ސިޔާސީ މީހުންގެ ބާރު ނޯންނަ ގޮތަށް ޖޭއެސްސީ ބަދަލުކުރަން ތޯރިގު އަނެއްކާ ވެސް ހުށަހަޅައިފި
ސިޔާސީ މީހުންގެ ބާރު ނޯންނަ ގޮތަށް ޖުޑިޝަލް ސާވިސް ކޮމިޝަން (ޖޭއެސްސީ) ބަދަލުކުރަން މަހިބަދޫ ދާއިރާގެ މެމްބަރު އަހުމަދު ތޯރިގު އަނެއްކާ ވެސް ރައްޔިތުންގެ މަޖިލީހަށް ބިލެއް ހުށަހަޅުއްވައިިފިއެވެ.
ތޯރިގު މަޖިލީހަށް ހުށަހެޅުއްވި ބިލުގައި އޮތީ އެކިއެކި މަގާމުތައް އަދާކުރައްވާ ބޭފުޅުންގެ ހައިސިއްޔަތުން އެ ކޮމިޝަންގައި ތިއްބަވާ މެމްބަރުން އުނިކުރުމަށެވެ.
ޖޭއެސްސީގައި ހިމަނަން ތޯރިގު ހުށަހެޅުއްވި މެމްބަރުންގެ ތެރޭގައި އުއްތަމަފަނޑިޔާރު، ހައި ކޯޓުން އިންތިހާބުކުރާ ފަނޑިޔާރެއް، ދަށު ކޯޓްތަކުން އިންތިހާބުކުރާ ފަނޑިޔާރެއް، ވަކީލުން އިންތިހާބުކުރާ ވަކީލެއް، ޔުނިވާސިޓީތަކުގައި ޝަރީއާ ކިޔަވައިދެއްވާ ލެކްޗަރާއިންގެ ތެރެއިން އިންތިހާބުކުރާ ލެކްޗަރާއެއް، އަދި ގާނޫނީ ފަންނު ފިޔަވައި އެހެން ފަންނުތަކުގެ ތަޖުރިބާކާރުންގެ ތެރެއިން ރައީސުލްޖުމްހޫރިއްޔާ އައްޔަން ކުރައްވައި، މަޖިލީހުން ރުހުންދޭ ތަޖުރިބާ ކާރެއް ހިމެނެއެވެ.
ޖުޑިޝަލް ސާވިސް ކޮމިޝަން (ޖޭއެސްސީ)އަށް މެމްބަރުން އައްޔަން ކުރާއިރު، ސިޔާސީ މީހުން ނުހިމެނުމަށް ގާނޫނުއަސާސީއަށް އިސްލާހު ގެންނަން ތޯރިގް ހުށަހަޅާފައިވާއިރު ރައީސް އޮފީހުގައި އިއްޔެ ބޭއްވި ނޫސްވެރިންގެ ބައްދަލުވުމުގައި ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވީ ޖޭއެސްސީއަށް ގެންނާނެ ބަދަލާ ބެހޭ ގޮތުން ރައީސް އިބްރާހީމް މުހައްމަދު ސޯލިހު ބައެއް ގާނޫނީ މާހިރުންގެ ލަފާ ހޯއްދަވައިފައި ވާކަމަށެވެ. އަދި އެ މަސައްކަތް މި ދައުރުގެ ތެރޭގައި ކުރާނެކަމަށް ވެސް މަބްރޫކް ވިދާޅުވިއެވެ.
