ފާރުތައް ތަޅަނީ އިންޖިނޭރުންގެ ލަފާގެމަތިން،ހުއްދައާ އެކު:އެޗްޑީސީ
ހިޔާ ފްލެޓްތަކުގެ ގްރައުންޑް ފްލޯގެ ބައެއް، ކޮމާޝަލް ޔުނިޓްތަކަށް ބަދަލުކުރަން ތަޅައިލި ނަމަވެސް އެ ފާރުތައް ތަޅަނީ އިންޖިނޭރުންގެ ލަފާގެ މަތިން ހައުސިން ޑިވެލޮޕްމަންޓް ކޯޕަރޭޝަނުގެ ހުއްދައާ އެކު ކަމަށް އެ ކޯޕަރޭޝަނުން ވިދާޅުވެއްޖެއެވެ.
"ދެން"އަށް މައުލޫމާތު ދެއްވަމުން އެޗްޑީސީގެ މީޑިޔާ އޮފިޝަލް ވިދާޅުވީ އިމާރާތުގެ ސްޓްރަކްޗަރަލް ތަނބެއް ހަލާކު ނުކުރާކަމަށާއި ތަޅަމުން ދަނީ ހަމައެކަނި ފާރުކަމަށެވެ.
"ހަމައެކަނި ފާރުތައް ތަޅަމުންދަނީ މިކޮޅުގެ އިންޖިނޭރުންގެ ލަފާގެ މަތިން ހުއްދަދެވިގެން ކުރާކަމެއް އެއީ" އެޗްޑީސީން ވިދާޅުވިއެވެ.
ހިޔާ ފުލެޓުގެ ގްރައުންޑް ފްލޯ ތަޅަމުންދާތީ އެކަމާ މެދު ކަންބޮޑުވުން ފާޅުކޮށް ހިިޔާ ޔޫނިއަނުން ނެރުނު ބަޔާނެއްގައި ބުނީ ކޮމާޝަލް ސްޕޭސްގެ ގޮތުގައި ގްރައުންޑް ފްލޯ ބަދަލުކޮށް، އެޕާޓްމަންޓްގެ ފާރުތައް ތަޅައިލައި ވިޔަފާރިތަކަށް ޖާގަ ހޯދާއިރު، އިމާރާތުގައި ވަޒަންވެރިވާ އާއިލާތަކަށް އޮތީ ހަރުކަށި އުސޫލުތަކެއް ކަމަށެވެ. އަދި އެއްވެސް ކަހަލަ ބެލުމެއްނެތި ކޮމާޝަލް ޔުނިޓްތަކުގެ ބެރިތައް ތަޅައި ފާރުކަނޑަމުން ގެންދާ ނަމަ އެފަދަ އުސް އިމާރާތްތަކަށް ދިގު މުއްދަތަށް ވިސްނާއިރު ބޮޑެތި ގެއްލުންތަކާ ކުރިމަތިލާން ޖެހިދާނެކަމަށް ވެސް މި ބަޔާނުގައި ވަނީ ބުނެފައެވެ.
ހިޔާ ފުލެޓުގެ ގްރައުންޑް ފްލޯތައް ކޮމާޝަލް މަސައްކަތްތަކަށް ދޫކޮށްފައިވާއިރު އެ ތަންތަނުން ހިދުމަތް ދިނުމަށް އަދި ދުވަސްކޮޅެއް ނަގާނެކަމަށް އެޗްޑީސީން ވަނީ ވިދާޅުވެފައެވެ. ހިދުމަތްތައް ނުލިބުނު ނަމަވެސް ހިޔާ ފުލެޓްގެ ބައެއް އެޕާޓްމެންޓްތަކަށް މިހާރު ވެސް މީހުން ވަނީ ބަދަލުވެފައެވެ.
