އަވަހަށް ވެކްސިން ޖަހާ، ކަރަންޓީނު މުއްދަތު ޗުއްޓީން އުނިވާގޮތަށް ހަދަން ހުށަހަޅަނީ!
ކޮވިޑް-19ގެ ސަބަބުން ކަރަންޓީނު ވާން ޖެހޭ ހާލަތުގައި، އެ މުއްދަތު ޗުއްޓީން އުނި ނުކުރެވޭ ގޮތަށް އާންމު ސިއްހަތުގެ ކުއްލި ނުރައްކަލުގެ ހާލަތުގެ ގާނޫނުން ދީފައިވާ ހާއްސަ އިސްތިސްނާ، ކޮވިޑް ވެކްސިން ނުޖަހާ މީހުންނަށް ނުދޭ ގޮތަށް ގާނޫނު އިސްލާހުކުރަން ޕޮލިސީ ބައްދަލުވުމަށް މިއަދު ހުށަހަޅައިފިއެވެ.
އާންމު ސިއްހަތުގެ ކުއްލި ނުރައްކަލުގެ ހާލަތުގެ ގާނޫނުގައި މިހާރު އޮންނަ ގޮތުން ނަމަ، ކޮވިޑާ ގުޅިގެން ރަށްރަށަށް ދަތުރުކުރުމަށް ފަހު އަދި ބަލި ޖެހިގެން ނުވަތަ އެ ބަލި ޖެހިފައިވާ މީހަކާ ކޮންޓެކްޓް ވެގެން ކަރަންޓީނުވާ ނަމަ މެޑިކަލް ސެޓްފިކެޓެއް ހުށަހަޅަންޖެހުމަކާ ނުލައި، މުސާރަ ލިބޭ ގޮތަށް، ހާއްސަ ޗުއްޓީއެއް ވަޒީފާދޭ ފަރާތުން ހަމަޖައްސައިދޭން ޖެހޭނެއެވެ.
ޗުއްޓީ ނަގައިގެން ރަށަށް ގޮސް ކަރަންޓީނުގެ މުއްދަތު އެއީ ޗުއްޓީ ދުވަސްތަކެއްގެ ގޮތުގައި މިހާރު ނުގުނި ނަމަވެސް ވެކްސިން ޖެހި މީހުންނަށް ދޭނެ ލުއިތަކާ ބެހޭ ގޮތުން ކުރި މަޝްވަރާއަށް، ވެކްސިން ނުޖަހާ މީހުންނަށް މި އުސޫލު ނުހިނގާ ގޮތް ހަދަން ގާނޫނަށް ބަދަލު ގެންނަން ހުށަހެޅިކަން ވަނީ އެނގިފައެވެ.
މިކަމާ ގުޅޭގޮތުން ހެލްތު އެމަޖެންސީ އޮޕަރޭޝަންސް ސެންޓަރުގެ އޮފިޝަލަކު ވިދާޅުވީ ވެކްސިން ޕްރޮމޯޓްކުރުމުގެ ގޮތުން ވަރަށް ގިނަ މަޝްވަރާތައް ކުރަމުން އަންނަ ކަމަށެވެ. އިތުރު ތަފްސީލެއް ދެއްވައިފައެއް ނުވެއެވެ.
Ads by STO
