ޔޯގާ ހަމަނުޖެހުން: އިތުރު މީހަކު ދޫކޮށްލައިފި
އިންޑިއާ ސަރުކާރާއި ދިވެހި ސަރުކާރުން ގުޅިގެން މިދިޔަ ޖޫންމަހުގެ 21 ވަނަ ދުވަހު ޔޯގާ ދުވަސް ފާހަގަކުރަން ގަލޮޅު ދަނޑުގައި ބޭއްވި ހަރަކާތް ކުރިއަށްދިޔަ ވަގުތު ހިންގި ހަމަނުޖެހުންތަކާ ގުޅިގެން ހައްޔަރުކުރި އެކަކު ދޫކޮށްލައިފިއެވެ.
މި ހަރަކާތާ ގުޅިގެން ހިންގި ހަމަނުޖެހުމާ ގުޅިގެން ފުރަތަމަ 21 މީހަކު ހައްޔަރުކުރިއެވެ. އޭގެ ފަހުން ވެސް ބައެއް މީހުން ހައްޔަރުކުރިއެވެ. އެ ގޮތުން މި މަހުގެ 02 ވަނަ ދުވަހުގައި އެކަކު އަދި 03 ވަނަ ދުވަހު ވެސް އެކަކު ހައްޔަރު ކުރިއެވެ.
02 ވަނަ ދުވަހު ހައްޔަރުކުރީ މ.އޯކިޑް ހައުސް މުޙައްމަދު ފައިޞަލެވެ. އޭނާގެ ބަންދާމެދު ގޮތެއް ނިންމަން އިއްޔެ ކޯޓަށް ހާޒިރުކުރުމުން ވަނީ ބަންދުން ދޫކޮށްލައިފައެވެ.
ފައިޞަލް ދޫކޮށްލި ސަބަބެއްކަމަށް ކޯޓު ޢަމުރުގައި އޮތީ އޭނާއަކީ އެއްވުމުގައި ބައިވެރިވެ ދަނޑަށް ވަން ފަރާތެއް ނަމަވެސް އޭނާގެ ފަރާތުން އެއްވެސް މުދަލަކަށް އަދި އެއްވެސް މީހަކަށް ގެއްލުމެއް ދީފައިވާކަން އެނގެން ނެތް ކަމަށްވާތީ ކަމަށެވެ.
Ads by STO
