ގައިދުރުކަމާއި މާސްކު އެޅުން ނިމުމަކަށް ގެނެސް މައްކާ އާއްމު ހާލަތަށް!
މުސްލިމުންގެ ޤިބްލަ، މަސްޖިދުލްހަރަމް ހުންނަ މައްކާގައި ކޮވިޑް-19އާ ގުޅިގެން އަޅައިފައިވާ ފިޔަވަޅުތަކަށް މާދަމާއިން ފެށިގެން ލުއި ދޭން ނިންމައިފިއެވެ.
މައްކާގެ މިނިސްޓްރީ އޮފް އިންޓީރިއާއިން ނެރެފައިވާ ބަޔާނެއްގައި ވިދާޅުވީ، މާދަމާއިން ފެށިގެން ފުލް ކެޕޭސިޓީގައި އުމްރާ ވުމުގެ ކަންކަން ކުރިޔަށް ގެންދެވޭނެ ކަމަށެވެ.
"ބޭރުގައި މާސްކް އެޅުމާއި ހޮޓަލް އަދި ރެސްޓޯރެންޓްތަކުގައި ވެސް ފުލް ކެޕޭސިޓީގައި ހިންގުމުގެ ހުއްދަ މާދަމާއިން ފެށިގެން ދެވޭނެ." އެ މިނިސްޓްރީން އާއްމު ކުރި ބަޔާނެއްގައި ވިދާޅުވިއެވެ.
ކޮވިޑް-19އާ ގުޅިގެން މައްކާ ބަންދު ކުރުމަށް ފަހު، އުމްރާ ކުރުމަށް އެ ޤައުމަށް ދިއުމަށް ހުޅުވައިލައިފައި ވަނީ މިދިޔަ އޯގަސްޓް މަހު 9 ވަނަ ދުވަހުއެވެ. ވެކްސިން ކާޑާ އެކު އެ ޤައުމަށް އެތެރެވޭއިރު، ކޮވިޑް-19 ފިޔަވަޅުތަކާ އެކު، އުމްރާގެ އަގު ވަނީ ވަރަށް ބޮޑަށް މަތިވެފައެވެ.
އިންޓީރިއާ މިނިސްޓްރީން ވިދާޅުވީ، މިސްކިތުގެ ބޭރުގައި މާސްކް ނާޅާ އުޅެވުނުކަމުގައި ވިޔަސް ޙަރަމްފުޅުގެ ތެރޭގައި އަދިވެސް މާކްސް އެޅުން މަޖުބޫރު ކަމަށެވެ. އަދި ބޮޑެތި ހަފްލާތައް ބޭއްވުމުގެ ހުއްދަ ވެސް ވަނީ ދީފައެވެ.
ކޮވިޑް-19ގެ ސަބަބުން މި އަހަރުގެ ހައްޖުގެ އަޅުކަން އަދާކުރުމުގެ ފުރުސަތު ދީފައި ވަނީ ސައުދީގައި ދިރިއުޅޭ 60،000 މީހުންނަށެވެ. މިއަހަރު ޙައްޖު އަޅުކަން ކުރުމުގައި ބައިވެރިވި އެއްވެސް މީހެއް ކޮވިޑް-19އަށް ފައްސިވެފައި ނުވާކަމަށް ސައުދީން ވަނީ ކުރިން ހާމަކޮށްފައެވެ. މި އަހަރު ހައްޖުގެ އަޅުކަމުގައި ބައިވެރިކޮށްފައި ވަނީ 18 އަހަރާއި 65 އަހަރާ ދެމެދުގެ މީހުންގެ ތެރެއިން ވެކްސިން ޖަހައިފައި މީހުންނެވެ. އަދި ބޮޑެތި ބަލިތައް ތަހައްމަލު ކުރަމުންދާ މީހުންނަށް މި އަހަރު ހައްޖުގެ އަޅުކަމުގައި ބައިވެރިވުމުގެ ފުރުސަތު ދީފައެއް ނުވެއެވެ.
ކޮވިޑް-19 ފިޔަވަޅުތަަކަށް ދިން ލުޔާ އެކު އާއްމު ހާލަތުގައި ޙައްޖު ކުރެވޭނެ ކަމަށް ޤަބޫލު ކުރެވެއެވެ.
