ޝާހްރުކް ޚާން މިހާރު ކުޅެނީ ރަންބީރާއި ރަންވީރް ކުޅޭ ކަހަލަ ރޯލުތައް، އެހައި ހުނަރެއް ނެތް: މަހޭޝް
ބޮލީވުޑްގެ ސުޕާސްޓާ ޝާހްރުކް ޚާން މިހާރު ކުޅެނީ ވަރަށް އާދައިގެ ފިލްމުތައް ކަމަށާއި މިހާރު އޭނާ ކުޅޭ ފިލްމުތަކުގައި އެއްވެސް ތަފާތު ކަމެއް ނެތް ކަމަށް މަޝްހޫރު ފިލްމު ޕްރޮޑިއުސަރ އަދި ޑައިރެކްޓަރ މަހޭޝް މަންޖްރެކަރް ބުނެފިއެވެ.
އަލަށް ރިލީޒްވާން ތައްޔާރުވެފައިވާ ސަލްމާން ޚާން ހަރަކާތްތެރިވާ "އަންތިމް"ގެ ޑައިރެކްޓަރ މަހޭޝް އަބަދުވެސް ފާހަގަވެފައި ވަނީ އޭނާ ބުނަން ބޭނުންވާ ބަސްތަކެއް އެއްވެސް ޖެހިލުމެއް ނެތި ބުނާ މީހެއްގެ ގޮތުގައެވެ. އެގޮތުން ދާދި ފަހުން މަހޭޝްގެ ބަސްތަކުގެ ޝިކާރައަކަށް ވެފައި ވަނީ ޝާހްރުކް ޚާންއެވެ. އެ ގޮތުން މަހޭޝް ބުނީ ޝާހްރުކް މި ފަހަކަށް އައިސް ކުޅެފައި ހުރީ ރަންބީރް ކަޕޫރާއި ރަންވީރް ސިންގ ކުޅޭ ކަހަލަ ރޯލުތައް ކަމަށާއި ޝާހްރުކްގެ ހުނަރެއް ނެތް ކަމަށެވެ.
މަހޭޝް ބުނީ ޝާހްރުކް އޭނާގެ ހުނަރުގެ ބޭނުން ރަނގަޅަށް ނުކުރާ ކަމަށާއި ޝާހްރުކްގެ ތަރި އެއްކޮށް އޮއްސުމުގެ ކުރިން އެކަން ރަނގަޅު ކުރުމަށް، އަންތިމްއާ ބެހޭ ގޮތުން ދިން އިންޓަވިއު އެއްގެ ތެރޭގައި މަހޭޝް ނަސޭހަތްތެރިވެފައިވެއެވެ.
ރަންބީރާއި ރަންވީރްގެ ނަން ބުނެވުމުން މަހޭޝް ބުނީ، އެ ދެމީހުންގެ ނަން ބުނީ އެ މީހުން ދެރަކޮށްލުމުގެ ގޮތުން ނޫން ކަމަށާއި ނަމަވެސް ޝާހްރުކް ޚާނަކީ އެ ދެމީހުންނާ ބަލާއިރު މާ ތަޖުރިބާކާރު އެކްޓަރަކަށް ވާއިރު، އެމީހުންނާ އެއް ލެވެލެއްގައި ހުރުން ލަދުވެތި ކަމަށް ދެކޭތީ ކަމަށެވެ.
