"ކަޗާ ބަދަމް"އިން މަގުބޫލުކަން ހޯދި ބުބަންގެ ކިބުރުވެރި ވާހަކަތަކަށް ޓަކައި މާފަށް އެދެފި
ބަދަން ވިއްކަން އުޅުމުގެ ތެރޭގައި ކިޔަމުން ގެންދިޔަ "ކަޗާ ބަދަމް"ލަވަ ، މީސްމީޑިއާގައި މަޝްހޫރުވެ ، އާންމުގެ މަގުބޫލުކަން ހޯދި އިންޑިއާގެ ބުބަން ބަޑޭކަރު ދެއްކި ކިބުރުވެރި ވާހަކަތަކަށް ޓަކައި އޭނާ މާފަށް އެދިއްޖެއެވެ.
އިންޑިއާގެ ބެންގޯލްގައި ބަދަން ވިއްކަން އުޅުނު ބުބަން ކިޔަމުން ގެންދިޔަ ލަވަ މަޝްހޫރުވެ މިއުޒިކް އުފައްދާ ކުންފުންޏަކުން ވަނީ އެ ލަވައިގެ ރޯޔަލްޓީ ގަނެ، 1.5 ލައްކަ ރުޕީސް ވެސް އޭނާއަށް ދީފައެވެ. އަދި އެކި ނައިޓް ކްލަބުތަކުގައި އޭނާ ވަނީ ޝޯވ ދީފައެވެ. އޭނާއަށް ލިބުނު މަޝްހޫރުކަމައިގެން ފަޚުރުވެރިވެ ބުބަން ބުނެފައި ވަނީ ބަދަން ވިއްކުމުގެ މަސައްކަތަކަށް ދެން ނުދާނެ ކަމަށާއި އޭނާއަކީ ސެލެބްރިޓީއެއް ކަމަށެވެ.
ބުބަން: ކުރިން އޭނާ އުޅުނު ގޭގައި
ބުބަންގެ މި ވާހަކަތަކަށް ވަރަށް ގިނަ ފާޑުކިޔުންތައް އަމާޒުވިއެވެ. އެއާ އެކު އޭނާ ވަނީ އެ ވާހަކަތަކަށް ޓަކައި މާފަށް އެދިފައެވެ. އަދި ދެން ވެސް ބަދަން ވިއްކަން ޖެހިއްޖެ ނަމަ އެކަން ކުރާނެ ކަމަށް އޭނާ ވަނީ ބުނެފައެވެ.
"އަހަންނަށް އެނގިއްޖެ އަހަންނަށް ބުނެވުނީ ބުނަންވާ ކަހަލަ ވާހަކައެއް ނޫންކަން ، އަހަންނަކީ އާދައިގެ،ސާދާ މީހެއް، މަޝްހޫރުކަމަކީ ތާއަބަދަށް އޮންނާނެ ކަމެއް ނޫން، އަހަރެން ޔަގީންކޮށްދެން އަހަރެންގެ ސަޚްސިއްޔަތަކަށް ބަދަލެއް ނާދޭ" ބުބަން ބުނެފައި ވެއެވެ.
50 އަހަރުގެ ބުބަންއަކީ އާއިލާގެ 10 މެމްބަރުން ބެލެހެއްޓުމަށް ބަދަން ވިއްކަމުން ދިޔަ މީހެކެވެ. ނަމަވެސް "ކަޗާ ބަދަމް"ގެ ސަބަބުން އޭނާގެ ދިރިއުޅުން ވަނީ ބަދަލުވެފައެވެ. ބެންގޯލްގެ އާޓިސްޓުންތަކެއް އުފެއްދި އެ ލަވައިގެ ރިމިކްސްއަށް މިހައިތަނަށް 100 މިލިއަނަށް ވުރެ ގިނަ ވިއުސް ލިބިފައި ވެއެވެ.
Ads by STO
