އިންޑިއާގެ ބޯޑަރު ހުޅުވައިލާން ނިންމި ނިންމުން މުރާޖައާކުރަން މޯދީ އަންގައިފި

ކޮވިޑް-19ގެ އައު އޮމައިކްރޯން ވޭރިއަންޓާ މެދު ކަންބޮޑުވުންތައް އިތުރުވަމުންދާ އިރު، ދަތުރުފަތުރުކުރުމުގައި އަޅައިފައިވާ ފިޔަވަޅުތަކަށް ލުއިދިނުމުގެ ޕްލޭންތައް މުރާޖައާ ކުރުމަށް އިންޑިއާގެ ބޮޑުވަޒީރު ނަރެންދްރާ މޯދީ އެ ޤައުމުގެ އޮފިޝަލުންނަށް އަންގަވައިފިއެވެ.

އިންޑިއާއިން އިއްޔެ ވަނީ ގިނަ ދުވަހުގެ މެދު ކެނޑުމަކަށް ފަހު ނުރައްކާ އެންމެ ބޮޑުވެފައިވާ ގައުމުތަކުން ބައިނަލްއަގުވާމީ ފަސިންޖަރުން އުފުލާ ފްލައިޓްތައް އަލުން ފެށުމަށް ނިންމައިފައެވެ.

އެހެން ނަމަވެސް، އައު ވޭރިއަންޓަކީ "ކަންބޮޑުވާ" ވޭރިއަންޓެއްކަމަށް ދުނިޔޭގެ ސިއްހަތު ޖަމްއިއްޔާ (ޑަބްލިއުއެޗްއޯ)އިން ކަނޑައެޅުމާ ގުޅިގެން، "ބައިނަލްއަގުވާމީ ހުރިހާ އެރައިވަލްސް، ގައިޑްލައިންތަކާ އެއްގޮތަށް ޓެސްޓު ކުރުމުގެ ކުރުމަށާއި 'ނުރައްކަލަށް ހުށަހެޅިފައިވާ' ގައުމުތަކަށް ހާއްސަ ފޯކަސްއެއް ދީގެން، މަސައްކަތް ކުރުމަށް" އޮފިޝަލުންނާ ބައްދަލު ކުރެއްވުމަށް ފަހު ނެރުއްވި ބަޔާނެއްގައި މޯދީ ވިދާޅުވިއެވެ.

މޯދީ ވިދާޅުވީ މީހުން އިތުރަށް ސަމާލުވެ، މާސްކު އެޅުމާއި އިޖުތިމާއީ ގައިދުރުކަން ފަދަ ރަނގަޅު ރައްކާތެރިކަމުގެ ފިޔަވަޅުތައް އަޅަން ޖެހޭ ކަމަށެވެ. މޯދީ ވަނީ ދެވަނަ ޑޯޒްގެ ކަވަރޭޖް އަވަސް ކުރުމަށް ވެސް އޮފިޝަލުންނަށް އަންގަވައިފައެވެ.

"އައު ވޭރިއަންޓަށް ރިއާޔަތްކޮށް ޕްރޯއެކްޓިވް ވާން ޖެހޭ" ބަޔާނުގައިވެއެވެ.

ކޮވިޑް-19ގެ އަސަރު ދެވަނައަށް އެންމެ ބޮޑަށް ކޮށްފައި ވަނީ އިންޑިއާއަށެވެ. ނަމަވެސް ފާއިތުވީ ދޮޅު އަހަރެއްހައި ދުވަހަށް ބަލާއިރު، އަލަށް ބަލިޖެހުނު މީހުންގެ އަދަދު އެންމެ ކުޑަ އަދަދަކަށް އިތުރުވީ މިދިޔަ ހަފްތާގައެވެ. ސަބަބަކަށް މާހިރުން ވިދާޅުވީ، މީގެ ކުރިން ކުރިމަތިވި އިންފެކްޝަންތަކުގެ ސަބަބުން އެންޓިބޮޑީޒް އިތުރުވުމާއި އެ ގައުމުގެ އާބާދީގެ ބޮޑު ބައެއްގައި ވެކްސިން ދިނުމެވެ.

ދުވާލެއްގެ މައްޗަށް އެ ގައުމުން ފައްސިވާ އަދަދު ވަނީ ސެޕްޓެމްބަރު މަހުން ފެށިގެން ވަނީ ދެބައިކުޅަ އެއްބަޔަށް ދަށްވެފައެވެ. މިދިޔަ 24 ގަޑިއިރުގެ ތެރޭގައި 8،318 މީހުން އަލަށް ފައްސި ވެފައިވާ ކަމަށް އިންޑިއާގެ ސިއްހަތާ ބެހޭ އިދާރާއިން ވަނީ ރިޕޯޓްކޮށްފައެވެ.