ފުލުފުލުގައި ބޮމުގެ އިންޒާރު ދެމުންދާއިރު، ސަރުކާރު ހިމޭނުން އޮންނާތީ ކަންބޮޑުވޭ: އިންތި
ފުލުފުލުގައި ބޮމުގެ އިންޒާރު ދެމުންދާއިރު، ސަރުކާރު ހިމޭނުން އޮންނާތީ އެކަމާ ކަންބޮޑުވާކަމަށް ރައްޔިތުންގެ މަޖިލީހުގެ ޖުޑިޝަރީ ކޮމެޓީގެ މުޤައްރިރު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
އިމްތިޔާޒް މިފަދައިން ވިދާޅުވެފައި ވަނީ ހުޅުމާލޭ ޖަލުގައި ހުރި ގައިދީއަކު ނިޔާވުމާ ގުޅިގެން އާއިލާއިން ކުރާ ތުހުމަތުތައް ބަލައި މިނިވަން ތަހްޤީޤެއް ކުރުމަށް ސަރުކާރަށް ގޮވައިލާ ހުށައަޅާ ކުއްލި މައްސަލައިގައި ވާހަކަ ދައްކަވަމުންނެވެ.
ހުޅުމާލެ ޖަލުގައި 3 (ތިން) އަހަރުގެ ޖަލު ޙުކުމެއް ތަންފީޒު ކުރަމުންދިޔަ މީހަކު ނިޔާވެފައި ވަނީ އިއްޔެގެ ވަގުތެއްގައެވެ. މޯލްޑިވްސް ކަރެކްޝަނަލް ސާވިސްއިން މައުލޫމާތު ދީފައިވާ ގޮތުގައި، ހުޅުމާލޭ ޖަލުން ނިޔާވީ ގދ. ވާދޫ/ ޖަނަވަރީގެ މުޙައްމަދު އަސްލަމް (40 އަހަރު)އެވެ. އަސްލަމަކީ މަސްތުވާތަކެތީގެ މައްސަލައެއްގައި ޖަލު ހުކުމެއް ތަންފީޛުކުރަމުން ދިޔަ ފަރާތެއް ކަމަށާއި ނިޔާވިއިރު މީނާއަކީ ބޮޑު ބައްޔަކަށް ބޭސްފަރުވާ ކުރަމުން ދިޔަ ފަރާތެއް ނޫންކަމަށް ވެސް ކަރެކްޝަންސްއިން ވަނީ ފާހަގަ ކޮށްފައެވެ.
ކުއްލި މައްސަލައިގައި ވާހަކަދައްކަވަމުން އިމްތިޔާޒް ވިދާޅުވީ މަރުތަކުގެ ކޮމިޝަންގެ ރިޕޯޓުގައި ނޫރު މިސްކިތަކީ ޓެރަރިޒަމްގެ އަމަލުތައް ހިންގުމަށް ބޭނުންކުރާ މިސްކިތެއްކަން ބަޔާންކޮށްފައިވާ ކަމަށެވެ. އިމްތިޔާޒް ވަނީ ފުލުހުންނާއި، ކަމާ ބެހޭ މުވައްސަސާތަކުން މި މިސްކިތާ މެދު ސާވޭލަންސެއް ނުހިންގައިތޯ ސުވާލު އުފައްދަވައިފައެވެ.
މީގެ އިތުރުން އިމްތިޔާޒް ވިދާޅުވީ ބޮމެއް ގޮއްވައިލައި މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލަން ހަމަލާދީފައި ވާއިރު ވެސް ރާއްޖޭގައި ކުއްލި ނުރައްކަލުގެ ހާލަތެއް އިއުލާން ކުރަން ސަރުކާރުން ނުދެކޭކަމީ އިންތިހާއަށް ކަންބޮޑުވާ ކަމެއް ކަމަށެވެ.
“ފުލުފުލުން ހަމަ މަރުގެ އިންޒާރާއި، ބޮންގޮއްވައިލާނެކަމުގެ އިންޒާރުދޭކަމީ އަޅުގަނޑު ނުހަނު ކަންބޮޑުވާކަމެއް“ އިމްތިޔާޒް ވިދާޅުވިއެވެެ.
Ads by STO
