ޚިޔާނާތުގެ ބައިވެރިންނަށް ވާދަނުކުރެވޭ ގޮތަށް ނިންމި ނިންމުން އެމްޑީޕީން ލީ ފައިދަށު: އިންތި
އެމްއެމްޕީއާރުސީގެ ޚިޔާނާތުގެ މައްސަލައިގައި ބައިވެރިވެފައިވާ މީހުންނަށް އެމްޑީޕީގެ އެތެރޭގެ އިންތިޚާބުގައި ބައިވެރިނުވެވޭ ގޮތަށް ނިންމި ނިންމުން ބަދަލު ކުރުމަކީ އެމްޑީޕީގެ އެތައް މެމްބަރަކު ހިތާމަކުރާ ކަމެއްކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވެއްޖެއެވެ.
މިއަދު ކުރިޔަށް ދިޔަ ރައްޔިތުންގެ މަޖިލިސް ޖަލްސާގައި ވާހަކަ ދައްކަވަމުން އިމްތިޔާޒް ވިދާޅުވީ އެމްއެމްޕީއާރުސީގެ ކޮރަޕްޝަންގައި ޝާމިލުވާ އެއްވެސް މީހަކަށް ބައިވެރި ނުވެވޭނެކަމަށް ނިންމި ނިންމުން ޖެހިގެން އައި ދުވަހު ބަދަލު ކުރުމަކީ ހިތާމަ ކުރާ ކަމެއްކަމަށެވެ. އަދި އެކަން އެހެން ކުރެވިގެން ނުވާނެ ކަމަށް ވެސް އިމްތިޔާޒް ވިދާޅުވިއެވެ.
މީގެ އިތުރުން އެމްއެމްޕީއާރްސީގެ ޚިޔާނާތާ ގުޅިގެން އޭސީސީން ތައްޔާރުކޮށްފައިވާ ރިޕޯޓެއްގައި ފިޔަވަޅު އަޅައިދިނުމަށް އެދި އެކި މުއައްސަސާތަކަށް ނަން ފޮނުވައިފައިވާ ފަރާތްތަކަށް ވެސް ވާދަ ނުކުރެވޭނެ ކަމަށާއި އެމްއެމްޕީއާރްސީގެ ބޮޑު ހިޔާނާތުގެ މައްސަލަ ބެލުމަށް ޓަކައި އެޑީޕީން ކުރެވެން ހުރި ހުރިހާ ކަމެއް ކުރަން ޖެހޭނެ ކަމަށް އިމްތިޔާޒް ވިދާޅުވިއެވެ. އަދި “ބޮޑު ހިޔާނާތެއްވެފަ ވަނީ. މިކަހަލަ ކަންތައްތައް ސީރިއަސްކޮށް ނަގާ ޕާޓީއަކަށް އަޅުގަނޑުމެން ވާން ޖެހޭނެ” ކަމަށް އިމްތިޔާޒް ވިދާޅުވިއެވެ.
“އަޅުގަނޑުމެން ހިތުން ޕާޓީގަ ގެންގުޅޭ މިންގަނޑަކީ އެވަރުގެ ބޮޑެތި، ސީރިއަސް ތުހުމަތުތަކެއްގެ ތަހުގީގުގައި ރައީސުލްޖުމްހޫރިއްޔާ އުފެއްދެވި ކޮމިޝަންގެ ވަޒީރުންގެ ގޮތުގައި ތިއްބަވާ ބޭބޭފުޅުންގެ ނަން އައިސް ދައުވާ ކުރާ ހިސާބަށް ދިޔައިމަ އެކަހަލަ ހިސާބުގަ ތިބޭ މީހުން އެމްޑީޕީގެ މަގާމުތަކަށް ވާދަ ނުކުރެއްވޭނެ ނިންމުން ނިންމާފައި ވަނީ އެމްޑީޕީގެ މިންގަނޑު ހިފެހެއްޓުމަށް. އެހެން ނަމަވެސް އެގޮތަށް ފާސްވުމަށް ފަހު ޖެހިގެން އައި ދުވަހު އަނެއްކާ އެ މިންގަނޑު އެ ވައްޓާލީ. އެގޮތަކަށް ނުހެދޭނެ. ހަދައިގެން ނުވާނެ. ކުރިޔަށް މިއޮތް އެމްޑީޕީގެ އިންތިހާބުގައި އާންމު މެންބަރުން މިކަމަށް ވިސްނަވަން ޖެހޭ. އެމްއެމްޕީއާރްސީ މައްސަލަ ބެލުމަށް ޓަކައި އެމްޑީޕީން ކުރެވެން ހުރި ހުރިހާ ކަމެއް ކުރައްވަން ޖެހޭނެ. މި ޕާޓީ ބަޔަކު ނޫން އެހެން ބަޔަކު މިކަން ކުރާނެ ކަމަށް ދެކިގެން ނުވާނެ” އިމްތިޔާޒް ވިދާޅުވިއެވެ.
އެމްޑީޕީގެ އެތެރޭގެ އިންތިޚާބު ބާއްވަން ހަމަޖެހިފައި ވަނީ މިމަހުގެ 25 ވަނަ ދުވަހުއެވެ. މި އިންތިހާބުގައި އެމްޑީޕީގެ 90،000އަށް ވުރެ ގިނަ މެމްބަރުންނަށް ވޯޓުލުމުގެ ހައްގު ލިބިފައިވެއެވެ. މި އިންތިހާބުގައި 455 މަގާމަކަށް މީހުން ހޮވަން ވަނީ ނިންމައިފައެވެ. މި 455 ދާއިރާއަށް 700އަށް ވުރެ ކެނޑިޑޭޓުން ވާދަކުރެއެވެ. އިންތިޚާބަކާ ނުލައި އެޕާޓީގެ ގައުމީ މަޖިލީހުގެ 6 ގޮނޑިއެއް ކަށަވަރުވެފައިވާއިރު އިތުރު ކެނޑިޑޭޓަކު ކުރިމަތި ލައިފައި ނުވުމުގެ ސަބަބުން ވޯޓަކާ ނުލައި 165 ދާއިރާއަކަށް މިހާރު ވެސް ވަނީ ކެނޑިޑޭޓުން ހޮވިފައެވެ.
