ސަލާމަތީ ކަންތައްތައް ދައުލަތުން ނަގަނީ ވަރަށް ލުއިކޮށް: އިންތި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ދިން ހަމަލާއަށް ފަހުގައި ވެސް ސަލާމަތީ ކަންތައްތައް ދަޢުލަތުން ނަގަނީ ވަރަށް ލުއިކޮށް ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ އެމްޑީޕީ މެމްބަރު އިމްތިޔާޒް ފަހުމީ (އިންތި) މިއަދު ވިދާޅުވެއްޖެއެވެ.
އުއްތަމަ ފަނޑިޔާރު މުއުތަސިމް އަދުނާންގެ ސެކިއުރިޓީ ބްރީޗްވި ގޮތާ ގުޅޭގޮތުން ރައްޔިތުންގެ މަޖިލީހަށް ހުށައެޅި މައްސަލައަށް ބަހުސްކުރައްވަމުން އިންތި ވިދާޅުވީ ރައީސް ނަޝީދަށް އަމާޒުކޮށް ދިން ހަމަލާއަށް ފަހު މާގިނަ ދުވަސްތަކެއް ނުކޮށް ދެން އިވިގެން ދިޔައީ އުއްތަމަ ފަނޑިޔާރުގެ ގެކޮޅަށް މީހަކު ވަދެ ސެކިއުރިޓީ ކެމެރާތަކާ ކުޅުނު ހަބަރު ކަމަށެވެ. އެހެން ނަމަވެސް ސަރުކާރުން މިކަމަށް ސަމާލުކަން ނުދޭ ކަމަށް އިންތި ވިދާޅުވިއެވެ.
“ރައީސް ނަޝީދަށް ދިން ހަމަލާއަށް ފަހު މާކަ ގިނަ ދުވަސް ނުވަނީސް ދެން އިވުނީ އުއްތަމަ ފަނޑުޔާރުގެ ގެކޮޅަށް ވަރަށް ފަސޭހަ ކަމާއެކު ހޫރެމުން ދާ ބުޅަލެއް ހެން ގޮސް އެތާ ހުރި ސެކިއުރިޓީ ކެމެރާތަކާ އެއްޗިއްސާ ކުޅުނު ހަބަރު. ވަރަށް އާދައިގެ ގޮތަކަށް އެކަން ހިނގާ ދިޔައީ. މިއާ އެއްވަރަށް ދައުލަތުން، ސަރުކާރުން މިކަމަށް ރިއެކްޓް ކުރި ތަނެއް ނުފެނޭ” އިންތި ވިދާޅުވިއެެވެ.
މީގެ އިތުރުން އިންތި ވިދާޅުވީ ހޯމް މިނިސްޓަރު އިމްރާން އަބްދުﷲ އިއްޔެ މަޖިލީހަށް ވަޑައިގެން ދެއްވީ ވަރަށް ޒިންމާދާރުކަން ކުޑަ ޖަވާބެއް ކަަމަށެވެ. އެ ގެކޮޅަށް ވަނީ މަސްތުވާތަކެތީގެ މީހެއް ކަަމަށް މިނިސްޓަރު ވިދާޅުވި ކަމަށާއި އެގޮތަށް ޖަވާބު ދެވެން ވީ ކީއްވެގެންތޯ އިންތި ވަނީ ސުވާލު ކުރައްވައިފައެވެ.
“އިއްޔެ ހޯމް މިނިސްޓަރ މަޖިލީހަށް ވަޑައިގަތުމުން އަޅުގަނޑު ސުވާލެއް ދަންނަވާލިން. އެހާ ފަސޭހަ ކަމާ އެކު އެ ގެޔަށް ވަނުމުގެ ޖާގަ ނުވަތަ ސެކިއުރިޓީ އެހާ ދަށް ފެންވަރުގެ ވާކަމުގެ އިންޓެލިޖެންސް ފުލުހުންނަށް ނުވަތަ ހޯމް މިނިސްޓްރީއަށް ލިބިފައި ވޭތޯ. ހޯމް މިނިސްޓަރުގެ ޖަވާބަކީ ވަރަށް ޒިންމާދާރުކަން ކުޑަ ޖަވާބެއް. އަޅުގަނޑު ވަރަށް ކަންބޮޑުވޭ. އަޅުގަނޑަށް ހަމަ ސުވާާލު އުފެދޭ ކީއްވެގެންތޯ އެމަނިކުފާނު އެގޮތަށް އެޖަވާބު އެ ދެއްވެވީ” އިންތި ވިދާޅުވިއެވެ.
ދިވެހި ރާއްޖޭގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާންގެ ގެކޮޅުގެ ސެކިއުރިޓީ ބްރީޗްވި ގޮތް ދެނެގަތުމަށް ރައްޔިތުންގެ މަޖިލީހުގެ މަޖިލީހަށް މައްސަލަ ހުށަހަޅައިފައި ވަނީ ފޮނަދޫ ދާއިރާގެ މެމްބަރު މޫސާ ސިރާޖެވެ.
ދެން. ގެނޫސްވެރިން ސަރުކާރުގެ ޚަބަރާއި އަދި އިނދިކޮޅުގެ ޚަބަރު. އެއްވެސް ތަފާތުކުރުމެއްނެތި ގެނެސްދޭކަން ފާހަނގަކުރެވޭ ވަރަށްބޮޑަށް ޝުކުރިއްޔާ