ކަލާފާނު ސްކޫލުގެ ދެ ދަރިވަރެއްގެ މެދުގައި ހިނގި ހާދިސާ ދަނީ ބަލަމުން: އެޑިއުކޭޝަން
ކަލާފާނު ސްކޫލުގެ ދެ ދަރިވަރެއްގެ މެދުގައި މިއަދު ހިނގި ހާދިސާ، ކަމާ ގުޅުން ހުރި މުއައްސަސާތަކާ ގުޅިގެން ބަލަމުން ދާ ކަމަށް އެޑިއުކޭޝަން މިނިސްޓްރީން ވިދާޅުވެއްޖެއެވެ.
މިއަދު މެންދުރު 2:30 ހާއިރު އެ ސްކޫލްގެ ދެ ދަރިވަރެއްގެ މެދުގައި ހިނގި މާރާމާރީއެއްގައި، އެއް ކުއްޖެއްގެ ބޮލަށާއި ކަރަށް ކަތުރެއް ހަރައިލާފަައިވާ ކަމަށް ވަނީ މައުލޫމާތު ލިބިފައެވެ.
މި މާރާމާރީ ހިނގައިފައި ވަނީ ގްރޭޑް 9ގައި ތައުލީމު ހާސިލު ކުރަމުން ދާ ދެ ކުއްޖެއްގެ މެދުގައި ކަމަށާއި އަނިޔާ ލިބުނު ކުއްޖާއަށް އޭޑީކޭގައި ފަރުވާ ދެމުންދާ ކަމަށް ވެސް މައުލޫމާތު ލިބިފައިވެއެވެ.
މިކަމާ ގުޅޭގޮތުން އެޑިއުކޭޝަނުން ނެރުނު ބަޔާނެއްގައި ވިދާޅުވެފައި ވަނީ ކަލާފާނު ސްކޫލުގައި ހިނގި މި ހާދިސާއާ ގުޅިގެން އެއް ކުއްޖަކަށް އޭޑީކޭގައި ފަރުވާ ދެމުންދާ ކަމަށެވެ. އަދި، މި ހާދިސާ ހިނގައި ދިޔަ ގޮތް ކަލާފާނު ސްކޫލާއި، ފުލުހުން އަދި އެޑިއުކޭޝަން މިނިސްޓްރީ ގުޅިގެން ބަލަމުންދާ ކަމަށް އެ މިނިސްޓްރީން ބުނެއެވެ.
