އާރްޔަންއަށް ޖަލުގައި ނުވެސް ނިދޭ، އާއިލާމަތިން ހަނދާންކޮށް އަބަދު ރޮނީ
ބޮލީވުޑްގެ ޚަބަރުތަކަށް ބަލާއިރު އަދިވެސް އެންމެ ބޮޑަށް ދެކެވެނީ ސުޕާސްޓާ ޝާހްރުކް ޚާންގެ ދޮށީ ދަރިފުޅު އާރްޔަން ޚާން ޖަލުގައި ހޭދަ ކުރަމުންދާ ދުވަސްތަކުގެ ވާހަކައެވެ.
މަސްތުވާތަކެތީގެ މައްސަލައެއްގައި މި މަހުގެ 2 ވަނަ ދުވަހު ނާކޮޓިކްސް ކޮންޓްރޯލް ބިއުރޯ (އެންސީބީ)އިން އާރްޔަން ހައްޔަރު ކުރި ފަހުން، ކަފާލާތުގެ ދަށުން އޭނާ ދޫކޮށްލުމަށް އެދި ތިން ފަހަރަށް ވަނީ އެކި ކޯޓަށް ހުށަހަޅައިފައެވެ. ނަމަވެސް އެ ތިން ފަހަރު ވެސް އޭނާއަށް ކަފާލާތު ދީފައެއް ނުވެއެވެ.
ރިޕޯޓުތަކުން ބުނާ ގޮތުގައި އާރްޔަން ޖަލުގައި އުޅެނީ ވަރަށް ހާލުގައެވެ. އެގޮތުން އޭނާއަށް ރަނގަޅަށް ނުކެވޭ ކަމަށާއި ރޭގަނޑު ނުވެސް ނިދާ ކަމަށް ވެސް ރިޕޯޓުތަކުން ބުނެއެވެ. އޭގެ އިތުރުން އާރްޔަން ޖަލުގައި އެއްވެސް މީހަކާ ވާހަކަ ވެސް ނުދައްކާ ކަމަށާއި ހަމައެކަނި ވާހަކަ ދައްކަނީ އޭނާއާ މީހަކު ވާހަކަ ދެއްކުމުން ޖަވާބު ދިނުމުގެ ގޮތުން ކަމަށް ވެސް ބުނެއެވެ.
އާތަރ ރޯޑް ޖަލުގައި އާރްޔަން ދުވަސްތައް ހޭދަ ކުރަމުން ދިޔައިރު، އޭނާގެ މަންމަ ގޯރީ ޚާންގެ އުފަންދުވަހާއި މައިންބަފައިންގެ ކައިވެނީގެ އެނިވާސަރީ ވެސް ވަނީ ފާއިތުވެގެން ގޮސްފައެވެ. އާއިލާ މަތިން ހަނދުމަކޮށް އެ ދެ ދުވަހުގައި ވެސް އާރްޔަން ވަރަށް ރުއިކަމަށް ރިޕޯޓުތަކުން ބުނެއެވެ.
