ސޯޝަލް މީޑިއާއިން ޝެހްނާޒް ނުފެންނާތީ ފޭނުން މާޔޫސްވެފައި
ބިގްބޮސް 13އިން މަޝްހޫރުކަން ހޯދި ޝެހްނާޒް ގިލް މިދުވަސްކޮޅު ސޯޝަލް މީޑިއާއިން ނުފެންނާތީ، އޭނޭގެ ފޭނުން ކަންބޮޑުވުން ފާޅުކޮށްފިއެވެ.
ބޮލީވުޑް އެކްޓަރ ސިދާތު މިދިޔަ އަހަރު މަރުވި ފަހުން އޭނާގެ ލޯބިވެރިޔާ ޝެހްނާޒަށް ވަނީ ވަރަށް ބޮޑު ބަދަލުތަކެއް އައިސްފައެވެ. އެގޮތުން ސްކްރީންތަކުންނާއި ސޯޝަލް މީޑިއާ އިން ވެސް ޝެހްނާޒް ދުވަސްކޮޅަކަށް ގެއްލުނެވެ.
ނަމަވެސް އޭގެ ހަތަރު ވަރަކަށް މަސް ފަހުން، މަދުމަދުން އަނެއްކާ ވެސް އޭނާ ސްކްރީންތަކަށް އަންނަން ފެށިއެވެ. އޭނާ ކުޅުނު ފިލްމު ޕްރޮމޯޝަންތަކުންނާއި ސިދާތަށް ޚާއްސަކޮށް ކީ ލަވައިގެ ޕްރޮމޯޝަންތަކުން ވެސް ފެންނަން ފެށިއެވެ. އޭގެ އިތުރުން ބައެއް އިޝްތިހާރުތަކުން ވެސް އޭނާ ފެނުނެވެ. އަދި ސޯޝަލް މީޑިއާގައި ބައެއް ކުދި ވީޑިއޯތައް ވެސް އޭނާ ކުޅުނެވެ.
ނަމަވެސް ފާއިތުވީ ހަފްތާ ތެރޭގައި ޝެހްނާޒްގެ އެއްވެސް ވީޑިއޯއެއް، އަދި ސޯޝަލް މީޑިއާ ޕޯސްޓެއް ވެސް ފެނިފައި ނުވާތީ އޭނާގެ ފޭނުން ވަނީ މާޔޫސްވެފައެވެ. އެގޮތުން ޝެހްނާޒްގެ ފޭންޕޭޖުގައި އޭނާގެ ފޭނުން ބުނީ، ޝެހްނާޒްއާ ނުލައި ސޯޝަލް މީޑިއާ ފަޅު ކަމަށެވެ.
