ކުރަނީ އަސާސެއް ނެތް ތުހުމަތު ތަކެއް، ހުވާކުރަން ޖެހިއްޖެ ނަމަ 7 ފަހަރު ހުވާ ކުރާނަން: އަލީ ޒާހިރު

ދިވެހި ރާއްޖޭގެ ޝަރުއީ ކޯޓުތަކަށް ނުފޫޒު ފޯރުވަމުން ގެންދަވާ ކަމަށް އިދިކޮޅު ފަރާތްތަކުންނާއި ކުރީގެ ބައެއް ފަނޑިޔާރުން ކުރައްވާ ތުހުމަތުތަކަށް އަދާލަތު ޕާޓީގެ ކުރީގެ ނައިބު ރައީސް، ރައީސް އޮފީހުގެ ޗީފް އޮފް ސްޓާފްސް އަލީ ޒާހިރު ރައްދު ދެއްވައިފިއެވެ.

Ads by Hajj Corporation

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިން ކުރިމަތި ކުރި ސުވާލުތަކަށް ޖަވާބު ދެއްވަމުން އަލީ ޒާހިރު ވިދާޅުވީ އެމަނިކުފާނުގެ މައްޗަށް ކުރައްވާ ތުހުމަތުތަކަކީ އެއްވެސް އަސާސެއް ނެތް ތުހުމަތުތަކެއް ކަމަށެވެ. އަދި އެފަދަ ތުހުމަތުތައް ސަރުކާރަށް އަމާޒު ކުރުމުގެ ބަދަލުގައި އެމަނިކުފާނަށް ސީދާ އަމާޒު ކުރައްވަނީ "ފިނޑި" ކަމުން ކަމަށް އަލީ ޒާހިރު ވިދާޅުވިއެވެ.

ރައީސް އަބްދުﷲ ޔާމީން އަބްދުލް ޤައްޔޫމްއާ ދެކޮޅަށް ދައުލަތުން އުފުލި މަނީ ލޯންޑަރިން މައްސަލައިގެ ޝަރީއަތަށް އަލީ ޒާހިރު ނުފޫޒު ފޯރުވި ކަމަށް ވިދާޅުވެ ކްރިމިނަލް ކޯޓުގެ ކުރީގެ ފަނޑިޔާރު ހަސަން ނަޖީބު މާތް ﷲ ގަންދީ ހުވާކުރައްވުމުން އެފަދަ ހުވައެއް އަލީ ޒާހިރަށް ކުރައްވަން ކެރޭނެތޯ ނޫސްވެރިޔަކު ސުވާލު ދެންނެވުމުން އޭނާ ވިދާޅުވީ، ހުވާ ކުރަން ޖެހޭ ހާލަތެއް އައިސްފިނަމަ ހަތް ފަހަރު ހުވާ ކުރަން ތައްޔާރަށް ހުންނެވި ކަމަށެވެ.

"ހަތް ފަހަރު ހުވާ ކުރަން އަޅުގަނޑު ތައްޔާރު. އެހެން ނަމަވެސް އެހިސާބަށް ދާ ކަމަށްވާ ނަމަ މި ބާވަތުގެ ކަންކަމުގައި އޮންނަ އުސޫލު، ޕްރިންސިޕަލްސް ދަމަހައްޓަން ވާނެ. މައްސަލަ ހުށަހަޅާ ނުވަތަ ދައުވާ ކުރާ މީހެއްގެ ކަމެއް މައްސަލަ ސާބިތުކޮށްދިނުމަކީ، ހެކި ދެއްކުމަކީ. އެ ދައުވާ ރައްދުވާ ފަރާތުން އިންކާރު ކުރަނީ. އަދި ހެކި ނުދައްކާ، ހެކި ދެއްކީމަ އަޅުގަނޑު ހަތް ފަހަރު ހުވާ ކުރާނަން." އަލީ ޒާހިރު ވިދާޅުވީ އެފަދަ އޯޑިއޯއެއް ނޯންނާނެ ކަމަށާއި ތުހުމަތު ކުރާ ފަދަ އޯޑިއޯއެއް އޮތް ނަމަ ވަގުތުން އިސްތިއުފާ ދެއްވާނެ ކަމަށެވެ. "އަސްލު އޯޑިއޯއެއް ލީކްވެއްޖިއްޔާ 100 ޕަސެންޓް ޔަޤީން އިސްތިއުފާ ދޭނަން. އަސްލު އޯޑިއޯއެއް ނުހުންނާނެ. ނެތް އެއްޗެއް ލީކެއް ނުވާނެތާ."

އަލީ ޒާހިރުގެ ވާހަކަފުޅުގައި ވިދާޅުވީ، އެމަނިކުފާނަށް ނިސްބަތްކޮށް ވާހަކަ ދައްކަވަނީ ސިޔާސީ ބޭނުމަކަށް ކަމަށާއި ފަހަރެއްގައި އެއީ ރައީސްއާ ޕްރޮފެޝަނަލް ގޮތުން އޮންނަ ގާތް ކަމުގެ ސަބަބުން އަންނަ ތުހުމަތު ތަކެއް ކަމަށް ވެދާނެ ކަމަށެވެ.

"ވެދާނެ ސީދާ ރައީސްއަށް ނުވަތަ ސަރުކާރަށް އަމާޒުކޮށް ތުހުމަތު ކުރަން ނުކުރެނީ ކަމަށް. އެއީ ހަމަ ފިނޑިކަމުން. އަޅުގަނޑުގެ ނަން ގެންނަ ބައެއް ފަރާތްތަކުން ވެދާނެ، ރައީސުލްޖުމްހޫރިއްޔާ ވިދާޅުވެގެން ކަންކަން ކުރާ މީހަކީ އަޅުގަނޑު ކަމަށް ބަލާފައި ކަމަށްވެސް ވެދާނެ" އަލީ ޒާހިރު ވިދާޅުވީ ތުހުމަތު އަމާޒުވާ ސަބަބާ ގުޅޭގޮތުން ތުހުމަތު ކުރައްވާ ފަރާތްތަކާ ސުވާލު ކުރެއްވުން ބުއްދިވެރިވާނެ ކަމަށެވެ.