މަޖިލީހުގެ ރައީސްކަމަށް ގާސިމް ވަޑައިގަތުމަށް އެދި ޖާބިރުގެ ސިޓީއެއް
ރައްޔިތުންގެ މަޖިލީހުގެ ރައީސްކަމާ މާމިގިލީ ދާއިރާގެ މެންބަރު ގާސިމް އިބްރާހިމް ހަވާލުވެ ވަޑައިގަތުމަށް އެދި، ކާށިދޫ ދާއިރާގެ މެންބަރު ޢަބްދުﷲ ޖާބިރު ސިޓީއެއް ފޮނުއްވައިފިއެވެ.
އޮންލައިން ނޫސް "ދުވަސް"އިން ބުނެފައިވާ ގޮތުގައި އެ ސިޓީގެ ކޮޕީއެއް ވަނީ އެ ނޫހަށް ލިބިފައެވެ.
ޖުމްހޫރީ ޕާޓީގެ ލީޑަރު ގާސިމަށް އެޑްރެސް ކުރައްވައި ޖާބިރު ފޮނުއްވައިފައިވާ އެ ސިޓީގައި ވިދާޅުވެފައި ވަނީ، ރައްޔިތުންގެ މަޖިލީހުގެ ރައީސް މަޖިލީހުގެ ރިޔާސަތު ނުބަލަހައްޓާތާ ގިނަ ދުވަސް ވެފައިވާކަމަށާއި، ރާއްޖެ މިހާރު އޮތް ހަމަނުޖެހުމުގެ ތެރޭގައި ޤައުމު ހަމަ މަގަށް އެޅުވުމުގައި މަޖިލީހުގެ ރައީސްގެ ދައުރަކީ ވަރަށް މުހިންމު މަސައްކަތެއްކަމުގައި ދެކިވަޑައިގެންނަވާ ކަމަށެވެ. އެހެންކަމުން މަޖިލީހުގެ ރައީސްގެ ދައުރު ފުރިހަމައަށް އަދާކޮށް ޤައުމު ހަމަ މަގަށް އެޅުވުމަށް ޓަކައި މިވަގުތު ގާސިމް މަޖިލީހުގެ ރައީސް ކަމަށް ވަޑައިގަތުމަށް ޖާބިރަށް ފެންނާތީ، މިއީ އެމަނިކުފާނު އެރުވި ދައުވަތެއް ކަމުގައި ވެސް މި ސިޓީގައި ވިދާޅުވެފައިވެއެވެ.
ޖާބިރު އިތުރަށް ވިދާޅުވެފައި ވަނީ، މި ދައުވަތަކީ ޑީއާރުޕީއާއި އެމްޑީޕީގެ ގިނަ ފަރާތްތަކަކާއި އެމްޑީޕީގެ އިސް ލީޑަރު ރައީސް އިބްރާހިމް މުޙައްމަދު ޞާލިހްގެ ވެސް ވިސްނުންފުޅު ހުރި ގޮތް ކަމަށެވެ. އެހެންކަމުން މި ހުރިހާ ފަރާތްތަކެއްގެ އެއްބާރުލުން ގާސިމަށް އޮންނާނެކަމުގައި ޖާބިރު ވިދާޅުވެފައިވެއެވެ.
