މަހުލޫފްގެ މައްސަލަ އިތުރު ބަޔަކާ ހަވާލެއް ނުކުރަން: ޕީޖީ
މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ހިޔާނާތުގެ މައްސަލައިގައި ޔޫތު މިނިސްޓަރު އަހުމަދު މަހުލޫފުގެ މައްޗަށް ދައުވާ ކުރުމަށް އެންޓި ކޮރަޕްޝަން ކޮމިޝަން (އޭސީސީ)އިން ފޮނުވާފައިވާ މައްސަލަ އެހެން ޕްރޮސިކިއުޓަރުންތަކަކާ ހަވާލުކުރި ކަމަށް ދެކެވޭ ވާހަކަތައް ޕްރޮސެކިއުޓާ ޖެނެރަލްގެ އޮފީހުން ދޮގުކޮށްފިއެވެ.
އޮންލައިން ނޫހަކަށް މައުލޫމާތު ދެއްވަމުން ޕީޖީ އޮފީހުގެ މީޑިއާ އޮފިޝަލު އަހުމަދު ޝަފީއު ވިދާޅުވީ މަހުލޫފުގެ މައްސަލަ ދިރާސާކުރަމުން ދަނީ އެ މައްސަލަ ކުރިން ވެސް ދިރާސާކުރަމުން އައި ޕްރޮސިކިއުޓަރުންގެ ޓީމުން ކަމަށެވެ.
"މަހުލޫފުގެ މައްސަލަ ދިރާސާ ކުރާ ޕްރޮސެކިއުޓަރުންގެ ޓީމް ބަދަލުކޮށްފައެއް ނުވޭ. ކުރިން ވެސް އެ މައްސަލަ ދިރާސާ ކުރި ޓީމުން ދަނީ މައްސަލަ ދިރާސާ ކުރަމުން. އެކަމާ ގުޅިގެން ޕީޖީ އޮފީހަށް އަމާޒުކުރި ތުހުމަތުތަކަކީ އެއްވެސް ހަގީގަތެއް ނެތް ތުހުމަތުތަކެއް" ޝަފީއު ވިދާޅުވިއެވެ.
ޕީޖީ އޮފީހުގައި އޮތް މަހުލޫފްގެ މައްސަލައާ ގުޅޭގޮތުން މަހްލޫފު ރޭ ވިދާޅުވީ ކުރިން ނިންމައިގެން ހުރީ ޕީޖީ އޮފީހުން ގޮތެއް ނިންމުމުން އިސްތިއުފާ ދޭން ކަމަށެވެ. އެހެންނަމަވެސް މިހާ ގޯސްކޮށް ޕީޖީ އޮފީސް ތެރެއިން ކަންކަން ދިޔުމާ ގުޅިގެން ދެން އިސްތިއުފާދިނުމާ މެދު އިތުރަށް ވިސްނާނެ ކަމަށެވެ.
އަދި ޤާނޫނާއި ގަވައިދުގެ ތެރެއިން އަދި ކޮމިޝަން، ޕޮލިސް، ޕީޖީ އަދި އޭސީސީ އިން އަމިއްލައަށް ގެންގުޅުއްވާ އުސޫލުތަކާ އެއްގޮތަށް ތަފާތުނުކޮށް މައްސަލަ ގެންދާނަމަ ކުރިން ދެންނެވިހެން އެއްމެދުވަހަކުވެސް މަގާމުގަ ދެމިނުހުންނާނެ ކަމަށްވެސް މަހުލޫފް ވިދާޅުވިއެވެ.
