނެކަމުގެ ބިރު އެބައޮތް ކަމަށެވެ.
ކަލޯޔަށް ކީއް. ތިލަމާލޭ ބުރިޖްގެ ޚަބަރުތަށް ކަލޯޔަށް ބަރާބަރަށް ދޭންނަށް ކަލޯގެ ޖަލު ހުކުމް އިއްވާދުވަހުން ފެށިގެން. ކެއްކޮށްލާ.