ނަދީމްގެ މަރަށް ހަތަރު އަހަރު ފަހުން ، އަންނަ މަހު ހުކުމް އިއްވަނީ
މާލޭގެ ކެފޭއެއްގެ ތެރޭގައި އިންދައި ތޫނު އެއްޗެހިން ހަމަލާދީ މަރައިލި ނަދީމް އިބްރާހިމްގެ މަރުގެ މައްސަލައިގެ ހުކުމް އަންނަ މަހުގެ 31ވަނަ ދުވަހު އިއްވަން ކްރިމިނަލް ކޯޓުން ހަމަޖައްސައިފިއެވެ.
ޓާމިނަލް ކެފޭ ތެރޭގައި 2017 ވަނަ އަހަރުގެ ޖުލައި މަހު ދިން މި ހަމަލާއާ ގުޅިގެން ދައުލަތުން ދައުވާ ކުރަނީ ގ. ޝާރާޒް މުހައްމަދު މަފާޒް ހުސައިން ސަލީމާއި ލ. ގަން/ ވިދާތަރި އަލީ ނިފާޒާއި ރ. އިންނަމާދޫ/ ސަމަންތާ ހުސައިން ޝާމިންގެ އިތުރުން ގއ. ގެމަނަފުށީ/ ހަވާސް މުހައްމަދު ކަރަމް ސުހައިލްގެ މައްޗަށެވެ.
މި މައްސަލައިގައި ނަދީމަށް ހަމަލާދިން ކަމުގެ ތުހުމަތު ކުރަނީ މަފާޒްގެ މައްޗަށެވެ. ދެން ތިބި މީހުންނަށް ތުހުމަތު ކުރަނީ ހަމަލާދިން ސަރަހައްދަށް ސައިކަލުތަކުގައި އެ މީހުންނާ އެކު ގޮސް، ބައިވެރިވި ކަމަށެވެ.
ކްރިމިނަލް ކޯޓުގައި މިއަދު ބޭއްވި އަޑުއެހުމުގައި ވަނީ މި މައްސަލައިގެ ޚުލާސާ ބަޔާން ހުށަހަޅައިފައެވެ. އަދި ޚުލާސާ ބަޔާން ހުށަހަޅައި ނިމުމުން އެ މައްސަލަ ބައްލަވާ ގާޒީ ހުސައިން ފާއިޒް ރަޝާދު ވިދާޅުވީ އެ މައްސަލާގެ އަޑުއެހުންތައް ނިންމައިލިޔަސް، މައްސަލަ ދިރާސާ ކުރުމުގެ ތެރޭގައި އިތުރު ކަމެއް ސާފުކުރަން ޖެހިއްޖެ ނަމަ، މި މައްސަލައިގެ އިތުރު އަޑުއެހުމެއް ބާއްވާނެ ކަމަށާއި އިތުރު އަޑުއެހުމެއް ބާއްވަން ނުޖެހޭ ނަމަ، އަންނަ މަހުގެ 31ވަނަ ދުވަހު އެ މައްސަލައިގެ ހުކުމް އިއްވާނެ ކަމަށެވެ. އަދި ހުކުމް ކުރެވެންދެން ދައުވާ ލިބޭ މީހުންގެ ބަންދު ދަމަހައްޓަން ވެސް ގާޒީ ވަނީ ނިންމަވައިފައެވެ.
